తొలి ఓటర్లలో ఒకరిగా నిలిచిన నటుడు అజిత్ కుమార్
ఓటేసిన అన్నాడీఎంకే నేత పళనిస్వామి, ఇతర రాజకీయ ప్రముఖులు
తమిళనాడు అసెంబ్లీ ఎన్నికల పోలింగ్ గురువారం ఉదయం ప్రారంభమైంది. రాష్ట్రవ్యాప్తంగా పలు పోలింగ్ కేంద్రాల్లో ఎలక్ట్రానిక్ ఓటింగ్ మెషీన్లు (ఈవీఎంలు), వీవీప్యాట్లలో సాంకేతిక సమస్యలు తలెత్తడంతో ఓటింగ్ ప్రక్రియ ఆలస్యంగా మొదలైంది. సమస్యలను గుర్తించిన ఎన్నికల అధికారులు వెంటనే రంగంలోకి దిగి, మరమ్మతులు చేపట్టి పోలింగ్ను తిరిగి ప్రారంభించారు.ప్రారంభంలో కొన్ని అవాంతరాలు ఎదురైనప్పటికీ, ఓటర్లు పెద్ద సంఖ్యలో పోలింగ్ కేంద్రాల వద్ద బారులు తీరారు. ప్రజాస్వామ్య పండుగలో పాల్గొనేందుకు ప్రజలు ఉత్సాహం కనబరిచారు. ఈ సందర్భంగా ప్రధాని నరేంద్ర మోదీ ఎక్స్ వేదికగా స్పందిస్తూ ప్రజలందరూ తమ ఓటు హక్కును వినియోగించుకోవాలని కోరారు. ముఖ్యంగా మహిళలు, తొలిసారి ఓటు వేస్తున్న యువత పెద్ద సంఖ్యలో పాల్గొని రికార్డు స్థాయిలో ఓటింగ్ నమోదు చేయాలని పిలుపునిచ్చారు.
సేలంలోని సిలువంపాలయం పంచాయతీ పాఠశాలలో అన్నాడీఎంకే ప్రధాన కార్యదర్శి ఎడప్పాడి పళనిస్వామి తన కుటుంబంతో కలిసి ఓటు వేశారు. మరోవైపు, తిరుచ్చిలోని తిల్లియినగర్లో వీవీప్యాట్ మొరాయించడంతో మంత్రి కేఎన్ నెహ్రూ కాసేపు పోలింగ్ బూత్ వద్ద వేచి చూడాల్సి వచ్చింది. నామ్ తమిలర్ కట్చి చీఫ్ కోఆర్డినేటర్ సీమాన్, బీజేపీ రాష్ట్ర ఉపాధ్యక్షురాలు ఖుష్బూ సుందర్ కూడా తమ ఓటు హక్కును వినియోగించుకున్నారు.
ప్రముఖ సినీ నటుడు అజిత్ కుమార్ రాష్ట్రంలో తొలి ఓటర్లలో ఒకరిగా నిలిచారు. భద్రతా కారణాల దృష్ట్యా అధికారులు ఆయనను ముందుగా బూత్లోకి అనుమతించారు. ఓటు వేసిన అనంతరం సిరా గుర్తును చూపిస్తూ బయటకు రాగా, ఆయన్ను చూసేందుకు పెద్ద సంఖ్యలో తరలివచ్చిన అభిమానులు కేరింతలు కొట్టారు. దీంతో అక్కడ కాసేపు సందడి వాతావరణం నెలకొంది.
