రాష్ట్రవ్యాప్తంగా ప్రారంభమైన సీపీఐ శత వార్షికోత్సవాలు

. కదంతొక్కిన రెడ్‌షర్ట్‌ వలంటీర్లు
. అమరవీరులకు నివాళులు
. కష్టజీవుల రాజ్యస్థాపనే సీపీఐ లక్ష్యం: రామకృష్ణ

విశాలాంధ్ర-విజయవాడ : భారత కమ్యూనిస్టు పార్టీ (సీపీఐ) 99 ఏళ్లు పూర్తిచేసుకుని వందో సంవత్సరంలోకి అడుగుపెట్టింది. ఈ చారిత్రక క్షణాన పార్టీ శ్రేణుల్లో ఉత్సాహం నెలకొనడంతోపాటు ఒకింత ఉద్వేగభరితులయ్యారు. విజయవాడ హనుమాన్‌పేటలోని సీపీఐ 100వ వ్యవస్థాపక దినోత్సవాన్ని పురస్కరించుకుని గురువారం ఉదయం పార్టీ రాష్ట్ర కార్యాలయం దాసరి భవన్‌ వద్ద అరుణపతాకాన్ని సీపీఐ రాష్ట్ర కార్యదర్శి కె.రామకృష్ణ ఆవిష్కరించారు. రెడ్‌షర్ట్‌ వలంటీర్ల నుంచి గౌరవ వందనం స్వీకరించారు. అక్కడి నుంచి ర్యాలీగా వెళ్లి పోలీస్‌ కంట్రోల్‌ రూమ్‌ వద్ద ఉన్న పార్టీ సీనియర్‌ నాయకులు చండ్ర రాజేశ్వరరావు విగ్రహం వద్ద జెండా ఎగురవేశారు. చండ్ర రాజేశ్వరరావు విగ్రహానికి పూలమాలలు వేసి శ్రద్ధాంజలి ఘటించి రాష్ట్రవ్యాప్తంగా సీపీఐ శత వార్షికోత్సవాలను ప్రారంభించారు. అనంతరం ది విజయవాడ టాక్సీ వర్కర్స్‌ యూనియన్‌ అధ్వర్యంలో పార్టీ సీనియర్‌ నాయకులు కంచర్ల నాగేశ్వరరావు నేతృత్వంలో ఏర్పాటు చేసిన ప్రత్యేక వేదికపై అమరవీరుల చిత్రపటాలకు పూలమాలలు వేసి ఘనంగా నివాళులర్పించారు. సాయంత్రం సీపీఐ విజయవాడ నగర సమితి అధ్వర్యంలో లెనిన్‌ పార్కులో జరిగిన భారీ బహిరంగ సభలో రామకృష్ణ ముఖ్యఅతిధిగా పాల్గొన్నారు. సీపీఐ విజయవాడ నగర కార్యదర్శి అధ్యక్షతన జరిగిన సభలో రామకృష్ణ మాట్లాడుతూ 1925 డిసెంబరు 26వ తేదీన ఉత్తరప్రదేశ్‌లోని కాన్పూర్‌లో భారత దేశంలోని మేధావులు, విద్యావేత్తలు, లెనిన్‌, మార్క్స్‌ సిద్ధాంతాలపై విశ్వాసం ఉన్న వారు భారత కమ్యూనిస్టు పార్టీని ఏర్పాటు చేశారని తెలిపారు. కమ్యూనిస్టు పార్టీని మొగ్గలోనే తుంచేయాలనే కుట్రతో బ్రిటీష్‌ పాలకులు అక్రమకేసులు బనాయించి జైళ్లలో పెట్టారన్నారు. అయినా కోట్లాది కష్టజీవుల కోసం ఎన్నో త్యాగాలు చేశారన్నారు. స్వాతంత్య్రానంతరం సంస్థానాల విలీనం కోసం పోరాటాలు చేసినట్లు చెప్పారు. తెలంగాణ సాయుధపోరాటంలో 4వేల మంది కమ్యూనిస్టు నాయకులు ప్రాణ త్యాగాలు చేశారని తద్వారా వేలాది ఎకరాల భూమి పేదలకు పంపిణీ చేసినట్లు తెలిపారు. అలాగే విశాఖ ఉక్కు కర్మాగారం సాధన కోసం ఉమ్మడి ఆంధ్రప్రదేశ్‌లో సీపీఐ చేపట్టిన పోరాటంలో భాగంగా 32 మంది ప్రాణాలు అమరులయ్యారని గుర్తు చేశారు. కమ్యూనిస్టు పార్టీ కేంద్రంలో, రాష్ట్రంలో అధికారంలోకి రావటమనే దాంతో నిమిత్తం లేకుండా కష్టజీవుల రాజ్య స్థాపన లక్ష్యంగా ఎన్నేళ్లయినా పోరాటం చేస్తామని స్పష్టం చేశారు. రైతులు, కార్మికులు, ఉద్యోగులు ఏ వర్గం వారైన పోరాటంలోకి వస్తే వారికి అండగా ఉండేది ఎర్రజెండా మాత్రమేనని నొక్కి చెప్పారు. స్వాతంత్య్ర పోరాటంలో పాల్గొన్న పార్టీగా ఎంతో గర్వంగా ఉందన్నారు. ప్రస్తుతం దేశంలో స్వాతంత్య్ర పోరాటంలో పాల్గొనని మతోన్మాద బీజేపీ అధికారంలోకి వచ్చిందన్నారు. అందువల్ల వారికి మహాత్మాగాంధీ, జవర్‌లాల్‌ నెహ్రూ, బీఆర్‌ అంబేద్కర్‌ … అయన రాసిన రాజ్యాంగం అంటే గౌరవం లేదన్నారు. దిల్లీ సరిహద్దులో రైతులు ఉద్యమాలు చేస్తుంటే సమస్యను పరిష్కరించకుండా పోలీసు బలగాలను ప్రయోగిస్తున్నారని విమర్శించారు. సాక్షాత్తు పార్లమెంటులో హోంమంత్రి అమిత్‌ షా అంబేద్కర్‌ను అవమానించారని చెప్పారు. అమిత్‌ షా రాజీనామా చేయాలని కోరుతూ ఈ నెల 30న వామపక్ష పార్టీలు దేశవ్యాప్తంగా నిరసనలు చేపడుతున్నట్లు చెప్పారు. రాష్ట్రంలో ఎన్నికల ముందు ఇచ్చిన హామీలను చంద్రబాబు మర్చిపోయారని విమర్శించారు. అధికారంలోకి వచ్చిన ఆరు నెలల్లోనే రూ.15,486 కోట్లు భారం ప్రజలపై వేశారని ధ్వజమెత్తారు. సెకీతో రాష్ట్ర ప్రభుత్వం చేసుకున్న విద్యుత్‌ కొనుగోలు ఒప్పందాన్ని రద్దు చేయాలని డిమాండ్‌ చేశారు. సీఎం అదాని వైపు ఉంటారా? ప్రజల వైపు ఉంటారా? తేల్చుకోవాలన్నారు. విశాఖ ఉక్కు పరిరక్షణ గురించి నోరెత్తని చంద్రబాబు మిట్టల్‌ ఉక్కు గురించి మోదీతో మాట్లాడారని చెప్పారు. పోలవరం నిర్వాసితులకు తగిన న్యాయం చేయటానికి కేంద్రంపై ఒత్తిడి చేయాలని డిమాండ్‌ చేశారు. సీపీఐ జాతీయ కార్యవర్గ సభ్యురాలు అక్కినేని వనజ మాట్లాడుతూ అభివృద్ధిని కాంక్షించే అభ్యుదయ వాదులందరూ వెలుగులోకి వచ్చి కమ్యూనిస్టు పార్టీని స్థాపించటం ద్వారా దేశంలో సాంస్కృతిక మార్పు వచ్చిందన్నారు. పేదలు గౌరవప్రదంగా జీవించటానికి అవకాశం వచ్చిందన్నారు. నాటి పోరాట ఘట్టాలను వివరిస్తూ రావి నారాయణరెడ్డి పోరాటాన్ని గుర్తు చేశారు.
ఏఐటీయూసీ రాష్ట్ర అధ్యక్షుడు రావులపల్లి రవీంద్రనాథ్‌ మాట్లాడుతూ కార్మికవర్గం హక్కుల కోసం చేస్తున్న ఉద్యమానికి కమ్యూనిస్టు పార్టీ అండగా ఉంటుందని చెప్పారు. మహిళా సమాఖ్య రాష్ట్ర ప్రధాన కార్యదర్శి పెన్మెత్స దుర్గాభవాని మాట్లాడుతూ విజయవాడ నగరంలో కమ్యూనిస్టు పార్టీ చేసిన పోరాటాలు, తద్వారా జరిగిన అభివృద్ధిని వివరించారు. ఈ కార్యక్రమంలో సీపీఐ రాష్ట్ర కార్యవర్గ సభ్యులు సీహెచ్‌.కోటేశ్వరరావు, దోనేపూడి శంకర్‌, సీనియర్‌ నాయకులు వై.చెంచయ్య, ఏఐటీయూసీ రాష్ట్ర ఉపప్రధాన కార్యదర్శి ఎస్‌.వెంకట సుబ్బయ్య, ఇన్సాఫ్‌ రాష్ట్ర కార్యదర్శి సయ్యద్‌ అఫ్సర్‌, ప్రొఫెసర్‌ సి.నరసింహారావు, డాక్టర్‌ రాంప్రసాద్‌, డాక్టర్‌ సదానందం, కౌలు రైతు సంఘం రాష్ట్ర ప్రధాన కార్యదర్శి పి.జమలయ్య, వీధి విక్రయదారుల ఫెడరేషన్‌ రాష్ట్ర ప్రధాన కార్యదర్శి తెడ్డు వెంకటేశ్వరరావుతో పాటు సీపీఐ నేతలు, అనుబంధ సంఘాల నాయకులు, కమ్యూనిస్టు పార్టీ అభిమానులు పెద్ద సంఖ్యలో పాల్గొన్నారు.
ఈ సందర్భంగా ప్రజానాట్య మండలి రాష్ట్ర అధ్యక్షుడు చంద్రనాయక్‌, కోశాధికారి ఆర్‌.పిచ్చయ్య, రాష్ట్ర నాయకులు ఎస్‌కే.నజీర్‌ కమ్యూనిస్టు పార్టీ సిద్ధాంతాన్ని అమరవీరుల త్యాగాలను గుర్తు చేస్తూ ఆలపించిన గీతాలు విశేషంగా ఆకట్టుకున్నాయి.

లోకేశ్‌ చొరవతో ఏపీకి దిగ్గజ కంపెనీలు క్యూ
ఐదేళ్లలో 5 లక్షల ఉద్యోగాలు లక్ష్యం
మారుమూల ప్రాంతాల్లో కమ్యూనికేషన్‌ వ్యవస్థ

విశాలాంధ్ర బ్యూరో – అమరావతి: ప్రగతిశీల ఆలోచనలతో ఆరు నెలలుగా రాష్ట్రంలో ఐటీి, ఎలక్ట్రానిక్స్‌ రంగాలను పరుగులు తీయిస్తున్నారు మంత్రి నారా లోకేశ్‌. రాష్ట్రాన్ని ఐటీ హబ్‌గా మార్చేందుకు వ్యూహాత్మకంగా అడుగులు వేస్తున్నారు. ఐటీ, ఎలక్ట్రానిక్స్‌ రంగాలతోపాటు ఉపాధి కల్పన సబ్‌ కమిటీ చైర్మన్‌గా లోకేశ్‌… రాష్ట్రానికి పెద్దఎత్తున పరిశ్రమలు రప్పించేందుకు విశేషంగా కృషి జరుపుతున్నారు. అంతర్జాతీయంగా వస్తున్న సాంకేతిక మార్పులకు అనుగుణంగా డీప్‌ టెక్‌ను అభివృద్ధి చేసి తద్వారా యువతకు ఉద్యోగావకాశాలు కల్పించాలని నిర్ణయించారు. ఇందులో భాగంగా రాష్ట్రంలో ఇన్నొవేషన్‌ యూనివర్సిటీ ఏర్పాటుకు ఫిజిక్స్‌ వాలాతో ఎంఓయు కుదుర్చుకున్నారు. లోకేశ్‌ కృషి ఫలితంగా గూగుల్‌ క్లౌడ్‌, టీసీిఎస్‌ వంటి దిగ్గజ కంపెనీలు రాష్ట్రంలో యూనిట్లను స్థాపించేందుకు ముందుకు వచ్చాయి. ఇప్పటికే ఐదువేల మందికి ఉపాధి కల్పిస్తున్న హెచ్‌సీఎల్‌… మరో 15వేల ఉద్యోగాలు కల్పించేలా సంస్థను విస్తరించడానికి ముందుకు వచ్చింది. లోకేశ్‌తో చర్చల అనంతరం ఫాక్స్‌కాన్‌ సిటీ ఏర్పాటుకు ఆ సంస్థ ప్రణాళికలు రూపొందిస్తోంది. పెట్టుబడుల ఆకర్షణే లక్ష్యంగా అక్టోబరు 25 నుంచి వారం రోజుల పాటు అమెరికాలో పర్యటించారు. సిలికాన్‌ వ్యాలీ, సీటెల్‌, న్యూయార్క్‌తో సహా ప్రధాన నగరాల్లో రోడ్‌షోలు నిర్వహించారు. ఏపీిలో పెట్టుబడి అవకాశాలపై ప్రపంచస్థాయి టెక్నాలజీ సంస్థల సీనియర్‌ ఎగ్జిక్యూటివ్‌లతో చర్చలు జరిపారు. టెస్లా, గూగుల్‌, యాపిల్‌, అడోబ్‌, మైక్రోసాఫ్ట్‌, ఫాల్కొన్‌ ఎక్స్‌, సేల్స్‌ ఫోర్స్‌, జడ్‌ స్కాలర్‌ వంటి 100 ప్రముఖ కంపెనీల ప్రతినిధులను కలిసి రాష్ట్రంలో ఆయా సంస్థల ఏర్పాటుకు గల అనుకూలతలను వివరించారు. ఐటీి, ఎలక్ట్రానిక్స్‌ రంగాల్లో ఐదేళ్లలో ఐదు లక్షలు ఉద్యోగాలు కల్పించడమే లక్ష్యంగా ప్రణాళికా బద్ధంగా ముందుకు సాగుతున్నారు. పెట్టుబడిదారుల స్నేహపూర్వక విధానాలతో నూతన ఐటీ, ఎలక్ట్రానిక్స్‌ పాలసీలను ప్రకటించారు. అత్యుత్తమ ప్రోత్సాహకాలతో 2024-29లో ఆంధ్రప్రదేశ్‌ ఎలక్ట్రానిక్స్‌ తయారీ విధానం, ఆంధ్రప్రదేశ్‌ సెమీ కండక్టర్‌ డిస్ప్లే ఫ్యాబ్‌ పాలసీ, ఆంధ్రప్రదేశ్‌ ఇన్ఫర్మేషన్‌ టెక్నాలజీ గ్లోబల్‌ కెపాబిలిటీ సెంటర్స్‌ పాలసీ, ఆంధ్రప్రదేశ్‌ డేటా సెంటర్‌ పాలసీలను ప్రకటించారు. ముఖ్యమంత్రి చంద్రబాబు ఆలోచనలకు అనుగుణంగా సింపుల్‌ గవర్నమెంట్‌ ఎఫెక్టివ్‌ గవర్నెన్స్‌ కోసం విధానాల రూపకల్పన చేశారు. దిల్లీలో పారిశ్రామిక పెట్టుబడిదారులతో సమావేశాలను ఏర్పాటు చేసి రాష్ట్రంలో అమలుచేస్తున్న ప్రోత్సహ కాలతో కూడిన సులభతర విధానాలను వివరించారు. చర్చలు ఫలవంతమయ్యాయి. కేవలం ఐటీ, ఎలక్ట్రానిక్స్‌ పరిశ్రమలపైనే గాకుండా ఇతర భారీ పరిశ్రమలను రాష్ట్రానికి రప్పించేందుకు మంత్రి చేసిన ప్రయత్నాలు విజయవంతమయ్యాయి. రెన్యువబుల్‌ ఎనర్జీ రంగంలో 40 వేల కోట్ల పెట్టుబడులకు టాటా గ్రూప్‌ సిద్ధమైంది. రాష్ట్రంలో 65 వేల కోట్లతో 500 కంప్రెస్డ్‌ బయో గ్యాస్‌ యూనిట్ల స్థాపనకు రిలయన్స్‌ ఎనర్జీ సంస్థ ఒప్పందం కుదుర్చుకుంది. ఆదిత్యమిట్టల్‌తో మంత్రి లోకేశ్‌ జరిపిన వీడియోకాల్‌ చర్చలు ఫలించాయి. రెండు దశలుగా రాబోయే పదేళ్లలో రాష్ట్రంలో రూ.1,40,000 కోట్లు పెట్టుబడులు పెట్టేందుకు ఆర్సెలర్‌ మిట్టల్‌ నిప్పాన్‌ స్టీల్‌ జాయింట్‌ వెంచర్‌ ముందుకు వచ్చింది. జనవరిలో రాష్ట్రంలో పర్యటించనున్న ప్రధాని నరేంద్ర మోదీ అనకాపల్లి వద్ద ఈ ప్రాజెక్టుకు భూమిపూజ చేయనున్నారు. ముంబైలో లోకేశ్‌ జరిపిన చర్చలతో వేదాంత అనుబంధ సంస్థ అయిన సెరెంటికీ గోల్డ్‌ రాష్ట్రంలో భారీ పెట్టుబడులకు సంసిద్ధత వ్యక్తం చేసింది. రెన్యువబుల్‌ ఎనర్జీ రంగంలో రూ.60 వేల కోట్లతో 10వేల మెగావాట్ల సామర్థ్యం కలిగిన ప్రాజెక్టులను స్థాపించేందుకు ఆ సంస్థ రంగం సిద్ధం చేసుకుంటోంది. అయిదేళ్ల తర్వాత విశాఖలో తొలిసారిగా ఏపీ ఐటీ అసోసియేషన్‌ ప్రతినిధులతో ముఖాముఖి సమావేశమైన లోకేశ్‌… ఐటీ రంగ సమస్యలను తెలుసుకుని, సత్వర పరిష్కారానికి ఆదేశాలు జారీచేశారు. రాష్ట్రానికి కొత్తగా వచ్చే ఐటీ, ఎలక్ట్రానిక్స్‌ కంపెనీల సులభంగా అనుమతులు, ప్రోత్సహకాలు ఇచ్చేందుకు ఏపీ ఎకనమిక్‌ డెవలప్‌మెంట్‌ బోర్డును పునరుద్దరించారు. రాష్ట్రంలో మారుమూల ప్రాంతాల్లో సైతం కమ్యూనికేషన్‌ వ్యవస్థను అందుబాటులోకి తెచ్చేందుకు మంత్రి పలు కీలక నిర్ణయాలు తీసుకున్నారు.

సీపీఐ శతాబ్ది ఉత్సవం కాన్పూర్‌లో ఆరంభం
అరుణ పతాకావిష్కరణతో వేడుకలు ప్రారంభించిన డి.రాజా

కాన్పూర్‌: భారత కమ్యూనిస్టు పార్టీ (సీపీఐ) శతాబ్ది ఉత్సవాలు యూపీలోని కాన్పూర్‌లో గురువారం ఘనంగా మొదలయ్యాయి. వందేళ్ల కిందట నిబద్ధతగల దేశభక్తుల వీరోచిత పోరాటాలతో డిసెంబరు 26న కాన్పూర్‌లో సీపీఐ ఆవిర్భవించింది కాబట్టి శతవార్షికోత్సవాన్ని కాన్పూర్‌ నుంచే అధికారికంగా ప్రారంభించారు. ప్రారంభ వేడుకను సీపీఐ ప్రధాన కార్యదర్శి డి.రాజా అరుణ పతాకాన్ని ఆవిష్కరించడం ద్వారా ప్రారంభించారు. సభలో సీపీఐ కార్యదర్శులు అమర్‌జిత్‌ కౌర్‌, గిరీశ్‌ శర్మ, ఉత్తరప్రదేశ్‌ రాష్ట్ర కార్యదర్శి అరవింద్‌ రాజ్‌ స్వరూప్‌ తదితర సీనియర్‌ నాయకులు ప్రసంగించారు. పార్టీ స్థాపన నాటి నుంచి నేటి వరకు జరిగిన ఉద్యమాలు, పోరాటాలను గుర్తుచేశారు. కమ్యూనిస్టుల విప్లవాత్మక చరిత్ర గురించి మాట్లాడారు. సీపీఐ ఎల్లప్పుడు ప్రజల పక్షాన నిలిస్తుందని నొక్కిచెప్పారు. కార్మికులు, కర్షకులు, అణగారిన వర్గాల తరపున నిర్విరామంగా పోరాడుతోందని వక్కాణించారు. నాటి బ్రిటిష్‌ వలసవాద దోపిడీ రాజ్యానికి వ్యతిరేకంగా నేటి మతవాద పరిపాలనకు వ్యతిరేకంగా సీపీఐ పోరాటం కొనసాగుతోందని నాయకులు తెలిపారు. మతతత్వ సంఘాల నుంచి సభ్యత్వాన్ని తిరస్కరించిన మొట్టమొదటి పార్టీ సీపీఐ అని ఉద్ఘాటించారు.
కమ్యూనిస్టులు నమ్మిన సిద్ధాంతాలతో ఎన్నడూ రాజీ పడలేదని, స్వాతంత్రం కోసం పోరాటంలో అగ్రభాగాన నిలిచారని, జైళ్లల్లో గడిపారని, తూటాలను లెక్క చేయకుండా వీరోచితంగా పోరాడారని వక్తలు అన్నారు. రాజా మాట్లాడుతూ ‘వందేళ్ల వారసత్వాన్ని కాపాడుకోవడం, దానిని ముందుకు తీసుకెళ్లడం మన బాధ్యత… కులంమతంతరగతి వైషమ్యాలు లేని సోషలిస్టు నవ భారతం కోసం పోరాటంలో ఘన పాత్ర పోషించడం మన కర్తవ్యం’ అని పిలుపునిచ్చారు. నాడు పూర్ణ స్వరాజ్‌ కోసం సీపీఐ చేసిన డిమాండ్‌కు మహాత్మాగాంధీ, జవహర్‌ లాల్‌ నెహ్రూ మద్దతిచ్చినట్లు రాజా గుర్తుచేశారు. రాజ్యాంగ సభ ఏర్పాటు కోసం మొదట్లో డిమాండ్‌ చేసినది కమ్యూనిస్టులేనని తెలిపారు. భూ సంస్కరణలు, హక్కులు, వెనుకబడిన వర్గాలకు పరిరక్షణ వంటి అంశాలపై రాజ్యాంగ సభలో జరిగిన చర్చల్లో కమ్యూనిస్టు ప్రభావం ఉండేదన్నారు. సామాజిక, ఆర్థిక న్యాయం కోసం కమ్యూనిస్టులు పోరాడుతున్నట్లు తెలిపారు. ఏఐటీయూసీ, ఏఐకేఎస్‌, ఏఐఎస్‌ఎఫ్‌, ప్రగతిశీల రచయితల సంఘం తదితర సంఘాల ద్వారా ప్రజలను క్రియాశీలం చేయడంలో కమ్యూనిస్టుల పాత్ర కీలకమన్నారు. స్వేచ్ఛ, సమానత్వం, సౌభ్రాతృత్వం, న్యాయం కోసం భారత కమ్యూనిస్టు పార్టీ కట్టుబడి ఉందని రాజా తెలిపారు. రాజ్యాంగ విలువల పరిరక్షణలో కమ్యూనిస్టులు కీలక పాత్ర పోషిస్తున్నారన్నారు. మతోన్మాదం, ఫాసిజం, ఆశ్రిత పెట్టుబడిదారీ వర్గం నుంచి ప్రజాస్వామ్యాన్ని కాపాడుకోవడం కోసం లెఫ్ట్‌ పోరాటం కొనసాగుతోందని రాజా వెల్లడిరచారు. సీపీఐ విప్లవ వారసత్వాన్ని ముందుకు తీసుకెళ్లాలని పార్టీ శ్రేణులకు ప్రధాన కార్యదర్శి పిలుపునిచ్చారు.

దిల్లీలో ఘనంగా సీపీఐ శతవార్షికోత్సవం

న్యూదిల్లీ: సీపీఐ వందేళ్ల చరిత్ర పోరాటాలు, ఉద్యమాలు, త్యాగాలతో కూడుకున్నది. స్వాతంత్య్రానికి ముందు నుంచి నేటి వరకు ప్రజల తరపున పోరాడుతూ నమ్మిన సిద్ధాంతాలకు కట్టుబడి ముందుకు సాగుతున్న భారత కమ్యూనిస్టు పార్టీ నూరు వసంతాల పండుగ చేసుకుంటోంది. ఈ సందర్భంగా దేశ రాజధాని దిల్లీలోని సీపీఐ కేంద్ర కార్యాలయం అజయ్‌ భవన్‌లో ఘనంగా వేడుక జరిగింది. సీపీఐ జాతీయ కార్యదర్శివర్గ సభ్యురాలు అనీరాజా అరుణ పతాకాన్ని ఆవిష్కరించారు. అమర వీరులు, విప్లవయోధులకు నివాళులర్పించడం ద్వారా కార్యక్రమాన్ని ప్రారంభించారు. పోరాటాలు, ఉద్యమాల ఘన చరిత్రగల సీపీఐ 100వ సంవత్సరంలోకి అడుగిడుతుండటంతో కేంద్ర కార్యాలయంలో ఘనంగా కార్యక్రమాన్ని నిర్వహించారు. పెద్ద సంఖ్యలో పార్టీ కార్యకర్తలు, నాయకులు, శ్రేయోభిలాషులు పాల్గొన్నారు. విప్లవ గీతాలతో, నినాదాలతో, నాటకాలతో సందడి చేశారు. అనీ రాజా మాట్లాడుతూ బ్రిటిష్‌ వలసవాద దోపిడీ రాజ్యంపై పోరాటంలో, స్వాతంత్య్రానికి ముందు, తర్వాత జరిగిన ఉద్యమాల్లో సీపీఐ చరిత్రాత్మక పాత్ర పోషించిందని గుర్తుచేశారు. రాజ్యాంగ వ్యవస్థకు, సమ్మిళిత`వైవిధ్య సామాజిక వ్యవస్థకు ముప్పు పొంచివున్న నేటి కాలంలో కార్మికులు, రైతులు, విద్యార్థులు, అణగారిన వర్గాల వారిని చైతన్యపర్చడంలో, వారిని ఏకతాటిపైకి తేవడంలో, ఉద్యమాలు నిర్మించడంలో సీపీఐ క్రియాశీలంగా వ్యవహరిస్తోందని అన్నారు. వందేళ్ల విప్లవ వారసత్వాన్ని ముందుకు తీసుకెళ్లాలని అనీరాజా పిలుపునిచ్చారు.
ప్రతి కామ్రేడ్‌కు రెడ్‌ సెల్యూట్‌: సురవరం
సీపీఐ శతాబ్ది ఉత్సవాన్ని పురస్కరించుకొని పార్టీలోని ప్రతి ఒక్క కామ్రేడ్‌కు తన తరపున రెడ్‌ సెల్యూట్‌ అంటూ పార్టీ మాజీ ప్రధాన కార్యదర్శి సురవరం సుధాకర్‌ రెడ్డి గురువారం ఓ సందేశం పంపారు. సీపీఐ విప్లవ స్ఫూర్తికి జేజేలు పలికారు. ఘన చరిత్రగల పార్టీతో ముడిపడటం గర్వకారణమన్నారు. స్వాతంత్య్ర పోరాటానికి ఊపిరి అందించిన విప్లవ స్ఫూర్తికి వందేళ్ల కిందటే చిహ్నంగా నిలిచిన పార్టీ సీపీఐ అని సురవరం కొనియాడారు. ప్రజాస్వామ్యబద్ధంగా జరిగిన ఎన్నికల ద్వారా అధికారంలోకి వచ్చిన ప్రపంచంలోనే మొట్టమొదటి కమ్యూనిస్టు పార్టీ సీపీఐ అని గుర్తుచేశారు. పరిపాలన ప్రమాణాలను నిర్దేశించిందని, హోం, వ్యవసాయ మంత్రిత్వశాఖల్లో విప్లవాత్మక విధానాలను తీసుకొచ్చి ఆదర్శంగా నిలిచిందని శ్లాఘించారు. అంతర్జాతీయ స్థాయి కమ్యూనిస్టు ఐక్య ఉద్యమాలకు బలమైన పునాదిని సీపీఐ వేయగలిగిందని తెలిపారు. శ్రామికుల పక్షాన బలమైన స్వరంగా మారిందని సురవరం అన్నారు.
‘నిస్వార్థ సేవలు అందించే ప్రతి ఒక్క సీపీఐ కార్యకర్తకు, సభ్యునికి రెడ్‌ సెల్యూట్‌. మెరుగైన ప్రపంచం సాధన కోసం అరుణ పతాక నీడలో శ్రామిక వర్గాన్ని నడిపించిన ప్రతి ఒక్కరికి రెడ్‌ సెల్యూట్‌. ఎర్ర జెండా ద్వారా ప్రజలను మేల్కొపేందుకు పోరాడుతూ ప్రాణాలు త్యజించిన ప్రతి అమరుడికి రెడ్‌ సెల్యూట్‌. నిర్బంధంలో గడిపిన… అజ్ఞాతంలోకి వెళ్లిన… వర్ణనాతీతమైన పరిస్థితులను, సమస్యలను ఎదుర్కొన్న ప్రతి కమ్యూనిస్టుకు రెడ్‌ సెల్యూట్‌’ అని సురవరం పేర్కొన్నారు. అరుణ పతాకాన్ని చేబూని విప్లవ వారసత్వాన్ని ముందుకు తీసుకెళదామని పిలుపునిచ్చారు. శతవార్షికోత్సవాన్ని పురస్కరించుకొని లెఫ్ట్‌ ఐక్యతకు మరోమారు సురవరం సుధాకర్‌ రెడ్డి పిలుపునిచ్చారు.

న్యూదిల్లీ: మాజీ ప్రధానమంత్రి, కాంగ్రెస్‌ సీనియర్‌ నేత మన్మోహన్‌ సింగ్‌ ఇక లేరు. నవ భారత రూపశిల్పి 92 ఏళ్ల వయస్సులో కన్నుమూశారు. దిల్లీలోని ఆల్‌ ఇండియా ఇనిస్టిట్యూట్‌ ఆఫ్‌ మెడికల్‌ సైన్సెస్‌(ఎయిమ్స్‌) ఆస్పత్రిలో చికిత్స పొందుతూ గురువారం రాత్రి తుది శ్వాస విడిచారు. వృద్ధాప్య సంబంధిత కారణాలతో ఆయన్ని కుటుంబీకులు ఆస్పత్రిలో చేర్చగా.. చికిత్స పొందుతూ ప్రాణాలు కోల్పోయారు. మన్మోహన్‌ సింగ్‌ మృతికి ప్రధాని మోదీతో సహా రాజకీయ ప్రముఖులందరూ నివాళులు అర్పించారు. భారతదేశానికి 14వ ప్రధానమంత్రిగా పని చేసిన డాక్టర్‌ మన్మోహన్‌ సింగ్‌.. దేశంలో ఆర్థిక సంస్కరణల రూపశిల్పిగా గుర్తింపు పొందారు. పీవీ నరసింహరావు కేబినెట్‌లో ఆర్థిక మంత్రిగా మన్మోహన్‌ సింగ్‌ పని చేశారు. ఆ సమయంలో దేశంలో ఆర్థిక సంస్కరణలు అమలు చేయడంలో మన్మోహన్‌ సింగ్‌ కీలక పాత్ర పోషించారు. ఇక 2004లో నాటి యూపీఏ ప్రభుత్వ హయాంలో మన్మోహన్‌ సింగ్‌ దేశ ప్రధానిగా బాధ్యతలు చేట్టారు. దాదాపు దశాబ్ద కాలంపాటు ఆయన ఆ పదవిలో కొనసాగారు. మే 22, 2004న ప్రధానమంత్రిగా ప్రమాణస్వీకారం చేసిన సింగ్‌… మే 26, 2014 వరకు వరుసగా రెండు పర్యాయాలు ఆ పదవిలో బాధ్యతలు చేపట్టారు. మొత్తం 3,656 రోజుల పాటు కాంగ్రెస్‌ నేతృత్వంలోని యునైటెడ్‌ ప్రోగ్రెసివ్‌ అలయన్స్‌(యూపీఏ) ప్రభుత్వానికి నాయకత్వం వహించి, అత్యధిక కాలం పనిచేసిన మూడో ప్రధానిగా నిలిచారు. కాంగ్రెస్‌ అగ్ర నాయకులు సోనియా గాంధీ, రాహుల్‌ గాంధీ, ప్రియాంక గాంధీ తదితరులు ఎయిమ్స్‌కు చేరుకున్నారు.