ముద్రగడ పద్మనాభం ఇక లేరు

ఆంధ్రప్రదేశ్ రాజకీయాల్లో విషాదం

విశాలాంధ్ర : ఆంధ్రప్రదేశ్ రాజకీయాల్లో సుదీర్ఘ ప్రస్థానం కలిగిన సీనియర్ నాయకుడు, కాపు ఉద్యమ సారథి ముద్రగడ పద్మనాభం (ముద్రగడ పద్మనాభ రెడ్డి) మంగళవారం (జూలై 14, 2026) కన్నుమూశారు. గత కొంతకాలంగా శ్వాసకోశ మరియు కిడ్నీ సంబంధిత సమస్యలతో బాధపడుతున్న ఆయన, హైదరాబాద్‌లోని ఒక ప్రైవేట్ ఆసుపత్రిలో చికిత్స పొందుతూ తుదిశ్వాస విడిచారు. ఆయన వయస్సు 73 సంవత్సరాలు. ముద్రగడ మృతి పట్ల పలువురు రాజకీయ ప్రముఖులు తీవ్ర సంతాపం వ్యక్తం చేస్తున్నారు.
​​1953 జనవరి 22న ఉమ్మడి తూర్పుగోదావరి జిల్లా కిర్లంపూడిలో ఒక రాజకీయ నేపథ్యం ఉన్న కుటుంబంలో ముద్రగడ జన్మించారు. ఆయన తండ్రి వీర రాఘవరావు గతంలో స్వతంత్ర ఎమ్మెల్యేగా పనిచేశారు.
​సవాల్ – పేరు మార్పు: 2024 సార్వత్రిక ఎన్నికల సమయంలో పిఠాపురం నియోజకవర్గంలో పవన్ కళ్యాణ్‌ను ఓడించకపోతే తన పేరు మార్చుకుంటానని ముద్రగడ సవాల్ చేశారు. ఎన్నికల ఫలితాల అనంతరం తన సవాల్‌కు కట్టుబడి, ఆయన తన పేరును అధికారికంగా *“ముద్రగడ పద్మనాభ రెడ్డి”గా మార్చుకుని వార్తల్లో నిలిచారు.
​ఆయన తన రాజకీయ జీవితంలో 4 సార్లు శాసనసభ్యుడిగా (MLA) విజయం సాధించడమే కాకుండా, కాకినాడ నియోజకవర్గం నుండి ఒకసారి లోక్‌సభ సభ్యుడిగా (MP) కూడా ప్రాతినిధ్యం వహించారు. ఉమ్మడి ఆంధ్రప్రదేశ్ రాష్ట్రంలో వేర్వేరు ప్రభుత్వాల హయాంలో ఆయన మంత్రిగా కీలక బాధ్యతలు నిర్వర్తించారు.తన సుదీర్ఘ ప్రస్థానంలో తెలుగుదేశం పార్టీ (TDP), కాంగ్రెస్, మరియు భారతీయ జనతా పార్టీ (BJP) లలో క్రియాశీలకంగా పనిచేశారు. 2014 తర్వాత కొంతకాలం తటస్థంగా ఉండి, 2024 మార్చి 16న వైఎస్సార్ కాంగ్రెస్ పార్టీ (YSRCP) లో చేరారు.
​కాపు రిజర్వేషన్ల ఉద్యమం
​కాపు సామాజిక వర్గాన్ని వెనుకబడిన తరగతుల (BC) జాబితాలో చేర్చాలనే డిమాండ్‌తో ముద్రగడ చేసిన పోరాటాలు రాష్ట్ర చరిత్రలో నిలిచిపోయాయి. ముఖ్యంగా 2016 లో కిర్లంపూడిలోని తన నివాసంలో ఆయన చేపట్టిన ఆమరణ నిరాహార దీక్ష, ఆ సమయంలో నిర్వహించిన “కాపు ఐక్య గర్జన” సభ ఆంధ్రప్రదేశ్ రాజకీయాలను కుదిపేసాయి. ఒక వర్గం హక్కుల కోసం రాజీలేని పోరాటం చేసిన నేతగా ఆయనకు ప్రత్యేక గుర్తింపు ఉంది.