కౌంటర్‌ దాఖలు చేయాలని విజయమ్మ, షర్మిలకు ఎన్‌సీఎల్‌టీ ఆదేశం
విశాలాంధ్ర బ్యూరో – అమరావతి: షేర్ల బదిలీ అంశంపై తల్లి, చెల్లిపై ఎన్‌సీఎల్‌సీ కోర్టును ఆశ్రయించిన మాజీ ముఖ్యమంత్రి జగన్‌మోహన్‌ రెడ్డి పిటిషన్‌పై విచారణ డిసెంబరు 13వ తేదీకి వాయిదా పడిరది. హైదరాబాద్‌లోని నేషనల్‌ కంపెనీ లా ట్రిబ్యునల్‌లో సరస్వతీ పవర్‌ కేసుకు సంబంధించి జగన్‌ పిటిషన్‌పై శుక్రవారం విచారణ జరిగింది. తనకు తెలియకుండా తల్లి, సోదరి అక్రమంగా షేర్లు బదిలీ చేసుకున్నారని అందులో పేర్కొన్నారు. విజయమ్మ, షర్మిల, జనార్దన్‌రెడ్డిని ప్రతివాదులుగా చేర్చారు. షేర్ల బదిలీ ఫారాలు, ఇతర డాక్యుమెంట్లు ఏమీ సమర్పించకుండానే తమ పేర్ల మీదకు మార్చుకున్నారని జగన్‌ తన పిటిషన్‌లో పేర్కొన్నారు. జగన్‌, భారతి, క్లాసిక్‌ రియాల్టీ పేరిట షేర్లు కొనసాగేలా ఆదేశించాలని జగన్‌ కోరారు. 51.01 శాతం షేర్లను యథావిధిగా కొనసాగేలా ఆదేశాలు ఇవ్వాలని విజ్ఞప్తి చేశారు. దీనిపై కౌంటర్‌ దాఖలు చేయాలని కోర్టు ప్రతివాదులను ఆదేశించగా… విజయమ్మ, షర్మిల తరపు న్యాయవాది తమకు కొంత సమయం కావాలని కోరారు. దీంతో విచారణను ఎన్‌సీఎల్‌టీ డిసెంబర్‌ 13వ తేదీకి వాయిదా వేసింది. ఇక ప్రతివాదులుగా ఉన్న వైఎస్‌ విజయమ్మ, వైఎస్‌ షర్మిల వాదనలను కూడా కోర్టు వినాల్సి ఉంటుంది. ఎంవోయూ రాసుకున్న తర్వాత ఎలాంటి సమాచారం లేకుండా షేర్లు ఎలా వెనక్కి తీసుకుంటారంటూ విజయమ్మ, షర్మిల ప్రశ్నిస్తున్నారు. ‘తన సోదరిపై ఉన్న ప్రేమతో 2019లో ఎంవోయూ రాసుకున్నాం. అయితే ఇటీవల కాలంలో మా మధ్య రాజకీయ విభేదాలు ఏర్పడ్డాయి. ముఖ్యంగా నన్ను, నా భార్యను టార్గెట్‌ చేస్తూ షర్మిల వ్యాఖ్యలు చేశారు. అందుకే ప్రస్తుతం 51 శాతంగా ఉన్న ఆమె షేర్లను వెనక్కి తీసుకోవాలనుకుంటున్నాను. అందుకు నాకు అనుమతి ఇవ్వాలి’ అని జగన్‌ తన పిటిషన్‌లో పేర్కొన్నారు.
