చదువు చెప్పబడదు
ఇక్కడ సీటుకింతనివెల నిర్ణయించి
చదువును అమ్మబడును
విద్యనెవరు దొంగలించలేరు
ఇది పురాతన నిర్వచనం
విద్యలో గజదొంగలుపడడం
ఇప్పటి నవీన ఆశీర్వచనం
నాడైనా ఏనాడైనా
ర్యాంకుల కట్టు కొయ్యకు
మనమే మనమే ఫస్ట్‌ ఫస్ట్‌
పరీక్షా ఫలితాల యజ్ఞంలో
ముక్కుపచ్చలారని విద్యార్థులే
ఆత్మహత్యల యజ్ఞ సమిధలు
బంజరుదొడ్డి విద్యలో
ప్రభుత్వ విద్య తప్పిపోయింది
వాచకంలోని అక్షరాలు
ప్రైవేట్‌ గాలివానకు
నేలరాలిన వడ్లగింజల కన్నీళ్లు
బాలశిక్ష కక్షగట్టి పిల్లల
బాల్యానికి శిక్షలు వేస్తున్నది
తల్లి ఒడిలాంటి బడి
పలక బలపాన్ని సడిచేయక
వడి వడిగా కాజేస్తున్నది
తొండ ముదిరి ఊసరవెల్లిలా
ప్రైవేటు యజమానులు
రాజకీయ అవతారం ఎత్తుతారు
అదే రూపాన్ని చాలిస్తే
అనుబంధ పార్టీల స్పాన్సర్లు
ఇక్కడ చదువులు అమ్మబడును
సీటుకింతని బంజరు దొడ్డి
చదువుకు జరిమానా విధించబడును
-జూకంటి జగన్నాథం,
94410 78095
