ప్రభుత్వ స్థలాన్ని ఆక్రమించి కట్టిన అక్రమ నిర్మాణాల కూల్చివేత సందర్భంగా కాకినాడలో ఉద్రిక్తత చోటుచేసుకుంది. మాజీ ఎమ్మెల్యే, వైసీపీ నేత ద్వారంపూడి చంద్రశేఖర్ రెడ్డి అధికారులపై మండిపడ్డారు. కూల్చివేతలను అడ్డుకునేందుకు ప్రయత్నించారు. పోలీసులు ఆపుతున్నా అధికారులపైకి దూసుకెళ్లేందుకు యత్నించారు. దీనికి సంబంధించిన వీడియో ప్రస్తుతం సోషల్ మీడియాలో వైరల్ గా మారింది.
కాకినాడ కార్పొరేషన్ కు చెందిన స్థలాన్ని ద్వారంపూడి అనుచరుడు ఆక్రమించాడు. ఆ స్థలంలో భారీ భవనాన్ని నిర్మిస్తున్నారు. వైసీపీ ప్రభుత్వంలో ఏం చేయలేక చేతులెత్తేసిన అధికారులు.. టీడీపీ అధికారంలోకి రావడంతో అక్రమ నిర్మాణాల కూల్చివేత ప్రారంభించారు. ముందుగా నోటీసులు ఇచ్చి, ఆపై తొలగింపులు చేపట్టారు. ఈ క్రమంలోనే ద్వారంపూడి చంద్రశేఖర్ రెడ్డి అనుచరుడికి కూడా నోటీసులు ఇచ్చారు. ఆ నోటీసులకు ఎలాంటి స్పందన లేకపోవడంతో భవనం కూల్చివేత మొదలుపెట్టారు.
గొడవలు జరిగే అవకాశం ఉండడంతో పోలీసులు భద్రత ఏర్పాటు చేశారు. కూల్చివేతల విషయం తెలిసి మాజీ ఎమ్మెల్యే ద్వారంపూడి అనుచరులతో కలిసి అక్కడికి చేరుకున్నారు. భవనం కూల్చివేతను ఆపాలని అధికారులతో వాగ్వాదానికి దిగారు. పోలీసులు అడ్డుకుంటున్నా ఆగకుండా అధికారులపైకి దూసుకెళ్లే యత్నం చేశారు. కాగా, ప్రభుత్వ అధికారుల విధి నిర్వహణకు అడ్డుతగిలిన ద్వారంపూడి చంద్రశేఖర్ రెడ్డిపై చట్టపరంగా చర్యలు తీసుకునే అవకాశం ఉందని పోలీసులు చెబుతున్నారు.
