22 ఏళ్ల విద్యార్థి సాహిల్ వాకోడే మృతిపై గతంలో చేసిన ప్రకటనకు ఐఐటీ బాంబే క్షమాపణలు తెలిపింది.వాకోడే మృతికి దారితీసిన పరిస్థితులు, ఘటనకు సంబంధించిన పూర్తి వివరాలపై అధికారుల దర్యాప్తు ఇంకా కొనసాగుతోందని సంస్థ స్పష్టం చేసింది. ఈ మేరకు తాజాగా విడుదల చేసిన నోటీసులో.. సాహిల్ వాకోడే దురదృష్టకర మృతికి సంబంధించిన పరిస్థితులపై గతంలో ఇచ్చిన ప్రకటనలోని అంశాలకు క్షమాపణలు చెబుతున్నామని ఐఐటీ బాంబే పేర్కొంది.
వాకోడే మృతిపై గతంలో ఏం చెప్పిందంటే?
ఎనర్జీ సైన్స్ అండ్ ఇంజినీరింగ్ రెండో సంవత్సరం చదువుతున్న వాకోడే సెప్టెంబర్ 19న ఆత్మహత్య చేసుకున్నట్లు ఐఐటీ బాంబే గతంలో ప్రకటించింది.పరీక్ష సమయంలో అతడు మొబైల్ ఫోన్ ఉపయోగించి ప్రశ్నపత్రాన్ని చాట్జీపీటీలో అప్లోడ్ చేసి సమాధానాలు పొందేందుకు ప్రయత్నించినట్లు కూడా ఆ ప్రకటనలో పేర్కొంది.అయితే ఆ ఘటనపై అతడిపై ఎలాంటి క్రమశిక్షణ చర్యలు తీసుకోలేదని సంస్థ తెలిపింది.
400 మందికిపైగా విద్యార్థుల ఆందోళన
ఈ ఘటనపై ఐఐటీ బాంబేలో విద్యార్థులు ఆందోళనకు దిగారు. 400 మందికిపైగా విద్యార్థులు సంస్థ యాజమాన్యం జవాబుదారీతనం వహించాలని డిమాండ్ చేశారు.వాకోడేకు ఏడాది పాటు సస్పెన్షన్ విధిస్తామని బెదిరించారని, అదే జరిగితే అతడి చదువు పూర్తయ్యే సమయం ఆలస్యమయ్యేదని వారు ఆరోపించారు.ఈ విషాద ఘటనతో ప్రభావితమైన వారికి అవసరమైన సహాయాన్ని అందిస్తామని ఐఐటీ బాంబే హామీ ఇచ్చింది.వాకోడే మృతికి దారితీసిన పరిస్థితులపై దర్యాప్తు చేస్తున్నట్లు తెలిపింది.
ఏడు నెలల్లో క్యాంపస్లో మూడో విద్యార్థి మృతి
గత ఏడు నెలల్లో ఐఐటీ బాంబే క్యాంపస్లో విద్యార్థి ఆత్మహత్యకు పాల్పడిన మూడో ఘటన ఇది.ఈ ఏడాది ఫిబ్రవరి, జులైలో మరో ఇద్దరు విద్యార్థులు మృతిచెందారు.తాజా ఘటనతో ప్రభావితమైన వాకోడే స్నేహితులు, సహ విద్యార్థులు, అధ్యాపకులు, ఇతరులకు అవసరమైన సహాయాన్ని అందిస్తామని యాజమాన్యం తెలిపింది.ఇదిలా ఉండగా.. వాకోడే తల్లిదండ్రులు ఇచ్చిన ఫిర్యాదు ఆధారంగా ముంబయి పోలీసులు నమోదు చేసిన ఎఫ్ఐఆర్లో ప్రొఫెసర్ సూర్యనారాయణ దూల్లా పేరును చేర్చారు.వాకోడేను కులం ఆధారంగా వేధించారని అతడి తల్లిదండ్రులు ఫిర్యాదులో ఆరోపించారు. ఈ కేసుపై ప్రస్తుతం ముంబయి క్రైమ్ బ్రాంచ్ దర్యాప్తు చేస్తోంది.
