ఇప్పుడిప్పుడే కోవిడ్ ముప్పు తప్పిందని ఊపిరి పీల్చుకుంటున్న తరుణంలో అలాంటిదే మరో వైరస్ను పరిశోధకులు గుర్తించారు. గబ్బిలాల నుంచి వ్యాప్తి చెందుతున్న ఈ ఖోస్తా2 వైరస్ మనుషులకు సోకుతుందని పరిశోధకులు తేల్చారు. ప్రస్తుతం ఉన్న వ్యాక్సిన్లేవీ దీన్ని అడ్డుకోవడం లేదని శాస్త్రవేత్తలు చెబుతున్నారు.గబ్బిలాల నుంచి మనుషులకు సంక్రమించే ఖోస్తా-2 అనే నూతన వైరస్ను అమెరికా శాస్త్రవేత్తలు గుర్తించారు. ప్రస్తుతం అందుబాటులో ఉన్న టీకాలు దీనిపై ప్రభావం చూపలేకపోతున్నాయని పరిశోధకులు తెలిపారు. కోవిడ్-19కు కారణమయ్యే సార్స్ కోవ్-2 వైరస్ యాంటీబాడీలకు ఇది నిరోధకతను కలిగి ఉందని ప్లాస్ పాథోజెన్స్ అనే జర్నల్లో ప్రచురితమైన పరిశోధనాంశాలు వెల్లడిరచాయి. ఈ వైరస్ తొలిసారిగా 2020 చివర్లో రష్యాలోని గబ్బిలాల్లో గుర్తించారు. కానీ అది మనుషులకు ప్రమాదకరం అవుతుందని భావించలేదు. ఆ తర్వాత శాస్త్రవేత్తలు నిర్వహించిన పరిశోధనల్లో ఆ వైరస్ మనుషులకు సంక్రమిస్తుందని.. ప్రజారోగ్యానికి ముప్పుగా పరిణమించే ప్రమాదం ఉందని తేలింది. కోవిడ్కు కారణమయ్యే సార్స్ కోవ్-2తోపాటు ఈ ఖోస్తా-2 వైరస్లు సార్బ్కోవైరస్ రకానికి చెందినవి. ఇవి కొత్త రకం స్ట్రెయిన్లను ఏర్పరిచే సామర్థ్యాన్ని కలిగి ఉంటాయి. రష్యాలో ఈ ఖోస్తా వైరస్ను గుర్తించిన సమయంలో ఖోస్తా-1, ఖోస్తా-2 అనే రెండు రకాలను పరిశోధకులు గుర్తించారు. ఖోస్తా-1 రకం వైరస్ మనుషులకు సంక్రమించదు. కానీ కోవిడ్ వైరస్ తరహాలోనే ప్రొటీన్ను ఉపయోగించుకొని మనుషులకు సంక్రమిస్తుందని తేల్చారు. మానవ శరీర కణాల్లోని గ్రాహకాల ద్వారా ఇవి కణాల్లోకి ప్రవేశిస్తున్నాయని పరిశోధకులు గుర్తించారు. కోవిడ్-19 వ్యాక్సిన్లు ఈ ఖోస్తా వైరస్ను అంతమొందించడం లేదని శాస్త్రవేత్తలు తెలిపారు. ఖోస్తా-2 వైరస్ గబ్బిలాలు, పాంగోలిన్లు, రక్కూన్ శునకాలు, పామ్ సివెట్ల ద్వారా ఇవి వ్యాప్తి చెందుతుంది. ఖోస్తా-2 వైరస్ కరోనా తరహాలో మానవాళికి ప్రమాదకరంగా పరిణమిస్తుందా అనే విషయాన్ని ఇప్పుడే చెప్పలేమంటున్నారు పరిశోధకులు. ఖోస్తా-2 వైరస్, సార్స్-కోవ్-2 వైరస్తో కలిస్తే మాత్రం ఇన్ఫెక్షన్లు పెరగొచ్చని పరిశోధకులు అభిప్రాయపడుతున్నారు.