Saturday, October 1, 2022
Saturday, October 1, 2022

సైనిక క్యాంపుపై ఆత్మాహుతి దాడి

ముగ్గురు సైనికుల వీరమరణం
ఇద్దరు ముష్కరుల హతం

స్వాతంత్య్ర వేడుకల వేళ
రాజౌరి జిల్లా పర్ఘల్‌లో ఘటన

జమ్ము : భారతదేశం స్వాతంత్య్ర దినోత్సవ వేడుకలకు సిద్ధమవుతున్న వేళ… జమ్ముకశ్మీర్‌లో ఉగ్రవాదులు రెచ్చిపోయారు. గురువారం తెల్లవారుజామున రాజౌరీకి 25 కి.మీల దూరంలోని సైనిక క్యాంపుపై ఇద్దరు ఉగ్రవాదులు ఆత్మాహుతి దాడికి పాల్పడ్డారు. ఈ ఘటనలో ముగ్గురు జవాన్లు అమరులయ్యారు. నాలుగు గంటలపాటు జరిగిన ఎదురుకాల్పుల్లో ఇద్దరు ముష్కరులు హతమయ్యారు. ‘గురువారం తెల్లవారుజామున, రాజౌరీ జిల్లాలోని పర్ఘల్‌లోని భారత సైనిక పోస్ట్‌లోని అప్రమత్తమైన సెంట్రీలు ప్రతికూల వాతావరణం, దట్టమైన ఆకులను ఉపయోగించుకుని అనుమానాస్పద వ్యక్తులు తమ పోస్ట్‌ను సమీపిస్తున్నట్లు గుర్తించారు’ అని జమ్ము పీఆర్‌వో (రక్షణ) లెఫ్టినెంట్‌ కల్నల్‌ దేవేందర్‌ ఆనంద్‌ తెలిపారు. గ్రెనేడ్లను విసిరిన ఇద్దరు ఉగ్రవాదులను సెంట్రీలు సవాలు చేశారని ఆయన చెప్పారు. అయితే ఆ ఇద్దరు ఉగ్రవాదులు పోస్ట్‌లోకి చొరబడేందుకు యత్నించారు. భారీ కాల్పులకు దిగారు. వెంటనే అప్రమత్తమైన భద్రతా సిబ్బంది వారిపై కాల్పులు జరిపారు. ఈ ఎన్‌కౌంటర్‌లో ఇద్దరు ఉగ్రవాదులను సైన్యం మట్టుబెట్టిందని ఆనంద్‌ తెలిపారు. ఈ ఆపరేషన్‌లో ఆరుగురు సైనికులు గాయపడ్డారని, ఆత్మాహుతి దాడిని తిప్పికొట్టే క్రమంలో వారిలో ముగ్గురు సైనిక వీరులు అమరులయ్యారని తెలిపారు. అమరులైన సైనిక సిబ్బందిలో సుబేదార్‌ రాజేంద్ర ప్రసాద్‌ (రాజస్థాన్‌లోని జుంజును జిల్లాలోని మాలిగోవెన్‌ గ్రామానికి చెందినవారు), రైఫిల్‌మెన్‌ లక్ష్మణన్‌ డి (తమిళనాడులోని మదురై జిల్లా టి పుదుపట్టి గ్రామానికి చెందినవారు), రైఫిల్‌మెన్‌ మనోజ్‌ కుమార్‌ (హరియాణాలోని ఫరీదాబాద్‌లోని షాజహాన్‌పూర్‌ గ్రామానికి చెందినవారు) అని ఆయన చెప్పారు. విధి నిర్వహణలో అత్యున్నత త్యాగం చేసిన ఈ సైనిక వీరులకు భారత సైన్యం సెల్యూట్‌ చేస్తోందని అన్నారు. వారి అత్యున్నత త్యాగం, కర్తవ్య దీక్షకు దేశం వారికి ఎల్లప్పుడూ రుణపడి ఉంటుందని ఆయన అన్నారు. అధికారులు, ప్రత్యక్ష సాక్షుల ప్రకారం, ఇక్కడి నుంచి 185 కిలోమీటర్ల దూరంలో ఉన్న పర్ఘల్‌ వద్ద ఉన్న శిబిరం బాహ్య కంచెను ఉగ్రవాదులు ఉల్లంఘించడానికి ప్రయత్నించినప్పుడు తెల్లవారుజామున 2 గంటలకు మొదటి తుపాకీ శబ్దం వినిపించింది. స్వాతంత్య్ర దినోత్సవానికి నాలుగు రోజుల ముందు జరిగిన ఈ దాడి, మూడు సంవత్సరాల తర్వాత జమ్ముకశ్మీర్‌ కేంద్ర పాలిత ప్రాంతానికి ‘ఫిదాయీన్‌’ (ఆత్మాహుతి దాడి చేసేవారు) తిరిగి రావడాన్ని సూచిస్తుంది. దక్షిణ కశ్మీర్‌లోని పుల్వామా జిల్లాలోని లెత్‌పోరాలో ఫిబ్రవరి 14, 2019న జరిగిన చివరి దాడిలో 40 మంది భారత జవాన్లు మరణించారు. గురువారం నాటి దాడిలో నిషేధిత జైషే మహ్మద్‌కు చెందిన ఇద్దరు ఆత్మాహుతి దళ సభ్యులు శిబిరంలోకి చొరబడేందుకు ప్రయత్నించారని, అయితే వారిని తిప్పికొట్టినట్లు పోలీసు డైరెక్టర్‌ జనరల్‌ దిల్‌బాగ్‌ సింగ్‌ పీటీఐకి తెలిపారు. ప్రత్యక్ష సాక్షుల ప్రకారం, ఉదయం 6.10 గంటలకు చివరి తుపాకీ శబ్దం వినిపించింది. జమ్ము జోన్‌కు నాయకత్వం వహిస్తున్న అదనపు డైరెక్టర్‌ జనరల్‌ ఆఫ్‌ పోలీస్‌ ముఖేష్‌ సింగ్‌ మాట్లాడుతూ దర్హాల్‌ పోలీస్‌ స్టేషన్‌ నుంచి ఆరు కిలోమీటర్ల దూరంలో ఉన్న సైనిక క్యాంప్‌నకు మరిన్ని బలగాలను పంపినట్లు తెలిపారు. సోదాలు, కూంబింగ్‌ ఆపరేషన్‌ కొనసాగుతోందని తెలిపారు. రాజౌరీ ప్రాంతంలో ఉగ్రవాదుల కదలికల పై నిఘా వర్గాల సమాచారం నేపథ్యంలో భద్రతా బలగాలు, పోలీసులు అప్రమత్తమయ్యారు. బుధవారం దర్హాల్‌, నౌషేరా బెల్ట్‌లో కూంబింగ్‌ ఆపరేషన్‌ను ప్రారంభించారు. గతంలో ఏప్రిల్‌ 22న ప్రధాని నరేంద్ర మోదీ జమ్ములో పర్యటన జరగాల్సిన సమయంలో కూడా జైషే మహ్మద్‌ ఉగ్రవాదులు ‘ఆత్మాహుతి’ దాడికి ప్రయత్నించారు.
అయితే సుంజావాన్‌ ఆర్మీ క్యాంపు సమీపంలో సీఐఎస్‌ఎఫ్‌తో జరిగిన ఎన్‌కౌంటర్‌లో ఇద్దరు ఉగ్రవాదులు హతమయ్యారు. పారామిలటరీ దళానికి చెందిన ఓ అధికారి కూడా మరణించారు. మే 8న, రాజౌరి జిల్లాలోని లామ్‌ ప్రాంతంలో నియంత్రణ రేఖ (ఎల్‌ఓసి) వెంబడి చొరబాటు ప్రయత్నాన్ని సైన్యం విఫలం చేయడంతో ఒక ఉగ్రవాది హతమయ్యాడు. జమ్ముకశ్మీర్‌ లెఫ్టినెంట్‌ గవర్నర్‌ మనోజ్‌ సిన్హా ఆత్మాహుతి దాడిని ఖండిరచారు. ఉగ్రవాదులు, వారి మద్దతుదారులతో తగిన రీతిలో వ్యవహరిస్తామని ప్రతిజ్ఞ చేశారు. ఆయన ఈ మేరకు ఒక ట్వీట్‌లో అత్యున్నత త్యాగం చేసిన వీర జవాన్లకు నివాళులు తెలుపుతూ, ఆ వీర యోధుల కుటుంబాలకు ప్రగాఢ సానుభూతి ప్రకటించారు.

సంబంధిత వార్తలు

spot_img

తాజా వార్తలు

spot_img