తెలుగు రాష్ట్రాల్లో వాతావరణం మారిపోయింది. జనాలకు ఎండలు, వేడి గాలుల నుంచి రిలీఫ్‌ దక్కింది. బంగాళాఖాతంలో ఏర్పడిన ఉపరితల ద్రోణి ప్రభావంతో వాతావరణం ఒక్కసారిగా మారిపోయింది. మరో మూడు రోజులు పలు ప్రాంతాల్లో వర్షాలు కురుస్తాయని వాతావరణ శాఖ చెబుతోంది. అలాగే ద్రోణి ప్రభావంతో మంగళవారం శ్రీకాకుళం, మన్యం, విజయనగరం, విశాఖపట్నం, అనకాపల్లి, అల్లూరి, కాకినాడ, కోనసీమ జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు పడే అవకాశం ఉందని.. ప్రజలు అప్రమత్తంగా ఉండాలని విపత్తుల సంస్థ తెలిపింది. మన్యం జిల్లా కొమరాడలో వడగాల్పులు వీచే అవకాశం ఉంది అన్నారు. మరోవైపు మరికాసేపట్లో ఎన్టీఆర్, కృష్ణా, ఏలూరు, గుంటూరు, పల్నాడు జిల్లాల్లో పిడుగులు పడే అవకాశం ఉందని ఏపీ విపత్తుల నిర్వహణ సంస్థ తెలిపింది. ప్రజలెవరూ చెట్ల కింద ఉండరాదని.. రైతులు, గొర్రెల కాపరులు, ప్రజలు అప్రమత్తంగా ఉండాలని సూచించారు.ఉమ్మడి గుంటూరు, విజయవాడ చుట్టు పక్కల ప్రాంతాల్లో వర్షాలు కురుస్తాయని ఏపీ వెదర్ మ్యాన్ అంచనా వేస్తున్నారు. విజయవాడతో పాటుగా ఇబ్రహీంపట్నం, మంగళగిరి ప్రాంతాల్లో ఓ మోస్తరు వానలు పడతాయంటున్నారు పల్నాడు, గుంటూరు ప్రాంతాల్లో కూడా మంచి వర్షాలు ఉంటాయని చెబుతున్నారు. ముఖ్యంగా విజయవాడవాసులు తగిన జాగ్రత్తలు తీసుకోవాలని సూచించారు.ఉభయ గోదావరి జిల్లాల్లో సోమవారం వాన కురసింది. సోమవారం సాయంత్రం ఒక్కసారిగా వాతావరణంలో మార్పు కనిపించింది. ఈదురుగాలులతో కూడిన చిరుజల్లులు కురిశాయి. ఉదయం నుంచి ఎండ ప్రభావం కనిపించగా.. వర్షంతో ప్రజలు కాస్త చల్లటి వాతావరణంతో సేద తీరారు. రాజమండ్రిలో సోమవారం సాయంత్రం వర్షం కురిసింది. ఉదయం నుంచి ఎండతీవ్రత ఉంటే.. సాయంత్రం ఒక్కసారిగా వాన పడింది. నిడదవోలులో సాయంత్రం ఒక్కసారిగా వాతావరణం చల్లబడి గంట పాటు భారీ వర్షం కురిసింది. మరికొన్ని జిల్లాలో కూడా ఇదే పరిస్థితి కనిపించింది. ఈదురు గాలులతో కూడిన భారీ వాన పడింది. అక్కడక్కడా విద్యుత్ సరఫరాకు అంతరాయం కలిగింది.
మరోవైపు తెలంగాణలో కూడా వర్షాలు పడతాయంటోంది వాతావరణశాఖ. మంగళవారం పలు జిల్లాలకు ఆరెంజ్ అలర్ట్ జారీ చేశారు. నల్లగొండ, సూర్యాపేట, యాదాద్రి భువనగిరి, సిద్దిపేట, భద్రాద్రి కొత్తగూడెం, ఖమ్మం, వరంగల్, జనగామతో పాటూ మరికొన్ని జిల్లాలకు ఆరెంజ్ అలర్ట్ ఇచ్చారు. తేలికపాటి నుంచి ఓ మోస్తరు వర్షాలు కురిసే అవకాశం ఉందని అంచనా వేస్తున్నారు. అక్కడక్కడా ఉరుములు, మెరుపులు, ఈదురుగాలులతో కూడిన వానలు పడతాయంటున్నారు.
