భారత ఎన్నికల సంఘం (ECI)లో అంతర్గత విభేదాలు మరోసారి వెలుగులోకి వచ్చాయి. ఎన్నికల కమిషనర్లు సుఖ్బీర్ సింగ్ సంధు, వివేక్ జోషి.. గత 10 నెలల్లో ఎన్నికల ప్రక్రియకు సంబంధించిన పలు కీలక నిర్ణయాలపై కనీసం 14 సార్లు అధికారికంగా అభ్యంతరాలు వ్యక్తం చేసినట్లు ‘ది ఇండియన్ ఎక్స్ప్రెస్’ ప్రత్యేక కథనం వెల్లడించింది. ముఖ్యంగా ఓటర్ల జాబితా సవరణ, కొత్త ఓటర్ల నమోదు, ఓటర్ల తొలగింపు, ఎన్నికల డేటాబేస్ నిర్వహణ వంటి అంశాలపై వీరు ప్రశ్నలు లేవనెత్తారు. ఈ అభ్యంతరాలు ప్రధాన ఎన్నికల కమిషనర్ జ్ఞానేశ్ కుమార్కు కూడా పంపినట్లు కథనం పేర్కొంది.
ఫారం-6 మార్పులపై ఇద్దరు కమిషనర్ల అభ్యంతరం
కొత్త ఓటర్ల నమోదు కోసం ఉపయోగించే ఫారం-6లో మార్పులపై సంధు, జోషి అభ్యంతరం వ్యక్తం చేశారు. SIRలో గతంలో ఉన్న ఓటర్ల జాబితాలో దరఖాస్తుదారు లేదా వారి తల్లిదండ్రులు, తాతముత్తాతల పేర్లు ఉన్నాయా అనే వివరాలను కొత్తగా చేర్చారు.ఈ ప్రశ్నకు సమాధానం ఇవ్వకుండా ఫారం ముందుకు వెళ్లే అవకాశం లేకపోయింది.అయితే ఫారం-6 చట్టబద్ధమైనదని, ప్రభుత్వ నిబంధనలను మార్చకుండా అందులో మార్పులు చేయలేమని జోషి మేలోనే స్పష్టం చేశారు. సంధు కూడా దీనికి అంగీకరించారు.అయినప్పటికీ మార్పులు చేయడంతో ఆగస్టు 13న సంధు వాటిని అనధికారికం, చట్టవిరుద్ధంఁగా పేర్కొంటూ వెంటనే తొలగించాలని కోరారు.
ఓటర్ల డేటాబేస్ కేంద్రీకరణపైనా ఇద్దరు కమిషనర్లు ఆందోళన వ్యక్తం చేశారు.రాష్ట్ర స్థాయి అధికారులకు ERONetలో పూర్తి స్థాయి యాక్సెస్ ఉండటం లేదని సంధు పేర్కొన్నారు.ఓటర్ల డేటాలో మార్పులు చేయడానికి సంబంధిత చట్టబద్ధ అధికారులకే అనుమతి ఉండేలా ఆడిట్ నిర్వహించాలని జోషి సూచించారు.ఐటీ విభాగానికి చెందిన అధికారులకు చట్టపరంగా అలాంటి యాక్సెస్ను పరిమితం చేసే అధికారం లేదని కూడా ఆయన అభిప్రాయపడ్డారు.పశ్చిమ బెంగాల్లో SIR సమయంలో 16.10లక్షల అప్పీళ్లపై కూడా సంధు ప్రశ్నలు లేవనెత్తారు.న్యాయాధికారులు ఓటర్లుగా చేర్చిన వారి పేర్లను తొలగించాలంటూ ఈ అప్పీళ్లు దాఖలయ్యాయి.వీటిని ECI తరఫున ఎవరు, ఎవరి అనుమతితో దాఖలు చేశారో తనకు, జోషికి, బెంగాల్ CEOకు తెలియదని సంధు పేర్కొన్నారు.
మరోవైపు తొలగించబడిన 27.16 లక్షల మంది ఓటర్లలో 22.21 లక్షల మంది తమ పేర్లను తిరిగి చేర్చాలని అప్పీలు చేశారు. మొత్తం 38.31 లక్షల అప్పీళ్లు నమోదయ్యాయి. అలాగే ECI పేరుతో పంపుతున్న పలు సమాచారానికి కమిషన్ అనుమతి లేదని ఏప్రిల్లో సంధు, ఆ తర్వాత జోషి కూడా అధికారులకు లేఖలు రాశారు. భవిష్యత్తులో అన్ని అధికారిక సమాచారానికి కమిషన్ అనుమతి తప్పనిసరిగా ఉండాలని వారు పేర్కొన్నారు.SIRపై ఇప్పటికే రాజకీయంగా తీవ్ర చర్చ జరుగుతున్న నేపథ్యంలో ఈ తాజా పరిణామాలు ఎన్నికల జాబితా సవరణ ప్రక్రియపై మరిన్ని ప్రశ్నలకు దారితీశాయి.
