వృత్తి విద్య‌లో నైపుణ్యం సాధించాలి

విద్యుత్ ఏఈ ఆంజినేయ శాస్త్రి
వృత్తి విద్యపై విద్యార్థులకు అవగాహన

విశాలాంధ్ర- ఆస్పరి (కర్నూలు జిల్లా) : విద్యార్థులు చదువుతోపాటు వృత్తి విద్య‌లో నైపుణ్య‌త సాధించాల‌ని విద్యుత్ సబ్ స్టేషన్ ఏఈ ఆంజినేయ శాస్త్రి, ప్రధానోపాధ్యాయురాలు విజయకుమారిలు అన్నారు. ఒకేషనల్ ఇండస్ట్రియల్ విజిట్ కార్యక్రమంలో భాగంగా శుక్రవారం స్థానిక జిల్లా పరిషత్ ఉన్నత పాఠశాల విద్యార్థులు 33/11 కే.వి ఉప విద్యుత్ సబ్ స్టేషన్ ను సందర్శించారు. ఈ సందర్భంగా విద్యుత్ సబ్ స్టేషన్ నుంచి విద్యుత్ ఎలా సరఫరా అవుతుందో, విద్యుత్తును ఎలా వినియోగించుకోవాలనే అంశాలతో పాటు విద్యుత్ సరఫరా అయ్యే వివిధ రకాల ట్రాన్స్ ఫార్మర్ల పరికరాల పనితీరు గురించి విద్యుత్ ఏఈ ఆంజినేయ శాస్త్రిని అడిగి తెలుసుకున్నారు. అనంతరం ఏఈ ఆంజినేయ శాస్త్రి మాట్లాడుతూ విద్యార్థులు చదువుతోపాటు తమకిష్టమైన ఇతర రంగాల్లో కూడా రాణించి ఉన్నత శిఖరాలకు చేరుకోవాలని, ప్రస్తుత ఆధునిక యుగంలో విద్యార్థులు సాంకేతికంగా మరియు వృత్తి విద్య లోనూ నైపుణ్యం ప్రదర్శించాలని అన్నారు. గ్రామీణ ప్రాంత విద్యార్థులు వృత్తి విద్య కోర్సుల ద్వారా త్వరగా ఉపాధి అవకాశాలు పొందవచ్చని పేర్కొన్నారు. ప్రతి విద్యార్థి సద్వినియోగం చేసుకోవాలని కోరారు. ఈ కార్యక్రమంలో వృత్తి విద్య ఉపాధ్యాయుడు శివకుమార్, రాజు మరియు ఉపాధ్యాయులు ఆనంద్, బాబు, విద్యు సబ్ స్టేషన్ ఆపరేటర్ మల్లికార్జున, విద్యార్థులు పాల్గొన్నారు.