ఇరాన్‌తో సంప్రదింపులు కొనసాగుతున్నాయి

చర్చలపై ఆ దేశం సీరియస్‌గా ఆలోచిస్తోంది: ట్రంప్
వాషింగ్టన్: అమెరికా-ఇరాన్ మధ్య ఘర్షణలతో పశ్చిమాసియా రణరంగంగా మారింది. అమెరికా అధ్యక్షుడు మొదటి నుంచి రెండు నాల్కల ధోరణితో వ్యవహరిస్తున్నారు. బయట గాంభీర్యం ప్రదర్శిస్తూ లోన తోక ముడుస్తున్నారు. రోజుకో మాట మార్చి చర్చలు సాగదీస్తున్నారు. చర్చల అంశాన్ని ఇరాన్ తీవ్రంగా పరిగణిస్తోందని తాజాగా ఆయన పేర్కొన్నారు. అందుకే ఆ దేశంపై భీకర దాడులు చేయాలా, వద్దా.? అనే అంశంపై ఇంకా నిర్ణయం తీసుకోలేదన్నారు. భీకర దాడుల అంశంపై ఉన్నతస్థాయి అధికారులతో ట్రంప్ చర్చలు జరుపుతున్నారని వార్తలు వస్తోన్న నేపథ్యంలో ఆయన నుంచి ఈ స్పందన వచ్చింది.
‘ప్రస్తుతం మేం వారితో చర్చలు జరుపుతున్నాం. చర్చలను వారు సీరియస్‌గా తీసుకుంటున్నారు. అందుకు కారణం ఏదైనా ఉండొచ్చు. వారు లొంగిపోవచ్చు…లేదా ఏదైనా గుహలోకి వెళ్లి దాక్కోవచ్చు. మా వైపు నుంచి క్షిపణులు లోడ్ చేసే ఉన్నాయి. యుద్ధం ముగించడానికి రెండు అవకాశాలు ఉన్నాయి. ఇప్పుడు చేస్తోన్న దాడుల తీవ్రత పెంచి, వాళ్ల దగ్గర ఉన్నదంతా నాశనం చేయొచ్చు. లేకపోతే ఒప్పందం చేసుకోవచ్చు. డీల్ చేసుకోవడమనేది తెలివైన వ్యూహం. చర్చల విషయంలో వారు సీరియస్‌గా ఉన్నంతమాత్రాన ఒప్పందం కుదురుతుందని చెప్పలేం. చివరకు ఏం జరుగుతుందో వేచి చూడాలి’ అని పేర్కొన్నారు. అయితే, అమెరికా బెదిరింపులకు తలొగ్గబోమని…బలప్రయోగం, ఒత్తిడికి ఎట్టి పరిస్థితుల్లోనూ స్పందించబోమని ఇరాన్ ఇదివరకే స్పష్టం చేసింది.