ఎస్సీ, ఎస్టీ, బీసీ ఓటర్ల గుర్తింపుపై ప్రత్యేక గ్రామ సభ

విశాలాంధ్ర, ఉరవకొండ (అనంతపురం జిల్లా) : వజ్రకరూరు మండలంలోని కొనకొండ్ల గ్రామ పంచాయతీలో శనివారం ఎస్సీ, ఎస్టీ, బీసీ ఓటర్ల గుర్తింపు కార్యక్రమంపై ప్రత్యేక గ్రామ సభ నిర్వహించారు. గ్రామ సభలో ఆయా వర్గాలకు చెందిన ఓటర్ల పేర్లను చదివి వినిపించి, ఓటర్ల జాబితాలో పేర్లు సక్రమంగా ఉన్నాయా లేదా అనే అంశంపై పరిశీలించారు. అర్హులైన ఓటర్ల పేర్లు జాబితాలో నమోదయ్యాయా, ఏవైనా అభ్యంతరాలు లేదా మార్పులు అవసరమా అనే విషయాలను గ్రామస్థుల నుంచి తెలుసుకున్నారు. ఓటర్ల జాబితాలో పేర్లు లేని అర్హులైన వారు సంబంధిత అధికారులను సంప్రదించి వివరాలను నమోదు చేసుకోవాలని సూచించారు. ప్రజల సమక్షంలో పారదర్శకంగా ఓటర్ల వివరాలను పరిశీలించడం ద్వారా అర్హులైన ప్రతి ఒక్కరికీ ఓటు హక్కు కల్పించేందుకు చర్యలు చేపట్టారు. కార్యక్రమంలో ప్రత్యేక అధికారి, డిప్యూటీ ఎంపీడీవో గౌస్ సాహెబ్, పంచాయతీ కార్యదర్శి మహబూబ్ బాషా, గ్రామ సిబ్బంది, గ్రామ పెద్దలు, ప్రజలు పాల్గొన్నారు. గ్రామ సభలో ప్రజలు తమ అభిప్రాయాలు, సందేహాలను అధికారుల దృష్టికి తీసుకువచ్చారు. ఎస్సీ, ఎస్టీ, బీసీ వర్గాల ఓటర్ల వివరాల పరిశీలనను నిబంధనల ప్రకారం పూర్తి చేయాలని అధికారులు సూచించారు.