ముఖ్యమంత్రికి, మంత్రులకు ఎమ్మెల్యే పరిటాల సునీత, పరిటాల శ్రీరామ్ విజ్ఞప్తి
అసెంబ్లీలో ముఖ్యమంత్రిని, మంత్రులను కలిసిన సునీత, శ్రీరామ్
ఇరిగేషన్, విద్యుత్, దేవాదాయశాఖల వారిగా విజ్ఞప్తులు
విశాలాంధ్ర ధర్మవరం : రాప్తాడు, ధర్మవరం నియోజకవర్గాల్లోని సమస్యలు పరిష్కరించాలని ముఖ్యమంత్రి తో పాటు పలువురు మంత్రులకు ఎమ్మెల్యే పరిటాల సునీత, పరిటాల శ్రీరామ్ విజ్ఞప్తి చేశారు. గురువారం అసెంబ్లీ ఆవరణలో ముఖ్యమంత్రి శ్రీ నారా చంద్రబాబు నాయుడు తో పాటు జలవనరులు, దేవాదాయ, విద్యుత్, పర్యాటక, గనుల శాఖల మంత్రులను కలిశారు. ముఖ్యమంత్రి జాకీ పరిశ్రమ ఏర్పాటు, నడిమివంక రక్షణ గోడనిర్మాణం, పంచాయతీ రాజ్ శాఖ పరిధిలోని గ్రామీణ రహదారుల నిర్మాణంపై విజ్ఞప్తి చేసిన అనంతరం జలవనరుల శాఖ మంత్రి నిమ్మల రామానాయుడును కలిసి రాప్తాడు నియోజకవర్గ పరిధిలోని నడిమివంక రక్షణ గోడ నిర్మాణానికి, నియోజకవర్గంలో ప్రాజెక్ట్ ల పనుల గురించి వివరించారు. పేరూరు ప్రాజెక్టు కు నీరందించే పనులు అలాగే గేట్ల మరమ్మతులు వంటి వాటిపై విజ్ఞప్తి చేశారు. పీఏబిఆర్ కుడి కాలువ ద్వారా 53 చెరువులకు నీరందించాలన్నారు. అలాగే హెచ్చెల్సీ ద్వారా పులివెందుల బ్రాంచి కెనాల్ కు నీరు విడుదల చేయాలని,ఈ కాల్వ నుంచి తాడిమర్రి మండలంలోని చివరి చెరువు వరకు నీరు అందేలా చూడాలన్నారు. ముదిగుబ్బ మండలంలో జిల్లేడుబండ ప్రాజెక్టు పనులు నిలిపివేశారని అన్నారు. ఈ ప్రాజెక్టు పరిధిలో రైతులకు పూర్తి స్థాయిలో పరిహారం ఇచ్చి రైతులకు ఉపయోగకరంగా ప్రాజెక్టును నిర్మించాలన్నారు. మరోవైపు విద్యుత్ శాఖ మంత్రి గొట్టిపాటి రవికుమార్ కలసి ధర్మవరం, రాప్తాడు నియోజకవర్గాలలో నూతన విద్యుత్ సబ్స్టేషన్లు, ట్రాన్స్ఫార్మర్లు, పరికరాలు కూడా మంజూరు చేయాలని వారు తెలిపారు. స్పందించిన విద్యుత్ శాఖ మంత్రి సీఎండీకి ఆదేశాలను జారీ చేయడం జరిగిందని తెలిపారు. మరోవైపు దేవాదాయ శాఖ మంత్రి ఆనం రామ నారాయణరెడ్డిని కలిసి పలు గ్రామాలు తోపాటు ఎస్సీ ఎస్టీ కాలనీలలో దేవాలయ నిర్మాణానికి నిధులు మంజూరు చేయాలని వారు విజ్ఞప్తి చేశారు. రామగిరి మండలం వెంకటాపురం గ్రామంలోని తిరుమలేశ్వర ఆలయంలో దుర్గాదేవి ఆలయానికి మెట్ల ఏర్పాటు 50 లక్షలతో స్నేక్ బార్ మరుగుదొడ్లను నిర్మించాలని వారు కోరారు. పర్యాటక శాఖ మంత్రి కందుల దుర్గేష్ ను కూడా వారు కలిసి ధర్మవరం నియోజకవర్గాల్లో పర్యాటకరంగా అభివృద్ధి కోసం చర్యలు తీసుకోవాలని వారు విజ్ఞప్తి చేశారు. తిరుమల దేవర వెంకటేశ్వర స్వామి ఆలయంలో పర్యాటక సౌకర్యాల అభివృద్ధి ఎన్ హెచ్ 44 అనంతపురం సమీపంలోని మరో టోల్గేట్ వద్ద 25 లక్షలతో స్నేక్ బార్ నిర్మాణము ఆత్మకూరు జాతీయ రహదారి సమీపంలో టూరిజం వే సైడ్ సౌకర్యాలు నసనకోట ముత్యాలమ్మ గుడి దగ్గర పిల్లలు ఆడుకోవడానికి ప్లే ఏరియా టూరిజం రెస్టారెంట్ మరుగుదొడ్లు నిర్మించాలని తెలపడం జరిగిందని తెలిపారు. చెన్నై కొత్తపల్లి మండలం కోన శివాలయం వద్ద పిల్లలు ఆడుకోవడానికి ప్లే ఏరియా టూరిజం రెస్టారెంట్ మరుగుదొడ్లు కూడా ఏర్పాటు చేయాలని తెలపడం జరిగిందన్నారు. పేరు డ్యాం వద్ద బోటింగ్ అభివృద్ధి చేయాలని,తదుపరి భూగర్భ గనుల శాఖ మంత్రి కొల్లు రవీంద్రను కలిసి రామగిరి బంగారుగనులను మళ్లీ తెరిపించే విధంగా చర్యలు తీసుకోవాలని తెలపడం జరిగిందని తెలిపారు. దీనివలన వందలాదిమందికి ఉపాధి లభిస్తుందని తెలిపారు. సమస్యలన్నింటిపై సంబంధిత మంత్రులు సానుకూలంగా స్పందించడం జరిగిందని పరిటాల శ్రీరామ్, పరిటాల సునీత తెలిపారు. సంబంధిత శాఖల అధికారుల నుంచి నివేదికలు తెప్పించుకొని పనులు చేపడతామని మంత్రులు హామీ ఇవ్వడం జరిగిందని వారు తెలిపారు.
