ఐపీఎల్, ప్రో కబడ్డీ, ఫుట్బాల్ లీగ్ల తరహాలో నిర్వహిస్తాం: ఆధవ్ అర్జున
విజయవాడలో 51వ సబ్-జూనియర్ జాతీయ బాస్కెట్బాల్ ఛాంపియన్షిప్ ప్రారంభం
విజయవాడ – (స్పోర్ట్స్ కరస్పాండెంట్) : బాస్కెట్బాల్ ఫెడరేషన్ ఆఫ్ ఇండియా (బీఎఫ్ఐ) ఆధ్వర్యంలో వచ్చే ఏడాది జనవరిలో జాతీయ స్థాయి బాస్కెట్బాల్ లీగ్ను ప్రారంభించనున్నట్లు బీఎఫ్ఐ అధ్యక్షుడు, తమిళనాడు క్రీడలు, యువజన సంక్షేమం, పబ్లిక్ వర్క్స్ డెవలప్మెంట్ మంత్రి ఆధవ్ అర్జున తెలిపారు. క్రికెట్లో ఐపీఎల్, కబడ్డీ, ఫుట్బాల్లో నిర్వహిస్తున్న ప్రొఫెషనల్ లీగ్ల తరహాలో బాస్కెట్బాల్ లీగ్ను నిర్వహించనున్నట్లు ఆయన చెప్పారు. విజయవాడలోని పటమట చెన్నుపాటి రామకోటయ్య మున్సిపల్ కార్పొరేషన్ ఇండోర్ స్టేడియంలో సోమవారం 51వ సబ్-జూనియర్ జాతీయ బాస్కెట్బాల్ ఛాంపియన్షిప్ బాలబాలికల పోటీలను ఆధవ్ అర్జున ప్రారంభించారు. సెప్టెంబర్ 27 నుంచి అక్టోబర్ 4 వరకు ఈ పోటీలు జరగనున్నాయి. తమిళనాడు మంత్రి ఆధవ్ అర్జున, విజయవాడ ఎంపీ, ఆంధ్రా క్రికెట్ అసోసియేషన్ అధ్యక్షుడు కేశినేని శివనాథ్ (చిన్ని), విజయవాడ తూర్పు ఎమ్మెల్యే గద్దె రామ్మోహన్ రావు తదితరులు జ్యోతి ప్రజ్వలన చేసి పోటీలను ప్రారంభించారు. అనంతరం వివిధ రాష్ట్రాల నుంచి పాల్గొంటున్న క్రీడాకారుల మార్చ్పాస్ట్ నిర్వహించారు. బీఎఫ్ఐ, ఆంధ్రప్రదేశ్ బాస్కెట్బాల్ అసోసియేషన్, స్పోర్ట్స్ అథారిటీ ఆఫ్ ఆంధ్రప్రదేశ్ (శాప్) సంయుక్త ఆధ్వర్యంలో ఎనిమిది రోజుల పాటు ఈ ఛాంపియన్షిప్ జరుగుతోంది. మొత్తం 54 జట్లు పాల్గొంటుండగా, ఇందులో 28 బాలుర, 26 బాలికల జట్లు ఉన్నాయి. 28 రాష్ట్రాలకు చెందిన సుమారు 641 మంది క్రీడాకారులు పోటీల్లో పాల్గొంటున్నారు. ప్రతిపాదిత జాతీయ లీగ్ వల్ల సీనియర్ క్రీడాకారులకు ఉన్నత స్థాయిలో పోటీపడేందుకు మరిన్ని అవకాశాలు లభిస్తాయని ఆధవ్ అర్జున తెలిపారు. దేశంలో బాస్కెట్బాల్ను క్షేత్రస్థాయి నుంచి అభివృద్ధి చేయడంతో పాటు ప్రతిభావంతులైన క్రీడాకారులను గుర్తించి జాతీయ, అంతర్జాతీయ స్థాయికి తీర్చిదిద్దడంపై బీఎఫ్ఐ దృష్టి సారించిందన్నారు. పురుషులు, మహిళలకు 3×3, 5×5 విభాగాల్లో నేషనల్ స్టార్ బాస్కెట్బాల్ లీగ్లను నిర్వహించేందుకు కూడా ప్రణాళికలు రూపొందిస్తున్నట్లు తెలిపారు. యువ క్రీడాకారుల్లో ప్రతిభను గుర్తించి వారికి అత్యుత్తమ శిక్షణ, అభివృద్ధి అవకాశాలు కల్పించేందుకు ఫెడరేషన్ కృషి చేస్తోందన్నారు. తాను స్పోర్ట్స్ హాస్టల్లో చేరి స్కాలర్షిప్ పొందిన విషయాన్ని గుర్తుచేసుకున్న ఆధవ్ అర్జున, ముఖ్యంగా ఆర్థికంగా వెనుకబడిన కుటుంబాలకు చెందిన యువత జీవితాలను క్రీడలు మార్చగలవని అన్నారు. 22 ఏళ్ల తర్వాత జాతీయ బాస్కెట్బాల్ ఛాంపియన్షిప్కు ఆంధ్రప్రదేశ్ ఆతిథ్యం ఇవ్వడం గర్వకారణమని విజయవాడ ఎంపీ కేశినేని శివనాథ్ అన్నారు. యువ క్రీడాకారులకు మెరుగైన మౌలిక వసతులు, శిక్షణ, పోటీ వాతావరణం కల్పించేందుకు ప్రభుత్వం, క్రీడా సంఘాలు సమన్వయంతో పనిచేయాలని సూచించారు. ఛాంపియన్షిప్లో మొత్తం 146 మ్యాచ్లు జరగనున్నాయని, యువ ప్రతిభను ప్రోత్సహించడం అభినందనీయమని శివనాథ్ అన్నారు. విజేత జట్టుకు రూ.3 లక్షలు, రన్నరప్కు రూ.2 లక్షలు, మూడో స్థానంలో నిలిచే జట్టుకు రూ.1 లక్ష నగదు బహుమతులు అందజేయనున్నట్లు నిర్వాహకులు తెలిపారు. విజయవాడ తూర్పు ఎమ్మెల్యే గద్దె రామ్మోహన్ రావు, బీఎఫ్ఐ కోశాధికారి, ఆంధ్రప్రదేశ్ బాస్కెట్బాల్ అసోసియేషన్ అధ్యక్షుడు టీ. చంగల్రాయుడు నాయుడు, ప్రధాన కార్యదర్శి జి. చక్రవర్తి, కోశాధికారి ఎం. రేవతి, వివిధ రాష్ట్రాల బాస్కెట్బాల్ సంఘాల ప్రతినిధులు పాల్గొన్నారు. పోటీల్లో రాజస్థాన్ బాలుర జట్టు 98-57తో మధ్యప్రదేశ్పై విజయం సాధించగా, ఉత్తరప్రదేశ్ బాలుర జట్టు 81-28తో మిజోరాంను ఓడించింది. కర్ణాటక బాలికల జట్టు 78-43తో పంజాబ్పై విజయం సాధించింది. బాలుర విభాగంలో కర్ణాటక 47-44తో జార్ఖండ్పై గెలుపొందగా, మహారాష్ట్ర 66-63తో ఢిల్లీపై ఓవర్టైమ్లో విజయం సాధించింది.
