ఎర్రశాలువ కప్పుకొని
మాయింటికొచ్చిందో కబూతర్‌
ఉద్యమించే వాళ్ళకోసం
మోసుకొచ్చిందో ఖబర్‌
మగత నిద్రలో మునిగినోళ్ళను
మేలుకొల్పులు పాడుతూ
లేలెండనంటోందీ ఖబర్‌
కదలండనంటోందీ ఖబర్‌
గగనవీధిలో కమ్ముకొచ్చే
ఫాసిజం మేఘాలు అవిగో
ఉరుములూ పిడుగులను రాల్చే
నాజీజం వడగళ్ళు అవిగో
మగత నిద్రలో జోగితే ఇక
మానవత్వం మసినుసే
లెండి ఇక లేలెండిరండని
హెచ్చరిస్తోందీ ఖబర్‌ ॥
జాతిజాతని హుంకరిస్తూ
మతం గొప్పలు బొబ్బరిస్తూ
మనువురాతలె శరణమంటూ
మనుషులను చీల్చే కుయత్నాల్‌
చూసిలెండని ఆపరండని హెచ్చరిస్తోందీ ఖబర్‌ ॥ ప్రభుత లోపాల్‌ చూసిచెప్తూ మనిషి హక్కుకు ప్రశ్నలేస్తే దేశద్రోహని ముద్రవేసే నోళ్ళునొక్కీ కుళ్ళబొడిచి జైళ్ళతోసే ప్రభుత తీరును చూసిలెండని కదిలిరండని
హెచ్చరిస్తోందీ ఖబర్‌ ॥
విపక్షాలను చీలగొడ్తూ
ప్రభుత్వాలను కూలదోస్తూ
ప్రజాస్వామ్యం నేలరాస్తూ
సాటి దేశాల్‌ వరసలో జన
స్వామ్య దేశం ఇదేనంటూ
ఫాసిజం నాజీల భక్తుల
మాయమాటల దుష్టచేష్టల
వేయినోళ్ళా ప్రచారాలా
నిగ్గుతేల్చీ ఎండగట్టే
సమయమిక వచ్చిందనంటూ
హెచ్చరిస్తోందీ ఖబర్‌ ॥
ఎర్రజండాలొక్కటై
కదలాలిరండని పిలుపునిస్తూ
కలిసివచ్చే జనంతోడై
పోరుకెళ్దాం పదండంటూ
ఊరువాడా హెచ్చరిస్తూ
చెప్పిపోతోందీ ఖబర్‌
ఎర్రశాలువ కప్పుకొన్న కబూతర్‌
అలసటెరుగక తిరుగుతోందీ కబూతర్‌
(శ్రీశ్రీ యాదిలో)
`ఏటుకూరి ప్రసాద్‌
ఎర్రశాలువ కబూతర్‌
