డా. యం. సురేష్‌ బాబు
ఈ మధ్య కొన్ని జాతీయ అంతర్జాతీయ సంస్థలు కేవలం డబ్బే పరమావధిగా ఎవరికి పడితే వారికి అవార్డులు బహుకరిస్తున్నారు. మీరు యాభై వేల నుంచి ఐదు లక్షలు పెట్టుకోగలిగితే మీకు గౌరవ డాక్టరేట్‌ ప్రధానం చేస్తారు. గౌరవ డాక్టరేట్‌ కావాలంటే 50,000 నుండి ఐదు లక్షల మధ్య ఎక్కడైనా ఖర్చు చేసి, సర్టిఫికెట్‌ని మీ ఇంటి వద్దకే డెలివరీ చేసుకోవచ్చు. ఇతర రాష్ట్రాలు విదేశాల్లో ఉన్నాయని చెప్పుకునే దాదాపు వందల ‘‘విశ్వవిద్యాలయాలు’’ దేశంలో నకిలీ డాక్టర్‌ ఆఫ్‌ లెటర్స్‌ డి లిట్‌ సర్టిఫికేట్‌లను విక్రయిస్తున్నట్లు కనుగొన్నారు. గ్రహీతలలో విద్యాశాఖలోని సీనియర్‌ అధికారులు, పాఠశాల ఉపాధ్యాయులు, స్వచ్చంధ సేవాసంస్థలో పనిచేసేవారు రాజకీయ నాయకులు, వ్యాపారవేత్తలు తమ పేరు ముందు ‘డాక్టర్‌.’ను ఇష్టపడే వారు ఉన్నారు, వారి పేరుకు ముందు డాక్టర్‌ ట్యాగ్‌ చేసుకోవడానికి డబ్బులు ఖర్చు చేస్తున్నారు. ఈ కల్పిత విశ్వవిద్యాలయాలు ప్రజలను ఆకర్షించడానికి పాఠశాలలు, కళాశాలలు, జిల్లా విద్యా, శిక్షణా సంస్థల కార్యాలయాలకు ఈ మెయిల్స్‌పంపి, స్వయంగా సంప్రదించి గౌరవ డాక్టరేట్ల ప్రదానోత్సవం ఘనంగా నిర్వహించి మరుసటిరోజు దానిని వివిధ వార్తపత్రికలలో ప్రచురితం చేస్తుంటారు. ఈ మధ్యకాలంలో స్థిర వ్యాపారాలలో ఖాతాదారులకు కుచ్చుటోపీ పెట్టిన వారు, చిట్‌ ఫండ్‌ కంపెనీలు పెట్టి డబ్బు ఇవ్వకుండా ఎగనామం పెట్టిన వారికి, అలాగే నాన్‌ బ్యాంకింగ్‌ ఫైనాన్స్‌ కంపెనీలుపెట్టి బోర్డు తిప్పేసిన వారికి ఉత్తమ వ్యాపారవేత్త అవార్డు ఆంధ్ర ఆణిముత్యం అవార్డుఇచ్చి సత్కరిస్తున్నారు. ఈ అభ్యాసాన్ని అరికట్టాలని కేంద్ర రాష్ట్ర ప్రభుత్వాలకు ఎన్నిసార్లు మొరపెట్టుకున్నా ప్రయోజనంలేదు.
మరికొన్ని నకిలీ విశ్వవిద్యాలయాలు, సంస్థలు బోధనలో ఉన్న ప్రొఫెసర్లకు సందేశాలు పంపుతుంటారు. ప్లాట్‌ఫారమ్‌లో, రీసర్చ్‌ సైట్‌లో మీ పరిశోధనను గుర్తించడం ద్వారా మీరు సమాజానికి అందించిన సహకారం కోసం మేము మీ కృషిని అభినందిస్తున్నాము, ప్రోత్సహించాలనుకుంటున్నాము మీరు వెయ్యి డాలర్లు పంపితే మీకు ఆన్‌లైన్‌ ద్వారా ఒక మెమొంటో, ప్రశంసాపత్రం అందజేస్తాం అని ఉంటుంది. ఇంటర్నేషనల్‌ సొసైటీ ఫర్‌ సైంటిఫిక్‌ నెట్‌వర్క్‌ అవార్డ్స్‌ అనేది సరికొత్త దోపిడీ అవార్డు సంస్థ. మీరు అవార్డుకు ఎంపికయ్యారని సూచిస్తూ వారు స్పామ్‌ ఇమెయిల్‌లను పంపుతారు.‘‘భారతదేశంలోని తమిళనాడులోని తిరుచిరాపల్లిలోని హోటల్‌ ఫెమినాలోని లోటస్‌ హాల్‌లో హోసూర్‌, బీజాపూర్‌, గుల్బర్గా, బెల్గామ్‌, హుబ్లీ ధార్వాడ్‌, మైసూర్‌ నగరాలలో కొన్ని స్టార్‌ హోటల్స్‌ అద్దెకు తీసుకుని వేడుకలు జరుపుతుంటారు. మనోహరమైన వేడుకలో మీ హై సొసైటీ ఇంటర్నేషనల్‌ రీసెర్చ్‌ అవార్డుకు అవార్డ్‌లు మిమ్మల్ని సాదరంగా స్వాగతిస్తున్నాయి.’’ అదనంగా, మీరు స్వీయ-నామినేట్‌ చేయవచ్చు అలాగే 120 డాలర్లు చెల్లించిన తర్వాత అవార్డును తీసుకోవచ్చు. ఇంటర్నేషనల్‌ రీసెర్చ్‌ రత్న అవార్డు ఇంటర్నేషనల్‌ జర్నల్‌ ఆఫ్‌ రీసెర్చ్‌ అండర్‌ లిటరల్‌ యాక్సెస్‌ నుండి మీరు సైన్‌అప్‌ చేసి రుసుము చెల్లించడం ద్వారా మీరు పొందగలిగే మరొక అవార్డుగా కనిపిస్తుంది. దరఖాస్తు చేసుకోగల అవార్డులు ఇతర వాటిలో ఉన్నాయి. సంవత్సరం ఉత్తమ పరిశోధకుడు, సంవత్సరం ఉత్తమ శాస్త్రవేత్త, సంవత్సరపు ఉత్తమ ప్రొఫెసర్‌ ఎంపికలను స్వంత వర్గాన్ని కూడా తయారు చేసుకోవచ్చు. ఇది భారతదేశంలోని సంస్థ. పొందేది చక్కని ఫోటోఆప్‌, ఫ్రేమ్డ్‌ సర్టిఫికేట్‌, మెడల్‌. డబ్బు చెల్లించే వారు చెన్నై, బెంగుళూరు, ఖాట్మండులోని స్టార్‌ హోటళ్లలో జరిగే స్నాతకోత్సవ వేడుకకు హాజరుకావాలని మొదటగా కోరతారు. ఈ కార్యక్రమానికి డిమాండ్‌లేని వ్యక్తులు హాజరవుతుంటారు. దాని వివరాలు మరుసటిరోజు వార్తాపత్రికలలో కనిపిస్తాయి. మీరు ఈవెంట్‌కు రాలేకపోతే, సర్టిఫికేట్‌ ఇంటికి డెలివరీ చేస్తారు అని చివరకు డబ్బు తీసుకొని ఇంటికి జ్ఞాపిక పంపుతుంటారు.
ఇండియన్‌ వర్చువల్‌ యూనివర్సిటీ యూనివర్సల్‌ తమిళ విశ్వవిద్యాలయం, చెన్నై కింగ్స్‌ యూనివర్సిటీ, యుఎస్‌, అంతర్జాతీయ శాంతి విశ్వవిద్యాలయం, జర్మనీ అంతర్జాతీయ తమిళ విశ్వవిద్యాలయం, యూనివర్సిటీ ఆసియా, ఖాట్మండు, నేపాల్‌, వాణిజ్యంలో నిమగ్నమైన కొన్ని సంస్థలు ఇలాంటి పురస్కారాల ఉత్సవాలు జరుపుతుంటారు. సార్వత్రిక తమిళ విశ్వవిద్యాలయం, కింగ్స్‌ విశ్వవిద్యాలయం వైస్‌ ఛాన్సలర్‌గా ఒకే వ్యక్తిని కలిగి ఉన్నాయి. వాటిలో చాలావరకు భవనాలు, ఇతర సౌకర్యాల కల్పిత చిత్రాలతో వెబ్‌సైట్‌లు ఉన్నాయి. వారిలో కొందరికి పనిచేసే ఏజెన్సీలు కూడా ఉన్నట్లు గుర్తించారు. యూనివర్శిటీ ఆఫ్‌ ఆసియా సర్టిఫికెట్లు బెంగళూరుకు చెందిన డాక్టర్‌. రాధాకృష్ణన్‌ రీసెర్చ్‌ అండ్‌ డెవలప్‌మెంట్‌ సెంటర్‌ ద్వారా పంపిణీ చేస్తారు. గౌరవ డాక్టరేట్లు (డాక్టర్‌ ఆఫ్‌ లెటర్స్‌ లేదా డి.లిట్‌) మంజూరు చేస్తున్న నకిలీ ఆన్‌లైన్‌ విశ్వవిద్యాలయాలు దేశంలో కుప్పలు తెప్పలుగా వెలుగులోకి వస్తున్నా ఏమి పట్టనట్టు యూజీసీ ఉన్నత విద్యాధికారులు ఉన్నారు. చాలామంది సినీ ప్రముఖులు, బిగ్‌బాస్‌ విజేతలు మొదలుకొని చిన్న సంస్థలలో పనిచేసేవారు, ప్రజాసంఘాల నాయకులుసైతం భారీగా పైకం చెల్లించి ఎందుకూ పనికిరాని పత్రాలు, మెమొంటోలు కొనుక్కుంటున్నారు. తాజా బాధితుడు ఒక ప్రముఖ నటుడు, అతను ‘‘గౌరవం’’ కోసం ఎంపికైనట్లు ప్రకటించడానికి రెండు రోజుల క్రితం ప్రెస్‌ మీట్‌ నిర్వహించారు. ఈ నటుడు రాయల్‌ అమెరికన్‌ యూనివర్సిటీ ద్వారా డి.లిట్‌ భారీగా డబ్బులు చెల్లించి కొన్నారు. చివరికి అది నకిలీ సర్టిఫికెట్‌ అని తేలింది.
వెబ్‌సైట్‌ ప్రకారం విశ్వవిద్యాలయం యునైటెడ్‌ స్టేట్స్‌లోని డెలావేర్‌ స్టేట్‌లో ఉంది. అయితే అక్కడ స్టేట్‌ లైబ్రరీ అధికారులతో జరిపిన విచారణలో, అమెరికాలోని గుర్తింపు పొందిన విశ్వవిద్యాలయం, కళాశాల చివరిలో ‘‘.ఇడియు’’తో వెబ్‌ చిరునామాను కలిగి ఉన్నాయనితేలింది. కాబట్టి ఇది కల్పిత విశ్వవిద్యాలయంగా కనిపిస్తుందని పోలీసులు తేల్చి చెప్పారు. డెలావేర్‌లో ఈ పేరుతో విశ్వవిద్యాలయం కానీ కళాశాలకానీ లేదు. విస్తృతంగా శోధించిన తర్వాత, గుర్తింపు పొందిన ఆన్‌లైన్‌ డిగ్రీ ప్రోగ్రామ్‌ల సంకలనంలో రాయల్‌ అమెరికన్‌ యూనివర్శిటీకి సంబంధించిన ప్రస్తావన ఏదీ కనిపించలేదని అధికారులు సమాధానమిచ్చారు. వెబ్‌సైట్‌లో ఇచ్చిన స్థలం కారు మరమ్మతు యూనిట్‌. ఇలాంటి గౌరవ డాక్టరేట్లు, ఆణిముత్యాలు, ఉత్తమ ప్రశంస పత్రాలు డబ్బు తీసుకొని ప్రచురించే సంస్థలపై నిఘా పెట్టి ఇలాంటి ఈవెంట్లు నిర్వహించే వారిని అదుపులోకి తీసుకోవాలి.
ప్రజాసైన్స్‌ వేదిక అధ్యక్షులు
