భారత క్రికెట్ దిగ్గజం సచిన్ టెండూల్కర్ కుమారుడు అర్జున్ టెండూల్కర్ (Arjun Tendulkar) వివాహ బంధంలోకి అడుగుపెట్టాడు.వ్యాపార రంగంలో ఉన్న సానియా చందోక్ (Sania Chandok)ను ఆయన పెళ్లి చేసుకున్నారు.ముంబై నగరంలో జరిగిన ఈ వివాహ వేడుక అద్భుతంగా, ఘనంగా నిర్వహించారు.
కొత్త జంటను ఆశీర్వదించేందుకు క్రీడా, సినీ రంగాలకు చెందిన ప్రముఖులతో పాటు పలువురు రాజకీయ నాయకులు కూడా పెద్ద సంఖ్యలో హాజరయ్యారు.గత సంవత్సరం ఆగస్టు 25న అర్జున్ టెండూల్కర్, సానియా చందోక్ల నిశ్చితార్థం జరిగింది.
మార్చి నెల ప్రారంభంలోనే పెళ్లికి సంబంధించిన ముందస్తు వేడుకలు ప్రారంభమయ్యాయి.
ఈ కార్యక్రమాల్లో సచిన్ టెండూల్కర్, అంజలి టెండూల్కర్ దంపతులు,కుటుంబ సభ్యులు ఉత్సాహంగా పాల్గొన్నారు.
బంధుమిత్రులు, ఆత్మీయుల సమక్షంలో దక్షిణ ముంబైలో అర్జున్-సానియా వివాహం ఎంతో అంగరంగ వైభవంగా జరిగింది.ఈ శుభ సందర్భంలో కొత్త దంపతులను ఆశీర్వదించేందుకు పలువురు మాజీ క్రికెటర్లు పెద్ద సంఖ్యలో విచ్చేశారు.భారత మాజీ కెప్టెన్ మహేంద్రసింగ్ ధోనీ తన భార్య సాక్షితో కలిసి ఈ వేడుకకు హాజరయ్యారు.అంతేకాకుండా సీనియర్ క్రికెటర్ సునీల్ గవాస్కర్, భారత మాజీ కోచ్లు రాహుల్ ద్రావిడ్, అనిల్ కుంబ్లే, రవి శాస్త్రి కూడా కొత్త జంటకు ఆశీర్వాదాలు అందించారు.టీమిండియా ప్రస్తుత ప్రధాన కోచ్ గౌతమ్ గంభీర్, మాజీ ఆల్రౌండర్,తృణమూల్ కాంగ్రెస్ ఎంపీ యూసుఫ్ పఠాన్ తమ కుటుంబ సభ్యులతో కలిసి ఈ వేడుకలో పాల్గొన్నారు.
