రాష్ట్ర వ్యాప్తంగా భారీ ప్రదర్శనలు, ధర్నాలు

గ్రామాల్లో 3, పట్టణాల్లో 2 సెంట్లు ఇవ్వాలి
నిర్మాణ సామాగ్రి ధరలు దృష్ట్యా రూ.5 లక్షలకు పెంచాలి
సీపీఐ, వ్య.కా.సం అధ్వర్యాన సామూహిక అర్జీలు సమర్పించిన పేదలు
జనంతో పోటెత్తిన గ్రామ… వార్డు సచివాలయాలు

విశాలాంధ్ర బ్యూరో` అమరావతి: పేదలకు పట్టణాల్లో రెండు సెంట్లు, గ్రామాల్లో మూడు సెంట్ల చొప్పున ఇళ్ల స్థలాలు కేటాయించి, ఇంటి నిర్మాణానికి రూ.5 లక్షల చొప్పున మంజూరు చేయాలని కోరుతూ సీపీఐ, ఆంధ్రప్రదేశ్‌ వ్యవసాయ కార్మిక సంఘం పిలుపుమేరకు సోమవారం రాష్ట్రవ్యాప్తంగా చేపట్టిన అర్జీల సమర్పణ కార్యక్రమానికి ప్రజల నుంచి అనూహ్య స్పందన లభించింది. రాజకీయపార్టీల కతీతంగా పేదలు, బడుగు బలహీన, మధ్యతరగతి వర్గాలు పెద్దసంఖ్యలో కదలివచ్చారు. గ్రామ/వార్డు సచివాలయాలు వేలాదిమంది అర్జీదారులతో పోటెత్తాయి. ఎన్నికల హామీని అమలు చేయాలని డిమాండ్‌ చేస్తూ కలెక్టరేట్‌లు ధర్నాలతో దద్దరిల్లాయి. భారీ ప్రదర్శనలతో రహదారులు కిక్కిరిశాయి. గత ప్రభుత్వం ఇచ్చిన సెంటు స్థలం నివాసానికి ఏమాత్రం సరిపోదని, ఆ లబ్ధిదారులందరికీ కూటమి ప్రభుత్వం గతంలో వేసిన లే ఔట్లను మార్పు చేసి పట్టణాల్లో రెండు సెంట్లు, గ్రామాల్లో మూడు సెంట్లు చొప్పున ఇవ్వాలని సీపీఐ, వ్యవయసాయ కార్మిక సంఘాల నేతలు డిమాండ్‌ చేశారు. ఇంటి నిర్మాణానికి అవసరమైన సిమెంట్‌, ఇనుము, ఇటుక, కంకర, ఇసుక తదితర ముడిసామాగ్రి ధరలు పెరిగినందున కూటమి ప్రభుత్వం ప్రకటించిన రూ.4 లక్షలకు అదనంగా మరో లక్ష కలిపి రూ.5 లక్షలు మంజూరు చేయాలని కోరారు.
నివాసయోగ్యమైన భూములివ్వాలి: ముప్పాళ్ల
అర్హులైన పేదలందరికీ నివాసయోగ్య మైన ఇంటి స్థలాలు ఇవ్వాలని సీపీఐ రాష్ట్ర సహాయ కార్యదర్శి ముప్పాళ్ల నాగేశ్వరరావు రాష్ట్ర ప్రభుత్వాన్ని డిమాండ్‌ చేశారు. మంగళగిరిలోని ద్వారకా నగర పరిసర ప్రాంతాల్లోని పేదలందరూ స్థానిక సచివాలయంలో అర్జీలు అందజేశారు. ఈ కార్యక్రమంలో పాల్గొన్న ముప్పాళ్ల మాట్లాడుతూ కూటమి ప్రభుత్వం తన హామీ నిలబెట్టుకోవాలని కోరారు. జగన్‌ కొండల్లో, వాగుల్లో, పల్లపు ప్రాంతాల్లో ఇళ్ల నిర్మాణానికి ప్రయత్నించారని, అక్కడ నీరు, రోడ్డు తదితర సదుపాయాలు లేకపోవడంతో ప్రజలు ఎన్నో ఇబ్బందులు పడుతున్నారని ఆందోళన వ్యక్తం చేశారు. గత ప్రభుత్వం మాదిరిగా ఈ ప్రభుత్వం పొరపాట్లు చేయవద్దని ముప్పాళ్ల విజ్ఞప్తి చేశారు. సీపీఐ మంగళగిరి మండల కార్యదర్శి జాలాది జాన్‌బాబు, పట్టణ సహాయ కార్యదర్శి నందం బ్రహ్మేశ్వరరావు తదితరులు పాల్గొన్నారు.
పేదల నివాసకల్పనకు ఎందాకైనా పోరాడతాం: జల్లి విల్సన్‌
రాష్ట్రంలో అర్హులైన పేదలందరికీ నివాస సౌకర్యం కల్పించేందుకు ఎందాకైనా పోరాడుతామని సీపీఐ రాష్ట్ర కార్యదర్శివర్గ సభ్యులు, ఆంధ్రప్రదేశ్‌ వ్యవసాయ కార్మిక సంఘం రాష్ట్ర గౌరవాధ్యక్షులు జల్లి విల్సన్‌ స్పష్టం చేశారు. చీరాల నియోజకవర్గంలోని ఓడరేవు, దేవాంగపూరి కాలనీల్లో జల్లి విల్సన్‌ స్థానిక నాయకులతో కలిసి సచివాలయూల వద్ద లబ్ధిదారులతో అర్జీలు అందజేశారు. ఈ సందర్భంగా విల్సన్‌ మాట్లాడుతూ ఎన్నికల ముందు ఇచ్చిన హామీ అమలు చేస్తానని ముఖ్యమంత్రి చంద్రబాబు చెప్పడం శుభపరిణామ మన్నారు. అర్హులకు నివాసయోగ్యంగా ఉండే స్థలాలు గుర్తించి గృహనిర్మాణ సామాగ్రి ధరలు పెరిగిన నేపథ్యంలో రూ.5 లక్షలు మంజూరు చేయాలని కోరారు. ఈ కార్యక్రమంలో సీపీఐ జిల్లా కౌన్సిల్‌ సభ్యులు బత్తుల శామ్యూల్‌, చీరాల నియోజకవర్గ సీపీఐ కార్యదర్శి చిరమల ప్రకాశ్‌, తదితరులు పాల్గొన్నారు. అద్దంకి నియోజకవర్గంలో సీపీఐ బాపట్ల జిల్లా కార్యదర్శి తన్నీరు సింగనకొండ అధ్వర్యంలో గ్రామసచివాలయాల్లో అర్జీలు సమర్పించారు.
ఇంటి నిర్మాణానికి రూ.5 లక్షలివ్వాలి: అక్కినేని వనజ
ఇంటి నిర్మాణ సామాగ్రి ధరలు గణనీయంగా పెరిగినందున ప్రభుత్వం ఇస్తానన్న రూ.4 లక్షలను రూ.5 లక్షలకు పెంపు చేయాలని సీపీఐ జాతీయ కార్యవర్గ సభ్యురాలు అక్కినేని వనజ ప్రభుత్వాన్ని డిమాండ్‌ చేశారు. చింతలపూడి మండలం ఎర్రగుంటపల్లి సచివాలయంలో ఇళ్ల స్థలాల అర్జీల కార్యక్రమంలో ఆమె పాల్గొన్నారు. కూటమి ప్రభుత్వం ఎన్నికల్లో వాగ్దానం చేసిన విధంగా పట్టణాల్లో రెండు సెంట్లు, గ్రామీణ ప్రాంతంలో మూడు సెంట్లు ఇంటి స్థలం కేటాయించాలని వనజ కోరారు. అర్జీల సమర్పణ కార్యక్రమంలో సీపీఐ ఏలూరు జిల్లా కార్యదర్శి మన్నవ కృష్ణ చైతన్య, మండల కార్యదర్శి కంచర్ల గురవయ్య, సహాయ కార్యదర్శి పుల్లూరి సోమశేఖర్‌ తదితరులు పాల్గొన్నారు. జిల్లావ్యాప్తంగా వివిధ సచివాలయాల్లో పేదలు అర్జీలు సమర్పించారు.
కర్నూలు కలెక్టరేట్‌ కిటకిట…
ఎన్నికల సమయంలో పేదలకు నివాసస్థలం ఇస్తానన్న హామీని ప్రభుత్వం నిలుపుకోవాలని సీపీఐ రాష్ట్రకార్యదర్శి వర్గ సభ్యులు పి.రామచంద్రయ్య, జిల్లా కార్యదర్శి బి .గిడ్డయ్య ప్రభుత్వాన్ని డిమాండ్‌ చేశారు. సీపీఐ నగర కార్యదర్శి పి.రామకృష్ణారెడ్డి అధ్యక్షతన కలెక్టరేట్‌ ఎదుట ధర్నా నిర్వహించారు. తొలుత సీఆర్‌ భవన్‌ నుండి కలెక్టరేట్‌ వరకు వేలాది మంది పేదలు, సీపీఐ ప్రజాసంఘాల నాయకులతో భారీ ర్యాలీ నిర్వహించారు. దీంతో కర్నూలు రహదారులు కిలోమీటర్ల పొడవునా అర్జీదారులతో కిటకిటలాడాయి. మహిళలు, చంటిపిల్లలతో పెద్దఎత్తున తరలిరావడంతో కలెక్టరేట్‌ కిక్కిరిసిపోయింది. ఏపీ రైతుసంఘం రాష్ట్ర కార్యదర్శి కె జగన్నాధం, ఏఐవైఎఫ్‌ రాష్ట్ర ప్రధాన కార్యదర్శి ఎన్‌.లెనిన్‌బాబు, ఎస్‌.మునెప్ప తదితరులు పాల్గొన్నారు. జిల్లావ్యాప్తంగా 200కు పైగా సచివాలయాల్లో అర్జీలు అందజేశారు.
పేదలందరికీ ఇళ్లస్థలాలు:
సీహెచ్‌ కోటేశ్వరరావు
అర్హులైన పేదలందరికీ ఇళ్ల స్థలాలు ఇవ్వాలని ఆంధ్రప్రదేశ్‌ వ్యవసాయ కార్మిక సంఘం రాష్ట్ర అధ్యక్షుడు సీహెచ్‌ కోటేశ్వరరావు డిమాండ్‌ చేశారు. విజయవాడ రూరల్‌ మండలం కొత్తూరు తాడేపల్లి గ్రామ సచివాలయం వద్ద అర్జీలు అందజేశారు. ఇళ్ల స్థలాల కోసం అర్జీలతో పేదలు పెద్దసంఖ్యలో తరలివచ్చారు. వ్యవసాయ కార్మిక సంఘం ఎన్టీఆర్‌ జిల్లా అధ్యక్షుడు ఉప్పే నరసింహారావు, మండల, జిల్లా నాయకులు ముఖ్య దేశాయ, లావూరు తిరుపతమ్మ తదితరులు పాల్గొన్నారు.
పేదల సొంతింటి కల సాకారం
చేయాలి: జంగాల
కూటమి ప్రభుత్వం ఇచ్చిన ఎన్నికల హామీ మేరకు పేదల సొంతింటి కల సాకారం చేయాలని సీపీఐ రాష్ట్రకార్యదర్శివర్గసభ్యులు జంగాల అజయ్‌కుమార్‌ డిమాండ్‌ చేశారు. గుంటూరు జిల్లాలో చేపట్టిన అర్జీలు అందజేసే కార్యక్రమానికి విశేష స్పందన వచ్చింది. జిల్లావ్యాప్తంగా సచివాలయాల్లో అర్జీలు అందజేసేందుకు లబ్ధిదారులు కదిలివచ్చారు. గుంటూరు నగరంలోని 8వ డివిజన్‌ సచివాలయం వద్ద జంగాల అజయ్‌కుమార్‌, ఇతర సచివాలయాలలో నగర కార్యదర్శి కోట మాల్యాద్రి పాల్గొన్నారు. పొన్నూరు, తాడికొండ, ప్రత్తిపాడు నియోజకవర్గాలలోని 36 సచివాలయాల్లో మొదటి రోజు అర్జీలు అందజేశారు.
ఎన్నికల హామీ వెంటనే
అమలు చేయాలి: కేవీవీ ప్రసాద్‌
కూటమి ప్రభుత్వం తన ఎన్నికల హామీ వెంటనే అమలుకు చర్యలు తీసుకోవాలని సీపీఐ రాష్ట్ర కార్యదర్శి సభ్యులు కేవీవీ ప్రసాద్‌ డిమాండ్‌ చేశారు. గన్నవరం మండలం గొల్లనపల్లి గ్రామ సచివాలయం కార్యదర్శికి ఇళ్లస్థలాల అర్జీలు అందజేశారు. వ్యవసాయ కార్మిక సంఘం కార్యదర్శి కట్టవరపు విజయరావు, సీపీఐ సహాయ కార్యదర్శి చాగంటిపాటి వెంకటేశ్వరవు, గొంది శోభనా చలపతిరావు, వెంగళ్ల శివయ్య, తాటి శివరామకృష్ణ తదితరులు పాల్గొన్నారు.
ప్రచార ఆర్భాటంగా
మార్చవద్దు: డేగా ప్రభాకర్‌
పేదలకు ఇస్తానన్న ఇంటిస్థలం హామీ గత ప్రభుత్వం వలే ప్రచార ఆర్భాటంగా మార్చవద్దని, తక్షణమే అమలుకు చర్యలు తీసుకోవాలని సీపీఐ రాష్ట్రకార్యదర్శివర్గసభ్యులు డేగా ప్రభాకర్‌ డిమాండ్‌ చేశారు. సీపీఐ16వ డివిజన్‌ అరుంధతి పేట సచివాలయం వద్ద ఇళ్ల స్థలాల లబ్ధిదారులతో కలసి డివిజన్‌ కార్యదర్శి కొల్లూరి సుధారాణి అధ్వర్యంలో ధర్నా చేపట్టారు. సీపీఐ ఏలూరు ఏరియా సమితి కార్యదర్శి ఉప్పులూరి హేమ శంకర్‌, ఏలూరు ఏరియా సమితి సహాయ కార్యదర్శి కురెళ్ల వరప్రసాద్‌ తదితరులు పాల్గొన్నారు.
డోన్‌లో జరిగిన కార్యక్రమంలో సీపీఐ రాష్ట్ర కార్యవర్గసభ్యులు కె.రామాంజనేయులు, కోడుమూరులో ఏపీ వ్యవసాయ కార్మిక సంఘం రాష్ట్ర ప్రధాన కార్యదర్శి ఆవుల శేఖర్‌, విశాఖలో ఎం.పైడిరాజు, సత్యసాయి జిల్లా బత్తలపల్లిలో సీపీఐ జిల్లా కార్యదర్శి మీసాల మేమయ్య యాదవ్‌, అనంతపురం జిల్లా సోమలదొడ్డి గ్రామ సచివాలయం వద్ద జిల్లా సీపీఐ కార్యదర్శి సి.జాఫర్‌ తదితరులు పాల్గొన్నారు.

. పరస్పర విమర్శలతో హోరెత్తిన మండలి
. వైసీపీ సభ్యులపై హోంమంత్రి ఆగ్రహం
. మంత్రి తీరుకు నిరసనగా వైసీపీ వాకౌట్‌

విశాలాంధ్ర బ్యూరో – అమరావతి : రాష్ట్రంలో మహిళలు, చిన్నారులపై సాగుతున్న అత్యాచారాలు, హత్యల అంశంపై శాసనమండలి దద్దరిల్లింది. మండలిలో సోమవారం ప్రశ్నోత్తరాల సమయంలో దీనిపై అధికార కూటమి, ప్రతిపక్ష వైసీపీ సభ్యులు పరస్పర విమర్శల దాడికి దిగారు. మంత్రులు జవాబులిచ్చే సమయంలో వైసీపీ సభ్యులు అడ్డు తగులుతూ… ఉప ప్రశ్నలు వేశారు. అలాగే వైసీపీ సభ్యులు మాట్లాడుతున్న ప్పుడు కూటమి సభ్యులు అడ్డుతగిలారు. హోంమంత్రి అడిగిన ప్రశ్నలకు సమా ధానాలు ఇవ్వకుండా గత ప్రభుత్వంపై విమర్శలు చేస్తూ రాజకీయ ఉపన్యాసం చేస్తున్నారని వైసీపీ అభ్యంతరం తెలిపింది. తొలుత మహిళలు, చిన్నారులపై అఘాయిత్యాలు అంశంపై వైసీపీ సభ్యులు వరుదు కల్యాణి, టి.కల్పలత, చంద్రగిరి ఏసురత్నం ప్రశ్నలు అడిగారు. రాష్ట్రంలో శాంతిభద్రతలు లేవని, మహిళలు, ఆడ బిడ్డలకు రక్షణ లేకుండా పోయిందని విమర్శించారు. దిశ చట్టాన్ని, యాప్‌ను నిర్వీర్యం చేయడంపై ప్రభుత్వం నుంచి వివరణ కోరారు.
మహిళల భద్రతకు ప్రాధాన్యత: హోంమంత్రి అనిత
ఈ సందర్భంగా హోంమంత్రి వంగలపూడి అనిత మాట్లాడుతూ… మహిళల భద్రతకు రాష్ట్ర ప్రభుత్వం అత్యంత ప్రాధాన్యతనిస్తుందన్నారు. మహిళల పట్ల అసభ్యకరంగా ప్రవర్తించిన వారిని అరెస్టు చేస్తున్నామని చెప్పారు. గత ప్రభుత్వంతో పోలిస్తే తమ హయాంలో క్రైమ్‌ రేటు తగ్గిందని, అత్యాచార ఘటన లను రాజకీయ చేయొద్దని సూచించారు. నిర్భయ చట్టాన్ని పక్కన పెట్టి గత ప్రభు త్వంలో దిశ చట్టం తెచ్చారని, మహిళలపై అత్యాచారాలు జరిగినా పట్టించుకోలేదని, ముచ్చుమర్రి ఘటనలో బాలిక మృతదేహాన్ని గుర్తించడానికి సమయం పట్టిందన్నారు. గతంలో మహిళలపై అత్యాచారాలు జరిగితే జగన్‌ ప్రభుత్వం పట్టించుకోలేదని, పరామర్శకు వెళ్లిన మాపైనే కేసులు పెట్టారని అనిత ఆగ్రహం వ్యక్తం చేశారు. దిశ చట్టం గురించి గొప్పగా చెబుతున్నారని, అసలు దిశ చట్టం ఉందా.? గంజాయిపై ఐదేళ్లలో ఒక్క సమీక్ష అయినా చేశారా ?, అంటూ వైసీపీ సభ్యులను ప్రశ్నించారు. జగన్‌ తల్లి, చెల్లికి అన్యాయం జరిగినా అండగా ఉంటామని ఆమె వ్యాఖ్యానించడంతో ఒక్కసారిగా వైసీపీ సభ్యులు తమ సీట్లలో నుంచి లేచి…నినాదాలు చేయడంతో గందరగోళం నెలకొంది. అనంతరం ప్రతిపక్ష నేత బొత్స సత్యనారాయణ మాట్లాడుతూ, బాధ్యతాయుత హోంమంత్రి అనిత సమాధానంపై అసంతృప్తి వ్యక్తం చేశారు. శాంతిభద్రతల విషయంలో ప్రభుత్వం ఘోరంగా విఫలమైందని డిప్యూటీ సీఎం పవన్‌ కల్యాణ్‌ చెప్పిన వ్యాఖ్యలను గుర్తుచేశారు. తమ సభ్యులు అడిగిన ప్రశ్నకు హోం మంత్రి స్పష్టంగా సమాధానం ఇవ్వని కారణంగా… ఆ ప్రశ్న వరకు సభ్యులు వాకౌట్‌ చేశారు. యనమల రామకృష్ణుడు మాట్లాడుతూ మంత్రి మాటలను బొత్స వక్రీకరించారన్నారు. అనంతరం కర్నూలుజిల్లాలో కృష్ణానదిపై వంతెన నిర్మాణ అంశంపై సభ్యులు భూమిరెడ్డి రామగోపాల్‌రెడ్డి, తిరుమల నాయుడు అడిగిన ప్రశ్నలకు జలవనరులశాఖ మంత్రి నిమ్మల రామానాయుడు లేదని బదులిచ్చారు. అంగన్‌వాడీ భవనాలు, బాలల సంజీవని పథకం అంశాలపై సభ్యులు వంకా రవీంద్రకుమార్‌, టి.కల్పలత అడిగిన ప్రశ్నలకు మహిళా శిశు సంక్షేమశాఖ మంత్రి గుమ్మడి సంధ్యారాణి సమాధానమిచ్చారు. ప్రస్తుతం రాష్ట్రంలో 4,977 అంగన్‌వాడీ కేంద్రాలు నిర్మాణంలో ఉన్నాయని, జనవరి, 2024 నుంచి ఇప్పటి వరకు రూ.32.64 కోట్లను ప్రభుత్వం విడుదల చేసిందన్నారు. మూత్రశాలలు లేకుండా 2,941 అద్దె భవనాలున్నాయని, సాధ్యమైన చోట్ల మరుగు దొడ్ల నిర్మాణాన్ని చేపడుతున్నామని, అన్ని వసతులున్న వేరే భవనాలకు వాటిని మార్చుతున్నట్లు వివరించారు. గర్భిణులు, బాలింతలకు పౌష్ఠికాహారం అందించేందుకు ప్రభుత్వం చర్యలు తీసుకుంటోందన్నారు. గృహ విద్యుత్‌ వినియోదారులపై అదనపు భారం అంశంపై సభ్యులు దువ్వారపు రామారావు, భూమిరెడ్డి రామ్‌గోపాల్‌రెడ్డి అడిగిన ప్రశ్నలకు ఇంధనశాఖ మంత్రి గొట్టిపాటి రవికుమార్‌ వివరణ ఇచ్చారు. 2019` 2024 మధ్య కాలంలో గృహ వినియోగదారులపై టారిఫ్‌ నిమిత్తం మొత్తం రూ.1769.92 కోట్ల అదనపు భారం ఉందని, దాంతోపాటు ట్రూ ఆప్‌ ఎఫ్‌పీసీఏ చార్జీల నిమిత్తం రూ.5,851.82 కోట్లను విధించారన్నారు. ఇమామ్‌, మౌజమ్‌లకు గౌరవ వేతనంపై సభ్యులు ఇసాక్‌ బాషా, మహ్మద్‌ రుహుల్లా అడిగిన ప్రశ్నలకు మైనార్టీశాఖ మంత్రి ఫరూక్‌ అబ్దులా సమాధానమిస్తూ, ఇమామ్‌, మౌజమ్‌ లకు గౌరవ వేతనాన్ని పెంచేందుకు ప్రభుత్వం వద్ద ప్రతిపాదన ఉందన్నారు. కాగా వైసీపీ సభ్యులు తమ ప్రశ్నలకు సరిగ్గా సమాధానం ఇవ్వలేదని నిరసనకు దిగారు. దీంతో రాత పూర్వకంగా పంపాలని మంత్రికి చైర్మన్‌ సూచించారు. జాబ్‌ క్యాలెండర్‌, కార్పొరేషన్లు, ప్రభుత్వ శాఖల నుండి నిధుల మళ్లింపు, రాష్ట్రంలో పారిశ్రామిక ప్రమాదాలు, రాష్ట్రంలో వయోజన విద్యా కేంద్రాలు అనే నాలుగు ప్రశ్నలకు ప్రభుత్వం సమాధానం చెప్పినట్లుగా శాసన మండలి చైర్మన్‌ ప్రకటించారు. అసెంబ్లీలో ఆమోదం పొందిన అనేక బిల్లులను మండలి ఆమోదించినట్లు వెల్లడిరచారు. ఏపీ ప్రభుత్వ ఉద్యోగుల పదవీ విరమణ సవరణ బిల్లు, ఏపీ విద్యుత్‌ రెండో సవరణ బిల్లు, ద్రవ్య వినిమయ తాత్కాలిక బిల్లులకు కౌన్సిల్‌ ఆమోదం తెలిపిందన్నారు. అనంతరం శాసనమండలిని మంగళవారం ఉదయం 10 గంటలకు వాయిదా వేశారు.

. రెండు వారాల్లో తెలియజేయండి
. రాష్ట్రపతిని కోరిన సుప్రీం

న్యూదిల్లీ: పంజాబ్‌ మాజీ ముఖ్యమంత్రి బియాంత్‌ సింగ్‌ హత్య కేసులో మరణశిక్ష పడిన బల్వంత్‌ సింగ్‌ రాజోనా క్షమాభిక్ష అంశంపై సుప్రీంకోర్టు కీలక ఉత్తర్వులు వెలువరించింది. అతడి పిటిషన్‌ను రాష్ట్రపతి ద్రౌపదీ ముర్ము దృష్టికి తీసుకెళ్లాలని ఆమె కార్యదర్శిని ఆదేశించింది. దీనిపై రెండు వారాల్లోగా నిర్ణయం తెలియజేయాలని సుప్రీం ధర్మాసనం రాష్ట్రపతిని అభ్యర్థించింది. అనంతరం దీనిపై తదుపరి విచారణను డిసెంబరు 3వ తేదీకి వాయిదా వేసింది. సిక్కులకు ప్రత్యేక రాష్ట్రాన్ని కోరుతూ జరుగుతున్న ఆందోళనల్లో భాగంగా 1995లో చండీగఢ్‌ సచివాలయం ముందు జరిగిన పేలుడులో అప్పటి పంజాబ్‌ ముఖ్యమంత్రి బియాంత్‌ సింగ్‌తో పాటు మరో 16 మంది మరణించారు. ఈ పేలుడులో కానిస్టేబుల్‌గా పనిచేస్తున్న బల్వంత్‌ సింగ్‌ రాజోనా ప్రమేయం ఉన్నట్లు రుజువు కావడంతో 2007లో అతడికి ప్రత్యేక న్యాయస్థానం మరణశిక్ష విధించింది. రెండు దశాబ్దాలకు పైగా రాజోనా జైలు శిక్ష అనుభవిస్తున్నాడు. తనకు క్షమాభిక్ష ప్రసాదించాలని కోరుతూ 2012లో రాజోనా కేంద్రాన్ని ఆశ్రయించాడు. అప్పటినుంచి అతడి పిటిషన్‌ పెండిరగ్‌లోనే ఉంది. తన మరణశిక్షను జీవితఖైదుకు తగ్గించాలని కోరుతూ 2020లో రాజోనా సుప్రీంకోర్టులో పిటిషన్‌ దాఖలు చేశాడు. దీనిపై విచారణ జరిపిన అత్యున్నత న్యాయస్థానం… మరణశిక్షను జీవితఖైదుగా మార్చలేమని గతేడాది మే నెలలో తేల్చిచెప్పింది. అయితే, అతడి క్షమాభిక్ష పిటిషన్‌పై నిర్ణయం తీసుకోవాలని కేంద్ర హోంశాఖను ఆదేశించింది.

మహారాష్ట్ర, జార్ఖండ్‌లో ఎన్నికలకు అంతా సిద్ధం

ముంబై/రాంచీ: మహారాష్ట్ర, జార్ఖండ్‌లో అసెంబ్లీ ఎన్నికల ప్రచారం సోమవారం సాయంత్రం ముగిసింది. నవంబరు 20న మహారాష్ట్రలో మొత్తం 288 స్థానాలకు ఒకే విడతలో ఎన్నికలు జరగనున్నాయి. అదే రోజు జార్ఖండ్‌లో రెండో విడతలో 38 స్థానాలకు పోలింగ్‌ నిర్వహణకు ఎన్నికల సంఘం ఏర్పాట్లు చేస్తోంది. మహారాష్ట్రలో నవంబరు 20న ఒకే విడతలో పోలింగ్‌ జరగనుంది. 288 స్థానాలకుగాను మొత్తం 4,136 మంది పోటీ చేస్తున్నారు. వీరిలో 2,086 మంది స్వతంత్ర అభ్యర్థులు ఉన్నారు. మహారాష్ట్రలో 9,63,69,410 మంది నమోదిత ఓటర్లు ఉన్నారు. అందుకే 1,00,186 పోలింగ్‌ బూత్‌లను కేంద్ర ఎన్నికల సంఘం ఏర్పాటు చేసింది. దాదాపు 6 లక్షల ప్రభుత్వ ఉద్యోగులు ఎన్నికల విధుల్లో పాల్గొంటున్నట్లు ఈసీ తెలిపింది. లోక్‌సభ ఎన్నికల్లో మహాయుతి కూటమికి ఎదురు దెబ్బ తగలడం… ఎంవీఏ కూటమి పుంజుకున్న నేపథ్యంలో మహారాష్ట్రలో అధికార, విపక్ష కూటములు ఈసారి హోరాహోరీగా తలపడుతున్నాయి. అధికార కూటమి మహాయుతిలో భాగమైన బీజేపీ 149 స్థానాల్లో అభ్యర్థులను నిలిపింది. ముఖ్యమంత్రి ఏక్‌నాథ్‌ షిండే నేతృత్వంలోని శివసేన 81 మందిని బరిలోకి దింపింది. ఉపముఖ్యమంత్రి అజిత్‌ పవార్‌ ఆధ్వర్యంలోని ఎన్సీపీ 59 మంది అభ్యర్థులను పోటీకి నెలబెట్టింది. విపక్ష కూటమి మహావికాస్‌ అఘాడీ (ఎంవీఏ) లో కాంగ్రెస్‌, ఉద్ధవ్‌ ఠాక్రే శివసేన (యూబీటీ) శరద్‌ పవార్‌కు చెందిన ఎన్సీపీ (ఎస్పీ) ఉన్నాయి. కాంగ్రెస్‌ 101 మంది అభ్యర్థులను బరిలో నిలపగా… శివసేన (యూబీటీ)95 మందిని, ఎన్సీపీ (ఎస్పీ) 86 మందిని పోటీకి దించింది. సీట్ల సర్దుబాటు కుదరని కొన్ని స్థానాల్లో కూటమి పక్షాలు స్నేహపూర్వక పోటీ చేస్తున్నాయి. బీఎస్పీ 237 మంది అభ్యర్థులను నిలపగా, ఎంఐఎం కూడా తమకు పట్టుందని భావిస్తున్న 17 చోట్ల అభ్యర్థులను పోటీకి దింపింది.
జార్ఖండ్‌లో…
జార్ఖండ్‌లోని 38 నియోజకవర్గాల్లో వవంబరు 20న పోలింగ్‌ జరగనుంది. 38 నియోజకవర్గాల్లో 522 మంది అభ్యర్థులు తమ అదృష్టాన్ని పరీక్షించుకుంటున్నారు. పోలింగ్‌కు ఈసీ చురుగ్గా ఏర్పాట్లు చేస్తోంది. మావోయిస్టు ప్రభావిత ప్రాంతాల్లో ఎన్ని కలు జరగనున్న దృష్ట్యా భారీగా బలగా లను మోహరిస్తోంది. జార్ఖండ్‌లో మొత్తం 81 శాసనసభ స్థానాలు ఉండగా… వాటిలో తొలి విడతలో ఈనెల 13న 43 స్థానాలకు పోలింగ్‌ జరిగింది. 43 స్థానాలకు 683 మంది అభ్యర్థులు పోటీపడగా… 66.18 శాతం పోలింగ్‌ నమోదైంది. జార్ఖండ్‌లో జేఎంఎం, కాంగ్రెస్‌, ఆర్జేడీ, సీపీఐ కలిసి మహాఘట్‌ బంధన్‌గా పోటీ చేస్తుండగా, బీజేపీ, ఆల్‌ జార్ఖండ్‌ స్టూడెంట్‌ యూనియన్‌, జేడీయూ, లోక్‌జన్‌ శక్తి రామ్‌ విలాస్‌ పార్టీ కలిసి ఎన్డీఏ కూటమిగా పోటీ చేస్తున్నాయి.