స్పెయిన్ సరిహద్దుల్లో వేలాది మంది వలసదారుల ప్రవాహం, అమెరికాలో అక్రమ వలసలపై కొనసాగుతున్న రాజకీయ చర్చల నేపథ్యంలో అమెరికా అధ్యక్షుడు డొనాల్డ్ ట్రంప్ మరోసారి వలసల అంశాన్ని ప్రస్తావించారు.స్పెయిన్లోని సియుటా ప్రాంతంలో చోటుచేసుకున్న భారీ వలస సంక్షోభాన్ని ఉదాహరణగా చూపిస్తూ, ఇటువంటి పరిస్థితులు భవిష్యత్లో అమెరికాలోనూ పునరావృతమయ్యే ప్రమాదం ఉందని ఆయన హెచ్చరించారు. ఆ దృశ్యాన్ని గుర్తుంచుకోండి.తప్పు విధానాలు కొనసాగితే మరో మూడేళ్లలో అమెరికాలోనూ ఇదే పరిస్థితి రావొచ్చని ట్రంప్ వ్యాఖ్యానించారు.సియుటాలో చోటుచేసుకున్న పరిణామాలను ప్రస్తావిస్తూ, సరిహద్దు భద్రతను మరింత బలోపేతం చేయడంతో పాటు అక్రమ వలసలను కట్టడి చేయడానికి కఠిన చర్యలు అవసరమని ఆయన స్పష్టం చేశారు.
అక్రమ వలసలపై ట్రంప్ మళ్లీ ఆందోళన
అక్రమ వలసల నియంత్రణ అనేది ట్రంప్ రాజకీయ అజెండాలో ప్రారంభం నుంచే కీలక అంశంగా కొనసాగుతోంది.అమెరికా-మెక్సికో సరిహద్దు ద్వారా పెద్ద సంఖ్యలో అక్రమ వలసదారులు ప్రవేశిస్తున్నారంటూ ఆయన గతంలోనూ తీవ్ర విమర్శలు చేశారు.సరిహద్దు భద్రతను కట్టుదిట్టం చేయాలని, అక్రమంగా దేశంలోకి ప్రవేశించే వారిపై కఠిన చర్యలు తీసుకోవాలని పదేపదే డిమాండ్ చేశారు.స్పెయిన్లోని సియుటా ఘటనను కూడా అదే వాదనకు బలంగా వినియోగిస్తూ, నియంత్రణ లేని వలసలు ఏ దేశానికైనా సామాజిక, ఆర్థిక, భద్రతాపరమైన సవాళ్లను తీసుకొస్తాయని ట్రంప్ అభిప్రాయపడ్డారు.
అసలేం జరిగింది?
ఉత్తర ఆఫ్రికాలోని మొరాకో నుంచి స్పెయిన్కు చెందిన చిన్న భూభాగమైన సియుటాలోకి గత రెండు రోజులుగా వేలాది మంది వలసదారులు ఒకేసారి ప్రవేశించేందుకు ప్రయత్నించారు.యూరప్లోకి వెళ్లాలనుకునే వలసదారులకు సియుటా కీలక ప్రవేశ మార్గంగా మారింది. గురువారం నుంచి సరిహద్దు వద్ద పరిస్థితి ఉద్రిక్తంగా మారింది.పెద్ద సంఖ్యలో ప్రజలు సరిహద్దు కంచెలు దాటేందుకు ప్రయత్నించగా, భద్రతా బలగాలు రంగంలోకి దిగాయి. కొందరు సముద్ర మార్గంలో ఈదుకుంటూ స్పెయిన్ భూభాగంలోకి చేరేందుకు ప్రయత్నించారు.ఈ ఘటనలలో కనీసం 57 మంది ప్రాణాలు కోల్పోయినట్లు సియుటా ప్రాంత అధ్యక్షుడు జువాన్ జీసస్ వివాస్ వెల్లడించారు.కొందరు సముద్రంలో మునిగి మరణించగా, మరికొందరు సరిహద్దు కంచెల వద్ద జరిగిన తొక్కిసలాటలో మృతి చెందినట్లు అధికారులు తెలిపారు.
24 గంటల్లో 60 వేల మంది?
ప్రాంతీయ అధికారుల అంచనా ప్రకారం గత 24 గంటల్లోనే సుమారు 60 వేల మంది సియుటాలోకి ప్రవేశించారు.అయితే స్పెయిన్ అంతర్గత మంత్రిత్వ శాఖ ప్రకారం గురువారం నుంచి ఇప్పటివరకు సుమారు 50 వేల మంది మాత్రమే సరిహద్దు దాటినట్లు అంచనా.వీరిలో చాలా మందిని తిరిగి మొరాకోకు పంపించినట్లు స్పెయిన్ అధికారులు వెల్లడించారు.ఇప్పటికే 48 వేల మందికిపైగా తిరిగి మొరాకోకు వెళ్లిపోయారని, మరికొందరు కూడా గంటల వ్యవధిలో వెనక్కి వెళ్తున్నారని అంతర్గత మంత్రిత్వ శాఖ తెలిపింది.
ఎందుకు ఒక్కసారిగా పెరిగింది వలసల ప్రవాహం?
సియుటా వైపు ఇంత భారీ సంఖ్యలో వలసదారులు రావడానికి ప్రధాన కారణం యూరప్లోకి ప్రవేశించేందుకు ఇది సులభ మార్గంగా భావించడమే.ఆఫ్రికాలోని పేదరికం, నిరుద్యోగం, రాజకీయ అస్థిరత, మెరుగైన జీవితం కోసం చేసే ప్రయత్నాలు వేలాది మందిని యూరప్ వైపు నడిపిస్తున్నాయి.అయితే ఒకేసారి ఇంత పెద్ద సంఖ్యలో సరిహద్దు దాటే ప్రయత్నం జరగడం అసాధారణమని అధికారులు పేర్కొంటున్నారు.మానవ అక్రమ రవాణా ముఠాలు కూడా వలసదారులను ప్రేరేపిస్తున్నాయని స్పెయిన్ ప్రధాని పెడ్రో శాంచెజ్ ఆరోపించారు.
స్పెయిన్ చర్యలు.. యూరప్లో ఆందోళన
పరిస్థితిని అదుపులోకి తీసుకురావడానికి స్పెయిన్ ప్రభుత్వం అదనపు భద్రతా బలగాలను సియుటాకు పంపించింది.సైన్యం, పోలీసులు, డ్రోన్లు, సముద్ర భద్రతా దళాలను మోహరించింది. ఈ ఘటనపై యూరోపియన్ యూనియన్ కూడా స్పందించింది.యూరప్ వలస నిబంధనలను పాటించకుండా ఎవరినీ అనుమతించబోమని యూరోపియన్ కమిషన్ అధ్యక్షురాలు ఉర్సులా వాన్ డెర్ లెయెన్ స్పష్టం చేశారు.స్పెయిన్లోని సియుటా సంక్షోభం ఇప్పుడు కేవలం ఆ దేశ సమస్యగా కాకుండా, యూరప్ సరిహద్దు భద్రత, ప్రపంచవ్యాప్తంగా పెరుగుతున్న వలసల సంక్షోభంపై మరోసారి విస్తృత చర్చకు దారితీసింది.ట్రంప్ తాజా వ్యాఖ్యలతో ఈ అంశం అమెరికా రాజకీయాల్లోనూ మళ్లీ ప్రాధాన్యం సంతరించుకుంది.
