ఆర్డీటీ మైదానంలో పరుగుల మోత

. వికెట్ల వేట.. అటల్ బిహారీ వాజ్‌పాయ్ స్మారక టోర్నమెంట్‌లో నాలుగో రోజు హోరాహోరీ
. నాలుగు మ్యాచ్‌లు.. ఎనిమిది జట్లు.. నాలుగు అద్భుత విజయాలు
. ఆటగాళ్ల మెరుపు ప్రదర్శనతో కిక్కెక్కిన క్రికెట్ సందడి

విశాలాంధ్ర – ధర్మవరం : ధర్మవరం పట్టణంలోని ఆర్డీటీ మైదానం ఆదివారం మరోసారి క్రికెట్ సందడితో కళకళలాడింది. అటల్ బిహారీ వాజ్‌పాయ్ స్మారక క్రికెట్ టోర్నమెంట్ సీజన్-3 నాలుగో రోజు జరిగిన మ్యాచ్‌లు ప్రేక్షకులను ఆద్యంతం ఆకట్టుకున్నాయి. నాలుగు మ్యాచ్‌ల్లో ఎనిమిది జట్లు బరిలోకి దిగగా.. బ్యాటర్లు పరుగుల వరద పారించేందుకు ప్రయత్నిస్తే, బౌలర్లు వికెట్ల కోసం వేట సాగించారు. ఫలితంగా ప్రతి మ్యాచ్‌లోనూ పోటీ రసవత్తరంగా మారింది. గెలుపే లక్ష్యంగా బరిలోకి దిగిన జట్లు ప్రారంభం నుంచే దూకుడు ప్రదర్శించడంతో ఆర్డీటీ మైదానంలో క్రీడా ఉత్కంఠ నెలకొంది. బ్యాటర్ల బౌండరీలు, బౌలర్ల పదునైన బంతులు, ఫీల్డర్ల చురుకైన ప్రదర్శనతో మ్యాచ్‌లు ఆసక్తికరంగా సాగాయి. నాలుగు మ్యాచ్‌ల అనంతరం నాలుగు జట్లు విజయకేతనం ఎగురవేశాయి.
తొలి మ్యాచ్‌లో పరుగుల సునామీ.. బిందు XIకు 92 పరుగుల భారీ విజయం.నాలుగో రోజు తొలి మ్యాచ్‌లో బిందు XI – సూపర్ XI జట్లు తలపడ్డాయి. తొలుత బ్యాటింగ్ చేసిన బిందు XI జట్టు నిర్ణీత ఓవర్లలో 159/5 పరుగుల భారీ స్కోర్ నమోదు చేసింది. భారీ లక్ష్యంతో బరిలోకి దిగిన సూపర్ XI జట్టు 67/4 పరుగులకే పరిమితమైంది. దీంతో బిందు XI జట్టు 92 పరుగుల తేడాతో ఘన విజయం సాధించింది. జట్టు విజయానికి తన అద్భుత ప్రదర్శనతో దోహదపడిన శివను ప్లేయర్ ఆఫ్ ది మ్యాచ్‌గా ఎంపిక చేశారు.ఉత్కంఠ పోరులో పిటిపి ఫ్రెండ్స్ XI పైచేయి.
రెండో మ్యాచ్‌లో పిటిపి ఫ్రెండ్స్ XI – నాయక్ వారియర్స్ జట్లు పోటీపడ్డాయి. తొలుత బ్యాటింగ్ చేసిన పిటిపి ఫ్రెండ్స్ XI జట్టు 100/9 పరుగులు సాధించింది. లక్ష్యాన్ని ఛేదించే క్రమంలో నాయక్ వారియర్స్ జట్టు పోరాడినప్పటికీ 84/7 పరుగులకే పరిమితమైంది. దీంతో పిటిపి ఫ్రెండ్స్ XI జట్టు 16 పరుగుల తేడాతో విజయం సాధించింది. మ్యాచ్‌లో సమర్థవంతమైన ఆటతీరును కనబరిచిన పవన్ కుమార్కు ప్లేయర్ ఆఫ్ ది మ్యాచ్ అవార్డు లభించింది.
పూగి XI దూకుడు.. 59 పరుగుల తేడాతో విజయం.
మూడో మ్యాచ్‌లో పూగి XI – జిఎస్ కొట్టాలా జట్లు తలపడ్డాయి. మొదట బ్యాటింగ్ చేసిన పూగి XI జట్టు నిర్ణీత ఓవర్లలో 143/5 పరుగులు చేసి ప్రత్యర్థి ముందు మంచి లక్ష్యాన్ని ఉంచింది. అనంతరం బరిలోకి దిగిన జిఎస్ కొట్టాలా జట్టు 84/7 పరుగులు మాత్రమే చేయగలిగింది. దీంతో పూగి XI జట్టు 59 పరుగుల తేడాతో విజయం సాధించింది. జట్టు విజయానికి కీలకంగా నిలిచిన అన్నం సాయి అద్భుత ఆటతీరుతో ఆకట్టుకుని ప్లేయర్ ఆఫ్ ది మ్యాచ్ అవార్డును అందుకున్నారు.
చివరి మ్యాచ్‌లో తారక్ XI జోరు.. 81 పరుగుల తేడాతో గెలుపు.
నాలుగో మ్యాచ్‌లో తారక్ XI – రైల్వే స్కూల్ జట్లు తలపడ్డాయి. తొలుత బ్యాటింగ్ చేసిన తారక్ XI జట్టు 135/4 పరుగులతో బలమైన స్కోర్ నమోదు చేసింది. లక్ష్య ఛేదనలో రైల్వే స్కూల్ జట్టు తడబడుతూ 54/9 పరుగులకే పరిమితమైంది. దీంతో తారక్ XI జట్టు 81 పరుగుల తేడాతో ఘన విజయాన్ని నమోదు చేసింది. మ్యాచ్‌లో అద్భుతమైన ప్రదర్శన కనబరిచిన గురుకు ప్లేయర్ ఆఫ్ ది మ్యాచ్ అవార్డు లభించింది.
నాలుగు మ్యాచ్‌లు.. నాలుగు మెరుపు ప్రదర్శనలు;;
నాలుగో రోజు పోటీల అనంతరం అత్యుత్తమ ప్రతిభ కనబరిచిన బిందు XI ఆటగాడు శివ, పిటిపి ఫ్రెండ్స్ XI ఆటగాడు పవన్ కుమార్, పూగి XI ఆటగాడు అన్నం సాయి, తారక్ XI ఆటగాడు గురులకు ప్లేయర్ ఆఫ్ ది మ్యాచ్ అవార్డులు అందజేశారు. ఈ అవార్డులను ధర్మవరం టూ టౌన్ సీఐ జయ నాయక్, బీజేపీ నాయకులు భాస్కర్ రెడ్డి, బీజేవైఎం నరేష్, బీజేపీ నాయకులు సోమ్లా నాయక్తో పాటు సీనియర్ క్రికెట్ క్రీడాకారుల చేతుల మీదుగా అందజేసి విజేత ఆటగాళ్లను అభినందించారు.
రోజురోజుకూ పెరుగుతున్న టోర్నమెంట్ ఉత్కంఠ;;
సీజన్-3లో నాలుగో రోజు పూర్తయ్యే సమయానికి టోర్నమెంట్‌పై క్రీడాభిమానుల్లో ఆసక్తి మరింత పెరిగింది. ఒకవైపు భారీ స్కోర్లతో బ్యాటర్లు సత్తా చాటుతుండగా.. మరోవైపు బౌలర్లు కీలక సమయాల్లో వికెట్లు తీస్తూ మ్యాచ్‌లను మలుపుతిప్పుతున్నారు. దీంతో ప్రతి మ్యాచ్ కూడా ఫలితం ఏ క్షణంలో ఎలా మారుతుందో చెప్పలేని విధంగా సాగుతోంది. ఆర్డీటీ మైదానంలో కొనసాగుతున్న ఈ క్రికెట్ సంబరంలో ఇక ముందుకు సాగే మ్యాచ్‌లు మరింత ఉత్కంఠను పంచనున్నాయి. బరిలో మిగిలిన జట్లు తదుపరి దశకు చేరేందుకు వ్యూహాలతో సిద్ధమవుతుండటంతో.. సీజన్-3లో అసలైన పోటీ మరింత రసవత్తరంగా మారనుంది. ఈ కార్యక్రమంలో క్రీడాకారులు పాల్గొన్నారు