ఎన్ని కత్తిపోట్లైనా
దేహాన్నే గాయపరుస్తాయి
అవిశ్రాంతమైన ఆలోచనల్ని కాదు
ఎన్ని ఆటుపొటులైనా
తీరాలను భయపెడతాయి
సమస్త భూమండలాన్ని కాదు
ఎన్ని ఈదురు గాలులైనా
ఎండుటాకులను పండుటాకుల్నే రాలుస్తాయి
పదిలమైన పత్రాల పత్రహరితాన్ని కాదు
ఎన్ని నిరంకుశ శరాలైనా
మాటల్ని అణగదొక్కుతాయేమో
ఉబికే ధిక్కార స్వరాలను కాదు
దోపిడి చీకటి గుహలో చిక్కిన దీనుడు
ఎప్పటికీ అక్కడే అలాగే మగ్గిపోడు
పుడమిని చీల్చుకు వచ్చే విత్తనంలా
చైతన్యం చిగురంతైనా చిగురిస్తుంది చూడు
తమస్సును ఛేదించుకునే
ఉషస్సూ ఉదయిస్తుంది
గుర్రుపెట్టే పుర్రెలకు
ఎన్నిదుర్భుద్దులు మొలిచినా
స్వేచ్ఛా వాక్కుల్ని సాధించుకునే హక్కుల్ని
మానవత్వాన్ని ..మనిషితనాన్నీ నిషేధించటం
ఏ తంత్రానికీ ఏ కుతంత్రానికీ సాధ్యంకాదు
ప్రకృతి పాఠాలు
చరిత్ర గుణపాఠాలు మరువొద్దు
పోరాటం ఎగురుతున్న ఎర్రని జెండైనప్పుడు
సిద్దాంతం దీవిస్తున్న దీపస్తంభమైనప్పుడు
వెలుగుబాటను ఆపడం ఎవడితరం..!?
`డా.కటుకోరa్వల రమేష్‌,
సెల్‌: 9949083327
వెలుగు బాట
