జల్ పల్లిలోని మంచు మోహన్ బాబు ఫాంహౌస్ లో ఇటీవల మీడియా ప్రతినిధులపై దాడి జరిగిన విషయం తెలిసిందే. నటుడు మోహన్ బాబు ఓ మీడియా ప్రతినిధి చేతుల్లో నుంచి మైక్ లాక్కుని దాడి చేశారు. దీనికి సంబంధించిన వీడియో సోషల్ మీడియాలో వైరల్ గా మారాయి. నెటిజన్లు దీనిపై భిన్నాభిప్రాయాలు వ్యక్తం చేస్తున్నారు. మీడియా ప్రతినిధులదే తప్పని కొంతమంది కామెంట్లు పెడుతుండగా.. మరికొందరు మోహన్ బాబును తప్పుబడుతున్నారు. తాజాగా ఈ ఘటనపై మంచు మనోజ్ స్పందించారు. ఫాంహౌస్ లోపలికి దూసుకు రావడంతో మీడియా ప్రతినిధులపై దాడి జరిగిందన్న ప్రచారాన్ని కొట్టిపారేశారు. ఈ ఇష్యూలో మీడియా ప్రతినిధుల తప్పేమీలేదని, తానే వారిని లోపలికి తీసుకెళ్లానని స్పష్టతనిచ్చారు. తన ఏడు నెలల కూతురును తెచ్చుకోవడానికి ఫాంహౌస్ లోపలికి వెళ్లేందుకు ప్రయత్నించగా అడ్డుకున్నారని చెప్పారు. గేట్లు మూసేసి తనను లోపలికి వెళ్లకుండా అడ్డుకున్నారని వివరించారు. దీంతో తాను గేట్లు పగలకొట్టి మీడియా ప్రతినిధులను వెంటబెట్టుకుని లోపలికి వెళ్లానని చెప్పారు. ఇంతలో సడెన్ గా తన తండ్రి, ఇతరులు వచ్చి తమపై దాడి చేశారని చెప్పారు. ఈ క్రమంలోనే ఓ రిపోర్టర్ కు తీవ్ర గాయాలయ్యాయని మనోజ్ వివరించారు.
అల్లు అర్జున్ విడుదల ఆలస్యంపై.. చట్టపరమైన చర్యల యోచనలో ఆయన తరఫు న్యాయవాదులు!
సంధ్య థియేటర్ తొక్కిసలాట ఘటనలో నటుడు అల్లు అర్జున్ను తక్షణమే విడుదల చేయాలని హైకోర్టు ఆదేశాలు జారీ చేసినప్పటికీ ఆయనను రిలీజ్ చేయడంలో జాప్యం చోటు చేసుకున్నట్లు బన్నీ తరఫు న్యాయవాదులు చెబుతున్నారు. దీంతో ఈ అక్రమ నిర్బంధంపై చట్టపరమైన చర్యలు తీసుకోవాలని న్యాయవాదులు యోచిస్తున్నారు. శనివారం ఉదయం చంచల్గూడ జైలు నుంచి అల్లు అర్జున్ విడుదలైన అనంతరం ఆయన తరఫు న్యాయవాది అశోక్ రెడ్డి మీడియాతో మాట్లాడారు. హైకోర్టు నుంచి ఆర్డర్ కాపీని జైలు అధికారులు స్వీకరించినప్పటికీ ఆయనను అక్రమ నిర్బంధంలో ఉంచారని అన్నారు. నిందితులను వెంటనే విడుదల చేయాలని హైకోర్టు తన ఉత్తర్వుల్లో స్పష్టంగా పేర్కొన్నట్లు న్యాయవాది తెలిపారు.
ఁఆర్డర్ కాపీ అందుకున్నప్పటికీ, వారు ఆయనను (అల్లు అర్జున్) విడుదల చేయలేదు. మీకు ఆర్డర్ వచ్చిన వెంటనే, మీరు నటుడిని విడుదల చేయాలని హైకోర్టు చాలా స్పష్టంగా చెప్పింది. అయినప్పటికీ, వారు అలా చేయలేదు. కావాలనే ఆయనను అక్రమ నిర్బంధంలో ఉంచారు. దీనిపై మేము చట్టపరమైన చర్యల కోసం పోరాడుతాంఁ అని న్యాయవాది అశోక్ రెడ్డి చెప్పారు.జైలు అధికారులకు బెయిల్ ఆర్డర్ అందడంలో ఎలాంటి జాప్యం లేదని బన్నీ తరఫు న్యాయవాదుల బృందం పేర్కొంది. తాము హైకోర్టు ఉత్తర్వులకు సంబంధించిన సర్టిఫైడ్ కాపీని తక్షణమే సమర్పించామని తెలిపింది. హైకోర్టు మెసెంజర్ కూడా ఒక కాపీని అధికారులకు అందించారని పేర్కొంది.అయితే, తమకు అర్థరాత్రి బెయిల్ ఆర్డర్ వచ్చిందని, జైలు మాన్యువల్ ప్రకారం ఖైదీలను రాత్రి సమయంలో విడుదల చేయలేమని, మరుసటి రోజు ఉదయం నటుడిని విడుదల చేసినట్లు జైలు అధికారులు తెలిపారు. ఇక తెలంగాణ హైకోర్టు అల్లు అర్జున్కు నాలుగు వారాల మధ్యంతర బెయిల్ మంజూరు చేసిన విషయం తెలిసిందే. దాంతో దాదాపు 12 గంటల తర్వాత ఈరోజు ఉదయం 6.40 గంటలకు జైలు నుంచి ఆయన విడుదలయ్యారు. ఇక విడుదలైన వెంటనే బన్నీ తన కుటుంబ నిర్మాణ సంస్థ గీతా ఆర్ట్స్కు వెళ్లారు. అక్కడ తన లాయర్లతో సుమారు గంటసేపు మాట్లాడారు.
తెలంగాణలో ఇంటర్ పరీక్షల షెడ్యూల్ ఖరారు!
ఇంటర్ పరీక్షల నిర్వహణపై తెలంగాణ ప్రభుత్వం ఫోకస్ పెట్టిందని, షెడ్యూల్ ఖరారు చేసే అంశం తుది దశలో ఉందని అధికార వర్గాలు తెలిపాయి. షెడ్యూల్ దాదాపుగా ఖరారైందని వివరించాయి. వచ్చే వారంలో అధికారికంగా షెడ్యూల్ విడుదలయ్యే అవకాశం ఉందని తెలుస్తోంది. అనధికారిక సమాచారం ప్రకారం.. మార్చిలో పరీక్షలు నిర్వహించాలని, ఆ నెలాఖరులోగా అన్ని పరీక్షలు పూర్తి చేయాలని ప్రభుత్వం భావిస్తోంది. దీనికి అనుగుణంగా మార్చి 3వ తేదీ నుంచే ఇంటర్ పరీక్షలు ప్రారంభిచనున్నట్లు సమాచారం. ఇంటర్ అన్ని గ్రూపులకు చెందిన పరీక్షలు నిర్వహించేందుకు దాదాపు 15 నుంచి 20 రోజుల సమయం పడుతుంది. నెలాఖరులోగా పరీక్షలు పూర్తిచేయాలంటే మార్చి 3న పరీక్షలు ప్రారంభించాల్సి ఉంటుందని అధికారులు చెప్పారు. ఇక, ప్రాక్టికల్ పరీక్షల నిర్వహణ ఫిబ్రవరిలో పూర్తిచేయనున్నట్లు అధికారులు తెలిపారు. ఇంటర్ పరీక్షల ఫీజు గడువు డిసెంబర్ 3 తో ముగియగా ఆలస్య రుసుముతో జనవరి 2 వరకు ఫీజు చెల్లించే అవకాశం ఇంటర్ బోర్డ్ కల్పించింది. రూ.2 వేల ఆలస్య రుసుముతో ఈ అవకాశం కల్పిస్తున్నట్లు తెలిపింది. తెలంగాణ వ్యాప్తంగా సుమారు 9 నుంచి 10 లక్షల మంది విద్యార్థులు ఇంటర్ పరీక్షలకు హాజరవుతారని ఇంటర్ బోర్డ్ అధికారులు తెలిపారు. దీనికి తగ్గట్లు రాష్ట్రంలో పరీక్షలకు ఏర్పాట్లు చేయనున్నట్లు వివరించారు.
పాఠకులకు అన్ని సౌకర్యాలు కల్పించాలి..
జిల్లా గ్రంధాలయ ముఖ్య కార్యదర్శి రమ
విశాలాంధ్ర -ధర్మవరం:: పాఠకులు అందరికీ అన్ని సౌకర్యాలు కల్పిస్తూ గ్రంథాలయ అభివృద్ధికి మంచి గుర్తింపు తీసుకొని రావాలని జిల్లా గ్రంథాలయ శాఖ ముఖ్య కార్యదర్శి రమా తెలిపారు. ఈ సందర్భంగా వారు పట్టణములోని బాబు జగ్జీవన్ రామ్ నగర్ లో గల ప్రధాన గ్రంథాలయ శాఖను ఆకస్మికంగా తనిఖీ చేశారు. అనంతరం పలు రికార్డులను వారు పరిశీలించారు. గ్రంధాలయ పండు బకాయిలను వెంటనే వసూలు చేయాలని వారు ఆదేశించారు. అంతేకాకుండా పాఠకుల సభ్యత్వములు పెంచేలా కృషి చేయాలని తెలిపారు. పాటకల నుండి ఎటువంటి ఫిర్యాదులు అందకుండా తగిన జాగ్రత్తలు తీసుకోవాలని తెలిపారు. గ్రంథాలయ రికార్డులు సక్రమంగా ఉన్నాయని తెలుపుతూ సంతృప్తిని వ్యక్తం చేశారు. ఈ కార్యక్రమంలో గ్రంథాలయ అధికారిని అంజలీ సౌభాగ్యవతి, సిబ్బంది సత్య నారాయణ, శివమ్మ, రమణ నాయక్, గంగాధర్ తో పాటు అధిక సంఖ్యలో పాఠకులు పాల్గొన్నారు.
రక్త దానం మరొకరికి ప్రాణదానం అవుతుంది..
16వ వార్డ్ కౌన్సిలర్ కేతా లోకేష్
విశాలాంధ్ర ధర్మవరం:: రక్తదానం మరొకరికి ప్రాణదానమవుతుందని 16వ వార్డు కౌన్సిలర్ కేతా లోకేష్ తెలిపారు. ఈ సందర్భంగా పట్టణంలోని ఎన్టీఆర్ సర్కిల్ వైఎస్సార్ విగ్రహం వద్ద జరిగిన రక్తదాన శిబిరంలో వారు ముఖ్యఅతిథిగా విచ్చేశారు. ఈ సందర్భంగా నిర్వాహకులు బీరే శ్రీరాములు మాట్లాడుతూ ఈ శిబిరం చౌడేశ్వరి సేవా సమితి, రెడ్ క్రాస్ సొసైటీ తరఫున నిర్వహించడం జరిగిందని తెలిపారు. రక్త దానం చేసి, ప్రాణదాతలు కావాలని తెలిపారు. రక్తదానం చేయడం వలన ఎటువంటి అనారోగ్యము కలగదని తెలిపారు. ఈ శిబిరంలో 52 మంది రక్తదాతలు పాల్గొని కార్యక్రమాన్ని విజయవంతం చేశారని తెలిపారు. అనంతరం ముఖ్య అతిధిని ఘనంగా సన్మానించారు. రక్తదాతలకు సర్టిఫికెట్లను పంపిణీ చేశారు.ఈ కార్యక్రమంలో ట్రాఫిక్ ఎస్ఐ రాముడు, రోటరీ క్లబ్ అధ్యక్షుడు జయసింహ, డాక్టర్ సత్య నిర్ధారన్, బోనాల శివయ్య, దాసరి మంజు,రక్తదాతలు పాల్గొన్నారు.
ఘనంగా మానవ హక్కుల దినోత్సవం వేడుకలు..
ప్రిన్సిపాల్ ప్రభాకర్ రెడ్డి
విశాలాంధ్ర ధర్మవరం : పట్టణంలోని కే.హెచ్. ప్రభుత్వ డిగ్రీ కళాశాలలో ప్రిన్సిపాల్ డాక్టర్ కె. ప్రభాకర్ రెడ్డి అధ్యక్షతన, రాజనీతి శాస్త్రం విభాగ అధిపతి డాక్టర్ బి. గోపాల్ నాయక్ ఆధ్వర్యంలో అధ్యాపకులు, విద్యార్థులు నడుమ ఘనంగా మానవ హక్కుల దినోత్సవాన్ని ఘనంగా జరుపుకున్నారు.
అనంతరం ప్రిన్సిపాల్ ప్రభాకర్ రెడ్డి, వైస్ ప్రిన్సిపాల్ చిట్టెమ్మ మాట్లాడుతూ రెండవ ప్రపంచ యుద్ధం తర్వత ఐక్యరాజ్యసమితి, మానవ హక్కుల సార్వత్రిక ప్రకటన 1948 డిసెంబర్ 10.తేదీ నాడు ప్రపంచ మానవళికిహక్కులు ప్రసాదం ఇవ్వడం జరిగిందని తెలియచేసారు. ప్రపంచంలోని అన్ని దేశాలు మానవ హక్కుల దినోత్సవంగా జరుపుకుంటున్నాయని, రాజ్యాంగంలోని పౌరులకు కల్పించిన హక్కులను అవగాహన చేసుకుని, వృద్ధి చెందాలని తెలిపారు. ముఖ్యంగా రైతులు, మహిళలు, కార్మికులు, వెనుకబడిన వర్గాలతో పాటు ఇతర వర్గాలు తమ హక్కుల ఉల్లంఘనను గుర్తించి, హక్కులను కాపాడుకుంటూ దేశాభివృద్ధికి తోడ్పడాలని తెలిపారు. సమాజంలో మానవ హక్కుల ఉల్లంఘన పట్ల విద్యార్థులు జాగ్రత్త వహించి, తమ హక్కులను కాపాడుతూ, తోటి వారి హక్కులకు భంగం కలిగించకుండా, మంచి పౌరులుగా ఎదగాలని తెలిపారు. ఈ కార్యక్రమంలో అధ్యాపకులు పావని, కిరణ్ కుమార్, భువనేశ్వరి, పుష్పావతి,మీనా, ఆనందు. తదితర అధ్యాపక బోధనేతర బృందం విద్యార్థులు పాల్గొన్నారు.
వసతిగృహాల నిర్మాణ, మరమ్మత్తు పనులు సంక్రాంతిలోపు త్వరితగతిన పూర్తి చేయాలి
వసతి గృహాలలో సీసీ కెమెరా ఏర్పాటు పూర్తి చేయాలి
జిల్లా కలెక్టర్ డాక్టర్ వినోద్ కుమార్.వి
విశాలాంధ్ర -అనంతపురం : వసతిగృహాల నిర్మాణ, మరమ్మత్తు పనులు వచ్చే సంక్రాంతిలోపు త్వరితగతిన పూర్తి చేయాలని జిల్లా కలెక్టర్ డాక్టర్ వినోద్ కుమార్.వి, ఐ.ఏ.ఎస్ ఆయా శాఖల అధికారులను ఆదేశించారు. అనంతపురం కలెక్టరేట్ లోని మినీ కాన్ఫరెన్స్ హాల్ లో మంగళవారం పాఠశాల విద్యా శాఖకు సంబంధించిన విద్యా, అనుబంధ శాఖల అధికారులతో జిల్లా కలెక్టర్ సమీక్ష సమావేశం నిర్వహించారు.
ఈ సందర్భంగా జిల్లా కలెక్టర్ మాట్లాడుతూ.. 11 సాంఘిక సంక్షేమ శాఖ పరిధిలోని హాస్టళ్లకు డిస్టిక్ మినరల్ ఫండ్ ద్వారా జిల్లాకు కోటి 12 లక్షల రూపాయలు ఇవ్వడం జరిగిందని, దీనికి సంబంధించి పది హాస్టల్లో పనులు పూర్తి చేయడం జరిగిందని, మిగిలిన ఒకటి కూడా పూర్తి చేసి అధికార ప్రజా ప్రతినిధులతో ప్రారంభోత్సవం గావించాలన్నారు. ప్రభుత్వం ద్వారా మంజూరు చేసిన 5 కోట్ల 70 లక్షలు నిధులు మంజూరు చేయడం జరిగిందని, వాటిని ఏపీఈడబ్ల్యూఐడిసి మరియు పంచాయతీరాజ్ ఎగ్జిక్యూటివ్ ఏజెన్సీ ద్వారా 36 హాస్టల్ కు సంబంధించిన పనులన్నీ నెలాఖరు నాటికి పూర్తి చేయాలని, వసతి గృహాల వద్ద నిఘా ఏర్పాటల్లో భాగంగా సీసీ కెమెరాలు ఇప్పటికే టెండర్లు పూర్తి అయ్యాయని, వాటిని త్వరితగతిన ఏర్పాటు చేయుటకు చర్యలు తీసుకోవాలన్నారు. అలాగే జిల్లా పరిషత్ నుండి కేటాయించిన నిధులను జిల్లాలోని 8 నియోజకవర్గాలకు సమాన నిష్పత్తిలో ప్రభుత్వ నియమ నిబంధనల ప్రకారం కేటాయించి, వసతి గృహాలలో ప్రాముఖ్యత కలిగిన పనులను గుర్తించి, వాటిని పూర్తి చేయు విధంగా అధికారులు చర్యలు తీసుకోవాలని ఆదేశించారు. జిల్లాలోని అన్ని వసతి గృహాలలో ట్యూటర్లను రెండు వారాలలోపు నియమించే విధంగా చర్యలు తీసుకోవాలని సాంఘిక సంక్షేమ శాఖ సంబంధించిన పనులన్నీ సంక్రాంతి లోపు పూర్తి చేయాలని అధికారులకు ఆదేశించారు. విద్యా, అనుబంధ శాఖలు మనకున్నటువంటి అన్ని శాఖల కంటే చాలా ముఖ్యమైనది మరియు ప్రాముఖ్యమైనదని కావున ప్రతి ఒక్క అధికారి కూడా చిత్తశుద్ధితో పనిచేయాలని ఎలాంటి నిర్లక్ష్యం ప్రదర్శించిన వారిపై కఠిన చర్యలు ఉంటాయని, దీనిని ప్రతి ఒక్కరూ గమనించాలని అధికారులకు తెలియజేశారు. ప్రతి ఒక్క అధికారి కూడా క్షేత్రస్థాయిలో పర్యటనలు జరిపి సమస్యలను గుర్తించి వాటిని అధికమించేందుకు ప్రతి ఒక్క అధికారి కృషి చేయాలని తెలిపారు.
ఈ సమావేశంలో సోషల్ వెల్ఫేర్ డి డి ప్రతాప్ సూర్యనారాయణ రెడ్డి, ఏపీఎం నాగరాజు, జిల్లా ఉపాధి కల్పన అధికారిని కళ్యాణి, మైనారిటీ వెల్ఫేర్ అధికారి జిల్లా అధికారి రామ సుబ్బారెడ్డి,బిసి వెల్ఫేర్, డిటిడబ్ల్యూఓ అధికారులు, తదితరులు పాల్గొన్నారు.
దేవాలయ భూములను ఆక్రమించిన వారికి నోటీసులు
-తహశీల్దార్ పి.విజయకుమారి
విశాలాంధ్ర-రాప్తాడు : గ్రామంలో ఉన్న దేవాలయ భూములను ఆక్రమించిన వారికి నోటీసులు జారీ చేస్తామని తహశీల్దార్ పి.విజయకుమారి అన్నారు. మండలంలోని బుక్కచెర్ల గ్రామంలో మంగళవారం రెవెన్యూ సదస్సు నిర్వహించారు. దశాబ్దాలుగా సాగు చేసుకుంటున్న తమ భూములకు అన్ని పత్రాలు, రికార్డులు ఉన్నా ఆన్లైన్లో నిషేదిత భూములుగా నమోదయ్యాయని సమస్యను పరిష్కరించాలని ఓ రైతు కోరారు. వివిధ భూసమస్యలపై రైతులు పలు అర్జీలు అందజేశారు. దేవాదాయ శాఖ ఈఓ సుధారాణి మాట్లాడుతూ దేవాదాయ భూములను ఎలాంటి హక్కు లేకుండా ఇతరులు సాగు చేస్తున్నారని, వీటిని దేవుని తరపున మాత్రమే లీజుకు ఇస్తామన్నారు. దేవుని మాన్యం భూములను రెవెన్యూ రికార్డుల్లో ప్రయివేటు వ్యక్తులు నమోదు చేసుకున్నారని వాటిపై తగు చర్యలు తీసుకుంటామన్నారు. కార్యక్రమంలో సర్పంచ్ ఆదినారాయణమ్మ, ఆర్ఐ కరుణాకర్, వీఆర్ఓ సాయి, పంచాయతీ కార్యదర్శి నవీన్, ఫీల్డ్ అసిస్టెంట్ ఓబిలేసు, నాయకులు శ్రీనివాసరెడ్డి, ఓబిలేసు, బ్రహ్మానందరెడ్డి సచివాలయ సిబ్బంది, వీఆర్ఏ తలారి కర్ణ తదితరులు ఉన్నారు.
అదానీ గ్రూప్ కంపెనీలపై సీబీఐ విచారణ జరపాలని సీపీఐ జిల్లా కార్యదర్శి జాఫర్ డిమాండ్
అనంతపురం : భారతదేశవ్యాప్తంగా సిపిఐ జాతీయ సమితి పిలుపు పేరుకు అదానీ అవినీతిపైన జాయింట్ పార్లమెంటరీ కమిటీ వేయాలని, అదేవిధంగా డిమాండ్స్ డే గా ప్రకటిస్తూ అనంతపురము నగర సమితి సిపిఐ కార్యదర్శి ఎన్ శ్రీరాములు ఆధ్వర్యంలో నిరసన ర్యాలీ కార్యక్రమం చేపట్టడం జరిగింది. ఈ సందర్భంగా సిపిఐ జిల్లా కార్యదర్శి సి. జాఫర్ మాట్లాడుతూ… నరేంద్ర మోడీ బినామీ, ఆర్థిక నేరగాడు అదానీ ప్రపంచవ్యాప్తంగా 6,300 కోట్ల రూపాయలు పెట్టుబడులు సేకరించి భారతదేశంలో ఐదు రాష్ట్రాలలో 2029 కోట్ల రూపాయలు లంచం ఇవ్వడం జరిగింది. అందులో ఆంధ్రప్రదేశ్ 2021 ముఖ్యమంత్రి జగన్మోహన్ రెడ్డికి 1,750 కోట్ల రూపాయలు ముడుపులు ఇచ్చినట్లు ఆధారాలతో అమెరికాలోని ఎఫ్.బి. ఐ , ఎస్. ఈ. సీ లు, ఈస్టర్న్ డిస్ట్రిక్ట్ కోర్టులో నివేదిక సమర్పించడం జరిగింది. అదానీ, అధానీ తమ్ముని కుమారుడు సాగర అదానీ, మరొక ఆరు మంది పైన కేసులు నమోదు చేయడం జరిగింది. సమన్లు జారీ చేశారు. అయినా సరే పార్లమెంటులో జేపీసీ వేయాలని ప్రతిపక్షాలు డిమాండ్ చేస్తా ఉంటే బిజెపి ప్రభుత్వం పారిపోతోందన్నారు. అదేవిధంగా మణిపూర్ రాష్ట్రంలో బిజెపి డబల్ ఇంజన్ సర్కార్ ఉంది. కుకీ, మైతీల జాతుల మధ్య మారణకాండ జరుగుతున్నది అని పేర్కొన్నారు.. మణిపూర్ రాష్ట్రంలో 60 వేల మంది శరణార్థులుగా తలదాచుకుంటున్నారు. 250 మంది మరణించారు .చర్చిలు ,మందిరాలు ధ్వంసం అయినాయి. ప్రధానమంత్రి నరేంద్ర మోడీ మణిపూర్ రాష్ట్రంలో శాంతిభద్రతలు నెలకొల్పడంలో విఫలమైనారు .అందువలన తక్షణం బిజెపి గద్దె దిగాలని సిపిఐ డిమాండ్ చేస్తోందన్నారు. ఉత్తర ప్రదేశ్ స్తంభాల్లో మత హింసకు పూనుకుంటున్నారు. మసీదు కింద దేవుడు ఉన్నాడని, శివుడు ఉన్నాడని కోర్టులో అర్జీలు పెట్టుకుంటున్నారు. పురాతత్వ శాఖకు మసీదులకు దర్గాలకు నోటీసులు సర్వ్ చేస్తున్నారు దీనివలన మత హింస పెట్రేగిపోతోందన్నారు. ఐదు మంది దాకా ముస్లింలు ప్రాణాలు కోల్పోయారు అని పేర్కొన్నారు. భారతదేశానికి 1947 ఆగస్టు 15న స్వాతంత్రం వచ్చింది. నాడు మందిరాలు, మసీదులు యథాతథంగా ఉంచాలని పీవీ, నరసింహారావు ప్రధానమంత్రిగా ఉన్నప్పుడు 1991లో చట్టం చేశారన్నారు. ఈ చట్టాన్ని ఉల్లంఘిస్తే మూడు సంవత్సరాలు జైలు శిక్ష, జరిమానా విధిస్తూ కఠినమైన చట్టాన్ని తీసుకురావడం జరిగిందన్నారు. అయినా సరే ఉల్లంఘన జరుగుతున్నది అన్నారు. భారతీయ జనతా పార్టీ ప్రభుత్వానికి, మద్దతిస్తున్న ఏపీ ముఖ్యమంత్రి చంద్రబాబు నాయుడు, బీహార్ ముఖ్యమంత్రి నితీష్ కుమార్ పునరాలోచించాలి అని పేర్కొన్నారు. భారతదేశంలోని ప్రజలు అప్రమత్తంగా ఉండాలన్నారు. మత హింసను వ్యతిరేకించాలి మతసామరస్యాన్ని కాపాడుకోవడానికి లౌకికవాదులు, సెక్యులర్ శక్తులు ఐక్యంగా ముందుకు రావాల్సిన అవసరం ఉందన్నారు. భారతీయ జనతా పార్టీ 10 సంవత్సరాలుగా చేస్తున్న మూక దాడులను, మత హింసను ముక్తకంఠముతో వ్యతిరేకించాలని సిపిఐ జిల్లా కమ్యూనిస్టు పార్టీ పిలిపిస్తున్నది అన్నారు. దేశంలో నిత్యావసర వస్తువుల ధరలు పెరుగుతున్నాయి, నిరుద్యోగ సమస్య తాండవిస్తున్నది అని పేర్కొన్నారు. జాతీయ గ్రామీణ ఉపాధి హామీ పనులకు తూట్లు పడుతోందన్నారు . ఈ సమస్యలు పరిష్కారం చేయకుండా హిందుత్వ పేరుతో విభజన రాజకీయాలకు పూనుకుంటున్నారు. ఈ కార్యక్రమంలో సిపిఐ నగర సహాయ కార్యదర్శిలు, బి. రమణయ్య, కె. అల్లిపీర, బంగారు భాష, యువజన నాయకులు మోహన్ కృష్ణ ఆనంద్ మహిళా నాయకులు తదితరులు పాల్గొన్నారు..
మంచినీటి ట్యాంకులను శుభ్రం చేయించిన సర్పంచ్
విశాలాంధ్ర – పెద్దకడబూరు :(కర్నూలు) : మండల పరిధిలోని నౌలేకల్ గ్రామంలో గ్రామ సర్పంచ్ నరేష్, పల్లవి ఆధ్వర్యంలో మంగళవారం మంచినీటి ట్యాంకులను శుభ్రం చేయించారు. గ్రామంలో ఏర్పాటు చేసిన మినీ ట్యాంకులో పేరుకుపోయిన పూడికను తీయించి, బ్లీచింగ్ పౌడర్ తో శుభ్రం చేయించారు. గ్రామ ప్రజలకు రక్షిత మంచినీటిని సరఫరా చేయడమే తమ లక్ష్యమని తెలిపారు . గ్రామంలో ఏవైనా సమస్యలు ఉంటే తమ దృష్టికి తీసుకోరావాలని కోరారు. అనంతరం పారిశుధ్య పనులను చేపట్టారు.
