దేశంలో నైరుతి రుతుపవనాలు రెండో దశలో వర్షాలు తగ్గే అవకాశముందని భారత వాతావరణ శాఖ (ఐఎండీ) వెల్లడించింది.ఆగస్టు నుంచి సెప్టెంబర్ వరకు కొనసాగే ద్వితీయార్ధంలో దేశవ్యాప్తంగా సాధారణం కంటే తక్కువ వర్షపాతం నమోదయ్యే అవకాశం ఉందని శుక్రవారం విడుదల చేసిన నెలవారీ అంచనాల్లో పేర్కొంది.ఐఎండీ అంచనా ప్రకారం ఈ కాలంలో వర్షపాతం దీర్ఘకాలిక సగటు (Long Period Average-LPA)లో 94 శాతం కంటే తక్కువగా ఉండే అవకాశముంది.ఎల్పీఏ అంటే ఒక నిర్దిష్ట ప్రాంతంలో నెల లేదా రుతువు వంటి నిర్ణీత కాలంలో నమోదయ్యే సగటు వర్షపాతం. సాధారణంగా 30 నుంచి 50 సంవత్సరాల కాలానికి సంబంధించిన గణాంకాల ఆధారంగా ఈ సగటును లెక్కిస్తారు.
తక్కువ వర్షపాతం నమోదయ్యే అవకాశం
1971 నుంచి 2020 వరకు నమోదైన వర్షపాతం గణాంకాల ప్రకారం, దేశవ్యాప్తంగా ఆగస్టు-సెప్టెంబర్ నెలల్లో నమోదయ్యే దీర్ఘకాలిక సగటు వర్షపాతం 422.8 మిల్లీమీటర్లుగా ఉంది.ఐఎండీ డైరెక్టర్ జనరల్ ఆఫ్ మెటియోరాలజీ డాక్టర్ మృత్యుంజయ మహాపాత్ర మాట్లాడుతూ, ఆగస్టు-సెప్టెంబర్ కాలంలో దేశంలోని అనేక ప్రాంతాల్లో సాధారణం కంటే తక్కువ వర్షాలు కురిసే అవకాశం ఉందని స్పష్టం చేశారు.అయితే అన్ని ప్రాంతాల్లో ఇదే పరిస్థితి ఉండదని ఆయన తెలిపారు.
దేశవ్యాప్తంగా 13 శాతం వర్షపాతం లోటు
దక్షిణ భారతదేశం, మధ్య భారతదేశం, వాయువ్య భారతదేశంలోని ఉత్తర ప్రాంతాలు, అలాగే తూర్పు, ఈశాన్య భారతదేశంలోని కొన్ని ప్రాంతాల్లో మాత్రం సాధారణం లేదా సాధారణం కంటే ఎక్కువ వర్షపాతం నమోదయ్యే అవకాశం ఉందని వెల్లడించారు.ఇదిలా ఉండగా, జూన్-జూలై మధ్యకాలంలో దేశవ్యాప్తంగా 13 శాతం వర్షపాతం లోటు నమోదైంది.జూన్ నెలాఖరు నాటికి ఈ లోటు 35.4 శాతంగా ఉన్నప్పటికీ, జూలైలో కురిసిన విస్తృత వర్షాల కారణంగా వర్షపాతం లోటు గణనీయంగా తగ్గిందని డాక్టర్ మృత్యుంజయ మహాపాత్ర వివరించారు.
