7 నుంచి అమెరికాలో దేశీయ విమాన ప్రయాణాలకు రియల్ ఐడీ తప్పనిసరి
అది లేకుంటే పాస్పోర్ట్ వంటి ఆమోదిత గుర్తింపు కార్డు చూపించాల్సిందే
నిబంధన పాటించకుంటే ప్రయాణానికి అనుమతి నిరాకరణ
అమెరికా సంయుక్త రాష్ట్రాల్లో దేశీయ విమానాల్లో ప్రయాణించే వారికి కీలక అప్డేట్ ఇది. ఈ నెల 7వ తేదీ నుంచి ప్రయాణికులు తప్పనిసరిగా ఃరియల్ ఐడీఃని కలిగి ఉండాలని యూఎస్ డిపార్ట్మెంట్ ఆఫ్ హోమ్ల్యాండ్ సెక్యూరిటీ (డీహెచ్ఎస్) స్పష్టం చేసింది. ఈ కొత్త నిబంధన అమల్లోకి వచ్చిన తర్వాత, దేశీయ విమానాశ్రయాల్లో భద్రతా తనిఖీల వద్ద రియల్ ఐడీని చూపించాల్సి ఉంటుంది.
రియల్ ఐడీ అంటే ఏమిటి?
ప్రభుత్వాలు జారీ చేసే డ్రైవర్ లైసెన్స్ లేదా స్టేట్ ఐడీ కార్డుపై ప్రత్యేకంగా స్టార్ గుర్తు, ఫ్లాగ్ గుర్తు లేదా ఎన్హాన్స్డ్ అని మార్క్ చేసి ఉంటే దానిని ఃరియల్ ఐడీఃగా పరిగణిస్తారు. డీహెచ్ఎస్ ప్రకారం ఈ రియల్ ఐడీ కేవలం విమాన ప్రయాణాలకే కాకుండా కొన్ని ఎంపిక చేసిన ఫెడరల్ భవనాల్లోకి ప్రవేశించడానికి కూడా ఇది అవసరం అవుతుంది.
నిబంధనలు పాటించకుంటే?
ఒకవేళ ప్రయాణికులు సమర్పించే స్టేట్ ఐడీ లేదా డ్రైవర్ లైసెన్స్ రియల్ ఐడీ ప్రమాణాలకు అనుగుణంగా లేకపోతే, చెల్లుబాటు అయ్యే పాస్పోర్ట్ వంటి ఇతర ఆమోదిత గుర్తింపు పత్రాన్ని చూపించాల్సి ఉంటుందని ాన్యూయార్క్ పోస్ట్్ణ నివేదించింది. రియల్ ఐడీ లేదా దానికి ప్రత్యామ్నాయంగా టీఎస్ఏ (ట్రాన్స్పోర్టేషన్ సెక్యూరిటీ అడ్మినిస్ట్రేషన్) ఆమోదించిన గుర్తింపు కార్డు లేని ప్రయాణికులను సెక్యూరిటీ చెక్పాయింట్ వద్దే నిలిపివేసే అవకాశం ఉందని, అదనపు స్క్రీనింగ్కు కానీ, లేదా ప్రయాణానికి అనుమతి నిరాకరించవచ్చని డీహెచ్ఎస్ తన వెబ్సైట్లో పేర్కొంది.
ప్రత్యామ్నాయ గుర్తింపు కార్డులు
18 ఏళ్లు పైబడిన ప్రయాణికులు రియల్ ఐడీని కలిగి ఉండాలి. ఒకవేళ అది లేకపోతే, టీఎస్ఏ ఆమోదించిన కింది గుర్తింపు కార్డులలో ఏదైనా ఒకటి చెల్లుబాటు అవుతుంది
యూఎస్ పాస్పోర్ట్
రాష్ట్ర ప్రభుత్వం జారీ చేసిన ఎన్హాన్స్డ్ డ్రైవర్ లైసెన్స్
డీహెచ్ఎస్ ట్రస్టెడ్ ట్రావెలర్ కార్డులు (గ్లోబల్ ఎంట్రీ, నెక్సస్, సెంట్రీ, ఫాస్ట్)
యూఎస్ డిపార్ట్మెంట్ ఆఫ్ డిఫెన్స్ ఐడీ (డిపెండెంట్ ఐడీలతో సహా)
పర్మనెంట్ రెసిడెంట్ కార్డ్ (గ్రీన్ కార్డ్)
బార్డర్ క్రాసింగ్ కార్డ్
విదేశీ ప్రభుత్వం జారీచేసిన పాస్పోర్ట్
కెనడియన్ ప్రొవిన్షియల్ డ్రైవర్ లైసెన్స్ లేదా ఇండియన్ అండ్ నార్తర్న్ అఫైర్స్ కెనడా కార్డ్
ట్రాన్స్పోర్టేషన్ వర్కర్ ఐడెంటిఫికేషన్ క్రెడెన్షియల్ (టీడబ్ల్యూఐసీ)
యూఎస్సీఐఎస్ ఎంప్లాయ్మెంట్ ఆథరైజేషన్ కార్డ్ (ఫారం I-766)
వెటరన్ హెల్త్ ఐడెంటిఫికేషన్ కార్డ్ (వీహెచ్ఐసీ)
