గ్రంథాలయ ఉద్యమకారుల సేవలు మరువలేనివి…

గ్రంథాలయ అధికారిని అంజలి సౌభాగ్యవతి
విశాలాంధ్ర ధర్మవరం : గ్రంథాలయ ఉద్యమకారుల సేవలు మరువలేనివని గ్రంథాలయ అధికారిని అంజలి సౌభాగ్యవతి తెలిపారు. ఈ సందర్భంగా పట్టణంలోని బాబు జగ్జీవన్ రామ్ నగర్ లో గల ప్రధాన గ్రంథాలయ శాఖలో ఈ నెల 14వ తేదీ నుండి 20వ తేదీ వరకు గ్రంధాలయ వారోత్సవాల కార్యక్రమాన్ని వారు నిర్వహిస్తున్నారు. ఈ సందర్భంగా మూడవరోజు గ్రంథాలయ వారోత్సవాల ఉద్యమకారుల చిత్రపటానికి శంకర్ రెడ్డి, అంజలి సౌభాగ్యవతి, సిబ్బంది, పాఠకులు పూలువేసి ఘనంగా నివాళులర్పించారు. అనంతరం వారు మాట్లాడుతూ గ్రంథాలయ అభివృద్ధి కోసం అయ్యంకి వెంకట రమణయ్య, డాక్టర్ ఎస్సార్ రంగనాథ్, పాతూరి నాగభూషణం మొదలగువారు అహర్నిశలు కృషి చేశారని తెలిపారు. గ్రంథాలయ అభివృద్ధి వల్లనే స్వాతంత్ర ఉద్యమం సమగ్రంగా ముందుకు తీసుకుపోవడం జరిగిందని తెలిపారు. అనంతరం విద్యార్థులకు గ్రంధాలయాలు వాటి ప్రాముఖ్యత అన్న అంశంపై వ్యాసరచన పోటీలను గ్రంథాలయంలో వివిధ పాఠశాలల నుంచి 50 మందికి నిర్వహించారు. ఈ కార్యక్రమంలో అనిల్ కుమార్ శ్రీనివాసులు గ్రంథాలయ సిబ్బంది శివమ్మ, రమణ నాయక్, గంగాధర్,ఉపాధ్యాయులు, విద్యార్థులు పాఠకులు పాల్గొన్నారు.