అండర్-19 ప్రపంచ కప్ ఫైనల్ అంటేనే యువ క్రికెటర్లకు అత్యంత ఒత్తిడితో కూడిన పరీక్ష. అలాంటి కీలక మ్యాచ్లో సెంచరీ చేయడం అనేది అసాధారణ ప్రతిభకు నిదర్శనం.అయితే కొందరు కుర్రాళ్లు ఆ ఒత్తిడిని లెక్కచేయకుండా బ్యాట్తో చరిత్ర లిఖించారు. అలాంటి ఘనత సాధించిన ఆటగాళ్ల జాబితాలో తాజాగా టీమిండియా యువ సంచలనం వైభవ్ సూర్యవంశీ కూడా చేరాడు.2026 అండర్-19 వన్డే వరల్డ్కప్ ఫైనల్లో అతడు కేవలం 55 బంతుల్లోనే శతకం పూర్తి చేసి అందరి దృష్టిని తనవైపు తిప్పుకున్నాడు.ఈ సందర్భంగా అండర్-19 వరల్డ్కప్ ఫైనల్స్లో నమోదైన శతకాల చరిత్రను ఓసారి తిరిగి చూద్దాం.
వైభవ్ సూర్యవంశీ 175 పరుగులు
హరారే వేదికగా జరుగుతున్న 2026 అండర్-19 వరల్డ్కప్ ఫైనల్లో ఇంగ్లాండ్తో జరిగిన పోరులో వైభవ్ సూర్యవంశీ అజేయంగా 175 పరుగులు చేసి అద్భుత ప్రదర్శన కనబరిచాడు.
ఒత్తిడిలోనూ ఆత్మవిశ్వాసంతో ఆడి పరుగుల వరద పారించాడు. అతడి దంచుడు ముందు ఇంగ్లాండ్ బౌలర్లు పూర్తిగా నిరుత్తరులయ్యారు. ఈ ఇన్నింగ్స్ భారత అండర్-19 క్రికెట్ చరిత్రలో ఒక స్వర్ణ అధ్యాయంగా నిలిచింది.ఇంతకుముందు భారత జట్టుకు చిరస్మరణీయ ఫైనల్ ఇన్నింగ్స్ అందించిన వారిలో ఉన్ముక్త్ చంద్ ప్రత్యేక స్థానం దక్కించుకున్నాడు.2012లో టౌన్స్విల్లే వేదికగా జరిగిన ఫైనల్లో ఆస్ట్రేలియాపై అతడు 111 పరుగులు నాటౌట్గా చేసి భారత్కు చారిత్రక విజయాన్ని అందించాడు.
ఆసీస్ ఆటగాళ్లకు ప్రత్యేక గుర్తింపు
కెప్టెన్గా, బ్యాట్స్మన్గా అతడి ఇన్నింగ్స్ ఇప్పటికీ అభిమానుల హృదయాల్లో నిలిచిపోయింది. అండర్-19 ఫైనల్స్లో ఆస్ట్రేలియా ఆటగాళ్లకు కూడా విశేష గుర్తింపు ఉంది.
1988 ఫైనల్లో బ్రెట్ విలియమ్స్ పాకిస్థాన్పై 108 పరుగులు చేసి తన పేరు చరిత్రలో లిఖించుకున్నాడు.అలాగే 2002 ఫైనల్లో జారెడ్ బర్క్ దక్షిణాఫ్రికాపై అజేయ శతకం (100 నాటౌట్) సాధించి ఆస్ట్రేలియా విజయానికి బాటలు వేశాడు.ఇంగ్లాండ్ తరఫున 1998 ఫైనల్లో స్టీఫెన్ పీటర్స్ న్యూజిలాండ్పై 107 పరుగులు చేసి కీలక ఇన్నింగ్స్ ఆడాడు.
భారత్ తరఫున మరో గుర్తుండిపోయే ప్రదర్శనగా 2018 ఫైనల్ నిలిచింది. ఆ మ్యాచ్లో మంజోత్ కల్రా ఆస్ట్రేలియాపై అజేయంగా 101 పరుగులు చేసి భారత విజయాన్ని ఖాయం చేశాడు.
మొత్తం చూస్తే అండర్-19 వరల్డ్కప్ ఫైనల్స్లో వచ్చిన ఈ శతకాలు కేవలం గణాంకాలకే పరిమితం కావు.
అవి భవిష్యత్తు క్రికెట్ దిశను మార్చిన ఇన్నింగ్స్లు, ప్రపంచ క్రికెట్కు కొత్త తారలను పరిచయం చేసిన చారిత్రక ఘట్టాలుగా నిలిచాయి.
