నేపాల్‌లో ఆకస్మికంగా సంభవించిన వరదలు తీవ్ర విషాదాన్ని మిగిల్చాయి.ఈ వరదల్లో 288 మంది భారతీయులు గల్లంతయ్యారని భారత విదేశాంగశాఖ వెల్లడించింది.ఇప్పటివరకు 21 మంది భారతీయులను రక్షించినట్లు తెలిపింది. రక్షించిన వారంతా తమిళనాడుకు చెందినవారేనని పేర్కొంది.మానస సరోవర యాత్ర కోసం వెళ్లిన పలువురు భారతీయులు చైనా పరిధిలోని టిబెట్‌ ప్రాంతంలో చిక్కుకుపోయినట్లు విదేశాంగశాఖ తెలిపింది.అక్కడ చిక్కుకున్న సుమారు 200 మంది భారతీయులు సహాయం కోసం విజ్ఞప్తి చేసినట్లు విదేశాంగశాఖ అధికార ప్రతినిధి రణ్‌ధీర్‌ జయస్‌వాల్‌ వెల్లడించారు.వరదల పరిస్థితిని పర్యవేక్షించేందుకు దిల్లీలో ప్రత్యేక కంట్రోల్‌ రూమ్‌ ఏర్పాటు చేసినట్లు చెప్పారు.
73 మంది విద్యుత్‌ ప్రాజెక్టు సిబ్బంది కూడా..
గల్లంతైన 288 మంది భారతీయుల్లో త్రిశూలి-1 జలవిద్యుత్‌ ప్రాజెక్టులో పనిచేస్తున్న 73 మంది కూడా ఉన్నారని జయస్‌వాల్‌ తెలిపారు.తమిళనాడుకు చెందిన 37 మందితో ఒకటి, 49 మందితో మరో పర్యాటక బృందం కూడా ఆచూకీ తెలియకుండా పోయినట్లు వివరించారు.పశ్చిమ బెంగాల్‌కు చెందిన 32 మంది, కేరళకు చెందిన 33 మంది కూడా గల్లంతైన వారిలో ఉన్నారని చెప్పారు.మిగిలిన వారు దేశంలోని ఇతర రాష్ట్రాలకు చెందినవారిగా వెల్లడించారు.గల్లంతైన భారతీయుల ఆచూకీ కోసం నేపాల్‌ అధికారులతో నిరంతరం సంప్రదింపులు జరుపుతున్నట్లు విదేశాంగశాఖ తెలిపింది.సహాయక చర్యల్లో భాగంగా మానవతా సాయంతో కూడిన రెండు విమానాలను ఇప్పటికే కాఠ్‌మండూకు పంపినట్లు జయస్‌వాల్‌ వెల్లడించారు.
270కి చేరిన మృతుల సంఖ్య..
వాటి ద్వారా మొత్తం 47.5 టన్నుల అత్యవసర సామగ్రిని నేపాల్‌కు తరలించినట్లు చెప్పారు.అదనంగా వరదల కారణంగా దెబ్బతిన్న ప్రాంతాల్లో రాకపోకలకు ఉపయోగపడే బెయిలీ బ్రిడ్జిని కూడా పంపుతున్నట్లు తెలిపారు.నేపాల్‌లో వరదల కారణంగా మృతుల సంఖ్య 270కి చేరింది. మరోవైపు నేపాల్‌, టిబెట్‌ ప్రాంతాల్లో కలిపి 1,600 మందికిపైగా గల్లంతైనట్లు సమాచారం.వీరిలో 500 మందికిపైగా విదేశీయులు ఉన్నారని నేపాల్‌ టూరిజం బోర్డు వెల్లడించింది.గల్లంతైన వారిలో ఎక్కువ మంది ట్రెక్కింగ్‌ కోసం లేదా కైలాస మానస సరోవర యాత్ర కోసం నేపాల్‌, టిబెట్‌ ప్రాంతాలకు వచ్చినవారేనని టూరిజం బోర్డు తెలిపింది.అధికారిక వివరాల ప్రకారం.. గల్లంతైన విదేశీయుల్లో భారతీయులతో పాటు అమెరికాకు చెందిన 65 మంది, ఉక్రెయిన్‌కు చెందిన 53 మంది, మలేషియాకు చెందిన 51 మంది ఉన్నారు.మొత్తంగా 30కుపైగా దేశాలకు చెందిన పౌరులు ఈ విపత్తు ప్రభావానికి గురైనట్లు నేపాల్‌ టూరిజం బోర్డు పేర్కొంది.
