సాఫ్ట్‌బాల్ క్రీడలో విశేష ప్రతిభ: అక్షయ్ సాగర్‌కు ‘బెస్ట్ పెర్ఫార్మర్’ అవార్డు

​విశాలాంధ్ర – రాప్తాడు (అనంతపురం జిల్లా) సాఫ్ట్‌బాల్ క్రీడలో అత్యుత్తమ ప్రతిభ కనబరిచిన బుడగల అక్షయ్ సాగర్ ‘బెస్ట్ పెర్ఫార్మర్ ఆఫ్ ది ఇయర్ 2025-2026’ అవార్డును అందుకున్నారు. కాకినాడ సమీపంలోని సూరంపాలెం ఆదిత్య యూనివర్సిటీలో శనివారం ఫిజికల్ ఎడ్యుకేషన్ డిపార్ట్‌మెంట్ ఆధ్వర్యంలో 80వ స్వాతంత్ర్య దినోత్సవ వేడుకల సందర్భంగా
వైభవంగా నిర్వహించిన కార్యక్రమంలో, వర్సిటీ ప్రో-ఛాన్సలర్ సతీష్ రెడ్డి చేతుల మీదుగా అక్షయ్ సాగర్ ఈ జ్ఞాపికను స్వీకరించారు. అనంతపురం జిల్లా రాప్తాడు విశాలాంధ్ర సీనియర్ జర్నలిస్ట్ శ్రీనివాస్, కీర్తిశేషులు ఉమాదేవి
దంపతుల కుమారుడైన అక్షయ్ సాగర్ సాధించిన ఈ విజయం పట్ల ఆనందం వ్యక్తం చేస్తూ, యూనివర్సిటీ యాజమాన్యం అక్షయ్ తండ్రి శ్రీనివాస్‌ను వేదికపై శాలువాతో ఘనంగా సన్మానించింది. క్రీడల్లో విద్యార్థులు రాణించేలా తల్లిదండ్రులు ఇచ్చే ప్రోత్సాహం ఎంతో అభినందనీయమని ప్రో ఛాన్స్ లర్ సతీష్ రెడ్డి కొనియాడారు.
​క్రీడల్లో రాణిస్తూ కళాశాలకు, రాప్తాడు ప్రాంతానికి మంచి పేరు తెస్తున్న అక్షయ్ సాగర్‌ను వర్సిటీ అధ్యాపకులు, తోటి విద్యార్థులు, స్థానిక ప్రముఖులు, ప్రజలు అభినందించారు.