హెచ్-1బీ వీసా విధానంలో మార్పుల విషయంలో అమెరికా ప్రభుత్వం తన కఠిన వైఖరిని కొనసాగిస్తోంది.కొన్ని హెచ్-1బీ వీసా దరఖాస్తులపై 1,00,000 డాలర్ల (సుమారు రూ.95 లక్షలు) భారీ ఫీజు విధించాలన్న ప్రభుత్వ నిర్ణయాన్ని అమెరికా ఉపాధ్యక్షుడు జేడీ వాన్స్ సమర్థించారు.అమెరికా ఆర్థిక వ్యవస్థకు గణనీయమైన ప్రయోజనం చేకూర్చే అత్యంత నైపుణ్యం కలిగిన నిపుణులను ఆకర్షించడమే హెచ్-1బీ కార్యక్రమం లక్ష్యమని ఆయన పేర్కొన్నారు.
అమెరికన్ల ఉద్యోగాలను తొలగించి.. విదేశీయులకు తక్కువ వేతనాలు
అమెరికన్ ఉద్యోగులను తొలగించి వారి స్థానంలో తక్కువ వేతనాలకు విదేశీ ఉద్యోగులను నియమించుకునేందుకు హెచ్-1బీ వీసా వ్యవస్థను ఉపయోగించకూడదని వాన్స్ స్పష్టం చేశారు.దేశ ఆర్థిక వ్యవస్థకు విలువను జోడించే నైపుణ్యం కలిగిన విదేశీ నిపుణులను మాత్రమే ఈ కార్యక్రమం ద్వారా అమెరికాకు తీసుకురావాలని ఆయన పేర్కొన్నారు.ఇటీవల ‘ఆల్-ఇన్ పాడ్కాస్ట్’లో పాల్గొన్న జేడీ వాన్స్.. హెచ్-1బీ వీసా కార్యక్రమం ఉద్దేశాన్ని వివరించారు.తక్కువ జీతాలకు పనిచేసే విదేశీయులతో అమెరికన్లను భర్తీ చేయడం దీని లక్ష్యం కాదని, అమెరికా ఆర్థిక వ్యవస్థను మరింత బలోపేతం చేయడానికి అవసరమైన నైపుణ్యాలను దేశంలోకి తీసుకురావడమే ఉద్దేశమని తెలిపారు.
కీలక రంగాల్లో నైపుణ్యం ఉన్నవారికే ప్రాధాన్యం
టెక్నాలజీతో పాటు ఇతర కీలక రంగాల్లో గణనీయమైన మార్పు తీసుకురాగల నిపుణులను కంపెనీలు నియమించుకోవాలని వాన్స్ సూచించారు.హెచ్-1బీ విధానాన్ని ఎలా ఉపయోగించకూడదో వివరించేందుకు ఆయన ఒక ఉదాహరణను కూడా ప్రస్తావించారు.ఒక అమెరికన్ అకౌంటెంట్ ఏడాదికి 60,000 డాలర్ల వేతనం పొందుతున్నారని అనుకుందాం.అదే ఉద్యోగం నుంచి ఆ వ్యక్తిని తొలగించి, అతని స్థానంలో విదేశీ ఉద్యోగిని 45,000 డాలర్లకే నియమించడం హెచ్-1బీ వీసా కార్యక్రమం ఉద్దేశం కాదని వాన్స్ వివరించారు.ఇలాంటి విధానాలను నిరోధించేందుకే కఠినమైన నిబంధనలు అవసరమని ఆయన అభిప్రాయపడ్డారు.
చట్టపరమైన మార్పులకు కాంగ్రెస్లో తక్కువ రాజకీయ సంకల్పం
హెచ్-1బీ వీసా వ్యవస్థలో విస్తృతమైన చట్టపరమైన మార్పులు తీసుకురావడానికి అమెరికా కాంగ్రెస్లో రాజకీయ సంకల్పం తక్కువగా ఉందని వాన్స్ అంగీకరించారు.ఈ కారణంగానే తమ ప్రభుత్వం ఫీజుల పెంపు వంటి పరిపాలనాపరమైన చర్యలపై దృష్టి పెట్టిందని ఆయన తెలిపారు.ఉద్యోగాల కోతలపై కంపెనీలకు కొత్త అడ్డంకులు?
భారీ సంఖ్యలో అమెరికన్ ఉద్యోగులను తొలగించిన కంపెనీలు.. మరోవైపు కార్మికుల కొరత ఉందంటూ హెచ్-1బీ వీసాల కోసం మళ్లీ దరఖాస్తు చేయకుండా నిరోధించే మార్గాలను కూడా ప్రభుత్వం పరిశీలిస్తోందని వాన్స్ వెల్లడించారు.హెచ్-1బీ వీసా విధానాన్ని మరింత కఠినతరం చేసేందుకు అమెరికా ప్రభుత్వం చేపడుతున్న సంస్కరణలపై చర్చ జరుగుతున్న సమయంలో వాన్స్ చేసిన ఈ వ్యాఖ్యలు ప్రాధాన్యం సంతరించుకున్నాయి.
