భారత ప్రజాస్వామ్యం ప్రత్యేకం.. : శశిథరూర్

భారత ప్రజాస్వామ్యం విశిష్టతను కాంగ్రెస్ ఎంపీ శశిథరూర్ కొనియాడారు. పొరుగు దేశాల్లో యువత చేపట్టిన నిరసనల ధాటికి ప్రభుత్వాలు, వ్యవస్థలు కుప్పకూలినప్పటికీ, భారత ప్రజాస్వామ్య వ్యవస్థ మాత్రం ఆ ఒత్తిడికి “వంగింది తప్ప విరగలేదు” అని ఆయన వ్యాఖ్యానించారు. ఖాట్మండులో జరిగిన ఓ సదస్సులో ఆయన ఈ వ్యాఖ్యలు చేశారు.ఇటీవలి కాలంలో భారత్‌తో పాటు మయన్మార్, పాకిస్థాన్, శ్రీలంక, బంగ్లాదేశ్, నేపాల్ వంటి ఆరు దక్షిణాసియా దేశాల్లో యువత సారథ్యంలో పెద్ద ఎత్తున నిరసనలు జరిగాయని ఆయన గుర్తుచేశారు. బంగ్లాదేశ్, శ్రీలంకలలో పాలకులు దేశం విడిచి పారిపోగా, నేపాల్‌లో ఎన్నికల ద్వారా పాలనలో మార్పు వచ్చిందని, పాకిస్థాన్‌లో సైన్యం కీలుబొమ్మ ప్రభుత్వాన్ని ఏర్పాటు చేయగా, మయన్మార్‌లో సైనిక తిరుగుబాటు చోటుచేసుకుందని ఆయన వివరించారు.అయితే, భారత్‌లో పరిస్థితి వీటికి భిన్నంగా ఉందని శశిథరూర్ అభిప్రాయపడ్డారు. భారత ప్రజాస్వామ్యంలో స్వీయ-సవరణ చేసుకునే యంత్రాంగం ఉందని, మారిన పరిస్థితులకు అనుగుణంగా మన వ్యవస్థ ఆశ్చర్యకరమైన వేగంతో సర్దుబాటు చేసుకుందని ఆయన పేర్కొన్నారు. యువత నిరసనల నుంచి తలెత్తిన ప్రజా ఒత్తిడి కారణంగా ఒక మంత్రి రాజీనామా చేయాల్సి రావడమే ఇందుకు నిదర్శనమని ఆయన తెలిపారు.”భారత వ్యవస్థ వంగింది కానీ విరగలేదు. ఇదే అతిపెద్ద వ్యత్యాసం” అని శశిథరూర్ స్పష్టం చేశారు. ప్రజాభిప్రాయానికి అనుగుణంగా స్పందించే ఈ లక్షణమే భారత ప్రజాస్వామ్యంపై తనకు నమ్మకాన్ని కలిగిస్తోందని, ఇది మన ప్రజాస్వామ్య బలానికి నిదర్శనమని ఆయన పేర్కొన్నారు.