దేశం ఆయనను క్షమాపణ అడుగుతుంటే.. ఆయనే దేశాన్ని క్షమించేశారు

: మోదీపై కాంగ్రెస్ ఫైర్

నీట్ నిరసనలపై ప్రధాని మోదీ వీడియో సందేశం
తప్పుదోవ పట్టిన విద్యార్థులను క్షమిస్తున్నానని ప్రకటన
మోదీ వ్యాఖ్యలపై కాంగ్రెస్ పార్టీ తీవ్రస్థాయిలో విమర్శలు
దేశం మొత్తం నీట్ అక్రమాలపై ప్రధాని నరేంద్ర మోదీ నుంచి క్షమాపణ కోరుతుంటే, ఆయనే స్వయంగా విద్యార్థులను క్షమిస్తున్నానంటూ వీడియో విడుదల చేయడంపై కాంగ్రెస్ పార్టీ తీవ్ర ఆగ్రహం వ్యక్తం చేసింది. “దేశం ఆయనను క్షమాపణ అడుగుతుంటే.. ఆయనే దేశాన్ని క్షమించేశారంటూ” కాంగ్రెస్ మీడియా విభాగం హెడ్ పవన్ ఖేరా ఎక్స్ వేదికగా ఎద్దేవా చేశారు.

నీట్ అక్రమాలపై జరుగుతున్న నిరసనల సందర్భంగా జంతర్ మంతర్ వద్ద తనను, తన దివంగత తల్లిని కూడా దూషించారని మోదీ తన వీడియో సందేశంలో పేర్కొన్నారు. ఇలాంటి తప్పుదోవ పట్టిన పిల్లలను కోర్టుకు ఈడ్చడం వల్ల సమస్య పరిష్కారం కాదు. బదులుగా వారిని క్షమించాలని నేను కోరుకుంటున్నాను అని ఆయన అన్నారు.

ప్రధాని మోదీ వీడియోను ట్యాగ్ చేస్తూ కాంగ్రెస్ మీడియా విభాగం హెడ్ పవన్ ఖేరా ఎక్స్ వేదికగా స్పందించారు.” ఇది వినండి. దేశం ఆయనను క్షమాపణ అడుగుతుంటే.. ఆయనే దేశాన్ని క్షమించేశారు.” అని తన పోస్టులో వ్యంగ్యాస్త్రాలు సంధించారు. శుక్రవారం రాత్రి ఇన్‌స్టాగ్రామ్‌లో విడుదల చేసిన మరో వీడియో సందేశంలో మోదీ మాట్లాడుతూ.. సమాజంలోని ఆవేదనను తాను అర్థం చేసుకోగలనని అన్నారు. జంతర్ మంతర్‌లో నన్ను మాత్రమే కాదు, నా దివంగత తల్లిని కూడా దూషించారు. కానీ దూషణలు దేన్నీ పరిష్కరించవు. తప్పుదోవ పట్టిన వారికి మనం మార్గనిర్దేశం చేద్దాం అని ఆయన తెలిపారు. విద్యార్థులను శిక్షించడం సరైన పద్ధతి కాదని, వారు మన పిల్లలే కాబట్టి క్షమించి సరైన మార్గం చూపించడం మన కర్తవ్యమని మోదీ స్పష్టం చేశారు.