ఐరాస వేదికగా భారత్‌కు పాక్‌ వార్నింగ్‌.. సింధు జలాలపై షెహబాజ్‌ కీలక వ్యాఖ్యలు

ఐక్యరాజ్యసమితి సర్వసభ్య సమావేశం వేదికగా పాకిస్థాన్‌ ప్రధాని షెహబాజ్‌ షరీఫ్‌ మరోసారి భారత్‌పై తీవ్ర వ్యాఖ్యలు చేశారు. కశ్మీర్‌ వివాదానికి న్యాయమైన, సముచిత పరిష్కారం అవసరమని పేర్కొన్న ఆయన.. సింధు నది జలాల విషయంలోనూ భారత్‌ను హెచ్చరించారు. పాకిస్థాన్‌కు దక్కాల్సిన నీటిని నిలిపివేయడం, అడ్డుకోవడం లేదా మళ్లించే ఏ ప్రయత్నాన్నైనా యుద్ధ చర్యగా పరిగణిస్తామని స్పష్టం చేశారు. 81వ ఐరాస సర్వసభ్య సమావేశంలో సెప్టెంబర్‌ 25న షెహబాజ్‌ ఈ వ్యాఖ్యలు చేశారు. న్యూయార్క్‌లో జరిగిన 81వ ఐరాస సర్వసభ్య సమావేశంలో ప్రసంగించిన షెహబాజ్‌ షరీఫ్‌.. కశ్మీర్‌ ప్రజలు ఎనిమిది దశాబ్దాలుగా ఐక్యరాజ్యసమితి హామీ కోసం ఎదురుచూస్తున్నారని అన్నారు.

సముచిత పరిష్కారం అవసరం
ఐరాస ఆధ్వర్యంలో స్వేచ్ఛాయుత, నిష్పాక్షిక ప్రజాభిప్రాయ సేకరణ కోసం వారు ఎదురుచూస్తున్నారని పేర్కొన్నారు. కశ్మీర్‌లో తరతరాలుగా ప్రజలు అక్రమ ఆక్రమణ, ఏకపక్ష నిర్బంధాలు, న్యాయబద్ధత లేని హత్యలు, బలవంతపు అదృశ్యాలు, లైంగిక హింస, సామూహిక శిక్షలను ఎదుర్కొంటున్నారని ఆయన ఆరోపించారు. ఈ నేపథ్యంలో కశ్మీర్‌ వివాదానికి న్యాయమైన, సముచిత పరిష్కారం అవసరమని వ్యాఖ్యానించారు.

సింధు జలాలపై పాక్‌ ప్రధాని హెచ్చరిక
1960లో భారత్‌, పాకిస్థాన్‌ మధ్య కుదిరిన సింధు జలాల ఒప్పందాన్ని భారత్‌ ఏకపక్షంగా నిలిపివేయడం చట్టబద్ధత లేనిదని షెహబాజ్‌ ఆరోపించారు. సింధు నదీ వ్యవస్థకు చెందిన జలాలు పాకిస్థాన్‌తోపాటు మొత్తం ప్రాంతానికి జీవనాధారమని పేర్కొన్నారు. ఃనీటిని ఆయుధంగా మార్చకూడదు. నదులు దేశాలను పోషించాలి.. విభజించకూడదు. పాకిస్థాన్‌కు దక్కాల్సిన నీటిని ఆపడం, అడ్డుకోవడం లేదా మళ్లించే ఏ ప్రయత్నాన్నైనా యుద్ధ చర్యగా పరిగణిస్తాం. భారత్‌ ఈ విషయంలో ఎలాంటి పొరపాటు చేయకూడదుః అని షెహబాజ్‌ హెచ్చరించారు.

ఆపరేషన్‌ సిందూర్‌పైనా షెహబాజ్‌ వ్యాఖ్యలు
2025 మేలో భారత్‌-పాకిస్థాన్‌ మధ్య జరిగిన నాలుగు రోజుల సైనిక ఘర్షణను కూడా షెహబాజ్‌ తన ప్రసంగంలో ప్రస్తావించారు. ఆ సమయంలో అమెరికా అధ్యక్షుడు డొనాల్డ్‌ ట్రంప్‌ జోక్యం చేసుకున్నందుకు కృతజ్ఞతలు తెలిపారు. రెండు అణ్వాయుధ దేశాలు పూర్తిస్థాయి యుద్ధం అంచున ఉన్న సమయంలో ట్రంప్‌ జోక్యం కీలకంగా మారిందని అన్నారు. ఆయన జోక్యం లేకపోయి ఉంటే భారీ విధ్వంసం జరిగి ఉండేదని షెహబాజ్‌ వ్యాఖ్యానించారు. ఆపరేషన్‌ సిందూర్‌ నేపథ్యంలో భారత్‌ తమపై దాడికి దిగిందని షెహబాజ్‌ ఆరోపించారు. ఐక్యరాజ్యసమితి చార్టర్‌లోని ఆర్టికల్‌ 51 ప్రకారం ఆత్మరక్షణ హక్కును పాకిస్థాన్‌ వినియోగించుకుందని చెప్పారు. పాక్‌ సైన్యం ఫీల్డ్‌ మార్షల్‌ సయ్యద్‌ అసిమ్‌ మునీర్‌ నాయకత్వంలో భారత్‌ దాడిని తిప్పికొట్టిందని పేర్కొన్నారు.

పహల్గామ్‌ దాడి తర్వాత సింధు జలాల ఒప్పందం నిలిపివేత
అయితే, రెండు దేశాల మధ్య కాల్పుల విరమణకు మూడో పక్షం మధ్యవర్తిత్వం చేసిందన్న వాదనను భారత్‌ గతంలోనే ఖండించింది. ఇరు దేశాల మధ్య ప్రత్యక్ష కమ్యూనికేషన్‌ ద్వారానే కాల్పుల విరమణకు అంగీకారం కుదిరిందని న్యూఢిల్లీ స్పష్టం చేసింది. పహల్గామ్‌లో జరిగిన ఉగ్రదాడిలో 26 మంది మృతి చెందిన అనంతరం భారత్‌ ఆపరేషన్‌ సిందూర్‌ చేపట్టింది. ఆ తర్వాత భారత్‌-పాకిస్థాన్‌ మధ్య సైనిక ఉద్రిక్తతలు తీవ్ర స్థాయికి చేరాయి. భారత ప్రభుత్వం ప్రస్తుతం కూడా ఈ నిర్ణయం కొనసాగుతుందని చెబుతోంది. కశ్మీర్‌పై పాకిస్థాన్‌ చేస్తున్న వాదనలను భారత్‌ గతంలో పలుమార్లు తిరస్కరించింది. జమ్మూకశ్మీర్‌ భారత్‌లో అంతర్భాగమని, ఎప్పటికీ భారత్‌లో అంతర్భాగంగానే ఉంటుందని న్యూఢిల్లీ స్పష్టం చేస్తూ వచ్చింది.