బుక్కరాయసముద్రం లో టిడిపిలో వర్గ విభేదాలు బహిర్గతం

విశాలాంధ్ర – శింగనమల: బుక్కరాయసముద్రం మండల కేంద్రంలో నిర్వహించిన మంత్రి నారా లోకేష్ జన్మదిన వేడుకలు స్థానికంగా రాజకీయ ఉద్రిక్తతలకు దారి తీశాయి. కార్యక్రమం సందర్భంగా ఎమ్మెల్యే బండారు శ్రావణి వర్గం మరియు పార్టీ ద్విసభ్య కమిటీ వర్గీయుల మధ్య ఉన్న అంతర్గత విభేదాలు బహిర్గతమయ్యాయి.పార్టీ వర్గాల సమాచారం ప్రకారం, వేడుకల ఏర్పాట్లలో ఎమ్మెల్యే వర్గానికే ప్రాధాన్యం ఇచ్చి, ద్విసభ్య కమిటీ వర్గాన్ని పక్కన పెట్టడమే వివాదానికి కారణమైంది. ఆహ్వానాల్లో అన్యాయం జరిగిందని ఆరోపిస్తూ ద్విసభ్య కమిటీ వర్గీయులు కార్యక్రమ ప్రాంగణంలోనే ఆగ్రహం వ్యక్తం చేశారు.ఎమ్మెల్యేకు వ్యతిరేకంగా నినాదాలు చేస్తూ, పార్టీ కోసం శ్రమించిన కార్యకర్తలను పరిగణనలోకి తీసుకోవడం లేదని వారు విమర్శించారు. దీంతో కొంతసేపు కార్యక్రమం ఉద్రిక్తంగా మారింది. సమాచారం అందుకున్న పోలీసులు వెంటనే చేరుకుని ఇరువర్గాలను చెదరగొట్టి పరిస్థితిని అదుపులోకి తెచ్చారు.ఈ ఘటనతో శింగనమల నియోజకవర్గంలో టిడిపి అంతర్గత రాజకీయాలు మరోసారి చర్చనీయాంశమయ్యాయి. పార్టీ కార్యకర్తలను సమానంగా కలుపుకుని వెళ్లాలనే అభిప్రాయం స్థానిక స్థాయిలో వ్యక్తమవుతోంది. వర్గ విభేదాలు కొనసాగితే భవిష్యత్తులో పార్టీపై ప్రభావం పడే అవకాశముందని రాజకీయ పరిశీలకులు అభిప్రాయపడుతున్నారు.