అధ్యక్షుడిని నా భర్త అని పిలిచి నాలుక కరచుకున్న కేటీ జకారియా
ట్రంప్ కొత్త ప్రెస్ సెక్రటరీగా బాధ్యతలు చేపట్టిన కేటీ జకారియా
కేవలం 14 నిమిషాల్లోనే సమావేశాన్ని ముగించి వెళ్లిపోయిన కేటీ
ఆమె పనితీరు అద్భుతంగా ఉందంటూ ట్రంప్ ప్రశంసలు
అమెరికా అధ్యక్ష భవనం వైట్‌హౌస్‌కు నూతన ప్రెస్ సెక్రటరీగా నియమితులైన కేటీ జకారియా తన తొలి మీడియా సమావేశంలోనే తడబడ్డారు. మంగళవారం జరిగిన తన తొలి ప్రెస్ బ్రీఫింగ్‌లో అధ్యక్షుడు డొనాల్డ్ ట్రంప్‌ను పొరపాటున నా భర్త అని సంబోధించి వెంటనే నాలుక కరచుకున్నారు. ఈ అనూహ్య పరిణామంతో జేమ్స్ బ్రాడీ బ్రీఫింగ్ రూమ్‌లో ఒక్కసారిగా నవ్వులు విరిశాయి. కేవలం 14 నిమిషాలకే సమావేశాన్ని ముగించడం కూడా చర్చనీయాంశంగా మారింది.41 ఏళ్ల కేటీ జకారియా.. కరోలిన్ లెవిట్ స్థానంలో వైట్‌హౌస్ ప్రెస్ సెక్రటరీగా బాధ్యతలు చేపట్టారు. తన తొలి సమావేశంలో ఆమె ఎక్కువగా ముందుగా సిద్ధం చేసుకున్న ప్రసంగాన్నే చదివి వినిపించారు. అధ్యక్షుడు ట్రంప్ నాయకత్వ పటిమను, ఆయన సాధించిన విజయాలను కొనియాడారు. ఈ క్రమంలో కేవలం ముగ్గురు విలేకరుల నుంచి మాత్రమే ప్రశ్నలు స్వీకరించారు. ఇంతలోనే అధ్యక్షుడు అలస్కా పర్యటనకు బయలుదేరాల్సి ఉందని, సమయం మించిపోతోందని చెబుతూ సమావేశాన్ని ముగించారు. అయితే, వాస్తవానికి ట్రంప్ పర్యటనకు ఇంకా చాలా గంటల సమయం ఉండటం గమనార్హం.ఈ సమావేశంలో ఒక విలేకరి కేటీని వ్యక్తిగత ప్రశ్న అడిగారు. ఁమీకు 12, 10, 8, 6 ఏళ్ల వయసున్న నలుగురు పిల్లలు ఉన్నారు. ఈ కీలకమైన, ఒత్తిడితో కూడిన బాధ్యతలను నిర్వహిస్తూనే, కుటుంబాన్ని ఎలా సమన్వయం చేసుకుంటారు? అని ప్రశ్నించారు. దీనికి కేటీ సమాధానమిస్తూ, తన భర్త, సినీ నిర్మాత అయిన టైలర్ జకారియా తనకు ఎంతో అండగా ఉంటారని చెప్పారు.
పిల్లలతో గడిపే సాయంత్రాలను వదులుకోవడం తనకు ఏమాత్రం ఇష్టం ఉండదని స్పష్టం చేస్తూ.. అందుకే నా అధ్యక్షుడు.. క్షమించాలి, నా భర్త ఇక్కడే ఉన్నారుఁ అని అన్నారు. అధ్యక్షుడు అనబోయి భర్త అనడంతో ఆమె వెంటనే పొరపాటును గ్రహించి సరిదిద్దుకున్నారు.
ఈ పొరపాటుతో అక్కడున్న వారంతా నవ్వారు. ఇది మంచిదేలే అంటూ కేటీ కూడా నవ్వి, పరిస్థితిని చక్కదిద్దే ప్రయత్నం చేశారు. వెంటనే మాట మార్చి, మన అధ్యక్షుడు ట్రంప్ కుటుంబాలకు అత్యంత ప్రాధాన్యత ఇచ్చే వ్యక్తి. కుటుంబాలు ఉన్న మహిళలకు ఆయన అత్యధికంగా అవకాశాలు కల్పించారు అంటూ ట్రంప్‌ను ప్రశంసించారు. ఆ వెంటనే ఆమె సమావేశాన్ని ముగించి వెళ్లిపోయారు.
అనంతరం ఈ ఘటనపై ట్రంప్ స్పందిస్తూ, కేటీ జకారియా పనితీరు అద్భుతంగా, చాలా బాగుందని ప్రశంసించారు. కాలిఫోర్నియాకు చెందిన కేటీ జకారియా గతంలో కన్జర్వేటివ్ వ్యాఖ్యాతగా, ఫాక్స్ న్యూస్‌లో పలు కార్యక్రమాల్లో పాల్గొన్నారు. ట్రంప్ మీడియా అండ్ టెక్నాలజీ గ్రూప్‌లో కూడా పనిచేశారు. రిపబ్లికన్ రాజకీయాల్లో కీలక పాత్ర పోషించిన ఆమె, ట్రంప్‌కు నమ్మకమైన వ్యక్తిగా పేరుపొందారు. తొలిరోజే చిన్న పొరపాటు దొర్లినా, అధ్యక్షుడి మద్దతు ఉండటంతో ఆమె తన బాధ్యతల్లో సమర్థంగా రాణిస్తారని విశ్లేషకులు భావిస్తున్నారు.
