హర్మూజ్ జలసంధిలో భారత నావికుల నౌకపై ఇరాన్ దాడి..

హర్మూజ్ జలసంధిలో భారత నావికులు ఎదుర్కొంటున్న ప్రమాదకర పరిస్థితులను కళ్లకు కడుతూ ఓ పాత వీడియో ఇప్పుడు మళ్లీ వెలుగులోకి వచ్చింది. 2026 ఏప్రిల్ 22న జరిగిన ఈ ఘటనలో, 21 మంది భారత సిబ్బందితో ప్రయాణిస్తున్న పనామా జెండాతో కూడిన ‘యూఫోరియా’ అనే కంటైనర్ నౌకపై ఇరాన్‌ ఇస్లామిక్ రివల్యూషనరీ గార్డ్ కార్ప్స్ (ఐఆర్‌జీసీ) దళాలు దాడి చేశాయి.ఈ వీడియోలో, ఐఆర్‌జీసీకి చెందిన చిన్న పడవలు సరుకు రవాణా నౌకను చుట్టుముట్టడం, రాకెట్ ప్రొపెల్డ్ గ్రెనేడ్‌తో దాడి చేయడం వంటి దృశ్యాలు రికార్డయ్యాయి. దాడి తీవ్రమవడంతో, ప్రాణభయంతో భారత నావికులు నౌకలోని సన్నని మార్గాల్లో (అల్లేవేస్) తలదాచుకోవడం కనిపించింది. ఫార్వర్డ్ సీమెన్స్ యూనియన్ ఆఫ్ ఇండియా ఈ ఫుటేజీని విడుదల చేస్తూ “దాడి చేసింది సముద్రపు దొంగలు కాదు, ఐఆర్‌జీసీకి చెందిన నౌకాదళ బలగాలు” అని స్పష్టం చేసింది. అదృష్టవశాత్తూ, ఈ ఘటనలో సిబ్బంది ఎవరికీ ఎలాంటి హాని జరగలేదని, వారంతా సురక్షితంగా ఉన్నారని భారత షిప్పింగ్ మంత్రిత్వ శాఖ ఆ తర్వాత ధ్రువీకరించింది.2026 ఫిబ్రవరిలో ఇరాన్‌తో అమెరికా-ఇజ్రాయెల్ వివాదం మొదలైనప్పటి నుంచి ఈ ప్రాంతంలో ఉద్రిక్తతలు పెరిగాయి. ప్రపంచంలోనే అత్యంత కీలకమైన ఈ నౌకాయాన మార్గంలో ఇటు ఇరాన్, అటు అమెరికా బలగాలు వాణిజ్య నౌకలపై తరచూ దాడులకు పాల్పడుతున్నాయి. ఐక్యరాజ్యసమితి అంచనాల ప్రకారం, ఈ ఘర్షణలు మొదలైనప్పటి నుంచి జరిగిన దాడుల్లో సుమారు 15 మంది నావికులు ప్రాణాలు కోల్పోగా, వీరిలో చాలామంది భారతీయులే ఉన్నారు.ప్రపంచ నావికుల్లో 12 శాతం మంది భారతీయులే ఉన్న నేపథ్యంలో, వారి భద్రతపై భారత్ తీవ్ర ఆందోళన వ్యక్తం చేస్తూ ఇరాన్, అమెరికాల వద్ద తన నిరసనను వ్యక్తం చేసింది. తాజాగా వెలుగులోకి వచ్చిన ఈ పాత వీడియో, ఆ ప్రాంతంలో భారత నావికులు ఎదుర్కొంటున్న ముప్పును మరోసారి గుర్తుచేస్తోంది.