మీ మధ్య ఎప్పుడూ వివాదాలేనా?.. కృష్ణా జలాల వివాదంపై సుప్రీం ఆగ్రహం

కృష్ణా జలాల వివాదంపై సుప్రీంకోర్టులో విచారణ
కృష్ణా నదీ జలాల పంపకాల వివాదంపై సుప్రీంకోర్టు కీలక వ్యాఖ్యలు చేసింది. ఆంధ్రప్రదేశ్, తెలంగాణ, కర్ణాటక, తమిళనాడు మధ్య నదీ జలాల విషయంలో ఎప్పుడూ వివాదాలేనా? అని జస్టిస్ విక్రమ్‌నాథ్ నేతృత్వంలోని త్రిసభ్య ధర్మాసనం వ్యాఖ్యానించింది. కృష్ణా జలాల వివాద ట్రైబ్యునల్-2 (కేడబ్ల్యూడీటీ-2) ఇచ్చిన తీర్పును సవాలు చేస్తూ ఆంధ్రప్రదేశ్ ప్రభుత్వం దాఖలు చేసిన పిటిషన్‌పై బుధవారం విచారణ చేపట్టిన ధర్మాసనం, తదుపరి విచారణను నవంబర్ 4వ తేదీకి వాయిదా వేసింది.2010లో బ్రిజేష్ కుమార్ నేతృత్వంలోని ట్రైబ్యునల్, కృష్ణా నదిలో నీటి లభ్యతను 65 శాతం విశ్వసనీయత ఆధారంగా లెక్కగట్టింది. దీనివల్ల కర్ణాటకకు అదనపు జలాలు కేటాయింపుతో పాటు, ఆల్మట్టి డ్యాం ఎత్తును పెంచుకునేందుకు మార్గం సుగమమైంది. ఈ నిర్ణయంతో తమ రాష్ట్రంలోని శ్రీశైలం, నాగార్జునసాగర్ ప్రాజెక్టులతో పాటు కృష్ణా డెల్టాకు నీటి ప్రవాహం (ఇన్‌ఫ్లో) తీవ్రంగా తగ్గిపోతుందని ఆందోళన వ్యక్తం చేస్తూ ఆంధ్రప్రదేశ్ 2014లో సుప్రీంకోర్టును ఆశ్రయించింది. అప్పట్లో ట్రైబ్యునల్ తీర్పుపై గెజిట్ నోటిఫికేషన్‌ను నిలిపివేస్తూ సుప్రీంకోర్టు స్టే విధించింది. రాష్ట్ర విభజన తర్వాత ఈ కేసులో తెలంగాణ కూడా భాగస్వామిగా చేరింది.

విచారణ సందర్భంగా ఆంధ్రప్రదేశ్ తరఫు న్యాయవాది వాదనలు వినిపిస్తూ, కర్ణాటక తమ హక్కులను కాలరాస్తోందని ఆరోపించారు. వేల కోట్ల రూపాయలు పెట్టుబడిగా పెట్టినప్పటికీ, దిగువ రాష్ట్రంగా నీటిని వినియోగించుకోలేకపోతున్నామని ఆవేదన వ్యక్తం చేశారు. మధ్యంతర ఉపశమనంగా కనీసం 65 నుంచి 70 టీఎంసీల నీటిని వాడుకునేందుకు అనుమతి ఇవ్వాలని కోరారు. దీనికి కర్ణాటక తరఫు న్యాయవాది బదులిస్తూ, ఏపీ చెబుతున్న గణాంకాలు సరైనవి కావని వాదించారు. ఇరుపక్షాల వాదనలు విన్న ధర్మాసనం, ఈ వివాదంపై పూర్తిస్థాయి విచారణ జరపడానికి సిద్ధంగా ఉన్నామని స్పష్టం చేసింది.