పురాణం శ్రీనివాస శాస్త్రి
ఏలినవారి దృష్టిలో రైతు సమస్య అంటే తమకి రైతుల ద్వారా సంక్రమించిన సమస్య. అంతే తప్ప రైతులకు తమ ద్వారా వచ్చిన సమస్య కాదు, ఏ సమస్యయినా పరిష్కారం ఒక్కటే ఏలినవారి దృష్టిలో... తొక్కేయడమే. రైతుల్ని చంపేశారు అని కాకుండా సమస్యని తొక్కేశారు అని అనుకోవాలి మనం. ఓట్లు నొక్కేసినంత సులభంగా సమస్యని తొక్కేశారు అనుకొని రేపు పోలింగ్‌ పండగ రోజున అనుకూలంగా ముద్దర గుద్దేయాలి జనం. చెప్పుకోడానికి సమస్యలే తప్ప జయవిజయాలు లేనప్పుడు నిరాశ తన్నుకొచ్చిన తరుణంలో పాపం ఏం చేయాలి మరి? తొక్కేయక తప్పలేదు సర్కారుకు. కారుతో తొక్కేదే సర్కారు అని మనకు కొత్త నిర్వచనం ఇచ్చారని సంతోషించాలి. రైతులకు మేలు చేసేందుకే ఆ చట్టాలు అని బల్ల గుద్దినవారు, మాయమాటలు నమ్మని రైతులోకం రోడ్డెక్కితే ఆనక ఎన్నికలు తలచుకుని, అసమర్థతతో సాధారణ జనం కూడా కాగుతుంటే ‘కారెక్కితొక్కేయక’ ఏం చేస్తారు? మేలు చేస్తాం అనే మాట నమ్మకుండా నినాదాలు అరిస్తే తొక్కేయడం సులభ గణితం! అసలు రైతులకు మేలు చేయడం అంటే కొర్పొరేట్‌లో లేదా వారి మనుషులని రైతులుగా మార్చి, ఉన్న రైతులను మాడ్చి, మేలు చేస్తారు. కార్పొరేట్లని రైతులుగా మార్చి మేళ్లు కట్టబెడితే అది రైతులకి మేలు చేసినట్టు కాదా అని అడుగుతున్నారు సర్కారోరు. ఆ ముక్క అర్థం చేసుకోకుండా బడుగు రైతు రోడ్డెక్కి రేపు జరగబోయే ఎన్నికల్లో సర్కారు కలలకి బ్రేకు వేస్తే ఇంకా మా మంత్రుల కార్లకి బ్రేకులెందుకు అని వారడుగుతున్నారు. ఆ టయానికి బ్రేకులు ఫెయిలై కారు తీన్‌తారు అయిందులేనని సర్దిచెప్పుకోమంటున్నారు. వేలకోట్ల డ్రగ్స్‌ గుజరాత్‌లో పట్టుబడితే కూపీ లాగకుండా పట్టు కోవడమే గట్టి విషయం పొమ్మంటున్నారు. నామ్‌ కే వాస్తే ఓ పెద్దింటి ముస్లిం కుర్రాణ్ణి పట్టుకొని ప్రగల్భిస్తున్నారు. ముస్లిం ద్వేషవ్యాప్తికి ఏం పటాటోపం. ‘‘నిందితులకి బైలు.. బాధితులకి జైలు’’, ‘సమస్యలని తొక్కేయడం లంచం సొమ్ములు మెక్కేయడం’ అనే సూత్రాలు వ్యాప్తిలో పెట్టి రేపు ఎన్నికల్లో ఎలా వెలుగుతారో మరి! మంచి చేసి గెలవటం పాత ఫ్యాషన్‌.. మంచిని తుంచి గెలవడం ఈనాటి వేషమ్‌. రెంటిలోనూ ఆరియు తేరిన వృద్ధమూర్తులు! జీతాలివ్వక పోయినా ఉద్యోగాలు చేసుకుంటున్న జనాన్ని చూపించి, సమస్యలున్నా పంటలు పండిరచే రైతుల్ని తలచుకుని తృప్తి పడుతున్నారు. భూమిని సాగు సాగే పంటలకు కాకుండా లాభాల పంటలకు వాడే దేశాల అవసరాలు ఈడేర్చడానికి, ఇక్కడి పంటలకు సెలవిచ్చే నెలవులు వెతికే చట్టాల ఒబ్బిడితనం గుర్తెరిగి జైకొట్టమంటున్నారు ఏలినోరు అనే పేరు గల ‘ఏలిక తెలియనోరు!’ ఆ చేతి చేతని ఒప్పుకు తీరాలి ఆ నోటి మాటని ఆనందించి ఊరుకోవాలి. అనుమానాలు పెట్టుకుని ఐకమత్యం అంటూ పోలరైజేషన్‌ని దెబ్బకొడితే అగ్గిబుగ్గవుతారు సర్కారు. అదే బ్రేకుల్లేని కారు!
‘60 ఏళ్లు ఎలాగూ ఉండం’ అని తెలిసినోళ్లు, ప్రతి ఎన్నికకీ డ్రబ్బింగ్‌ బాజా చెవులు చిల్లులు పొడుస్తుంటే బూత్‌లెవిల్‌ మేనేజ్మెంట్‌ అనే ఏకైక ఆశాదీపం రానురాను ఆరిపోతుంటే సమస్యని తొక్కేసి, ప్రాణాలు గుంజేసి, విర్రవీగక రేపటి ఓటమికి నేడే తలలూపుతారా? యుపి రకరకాల చావుల గడ్డ అని నిరూపించక మానుతారా? సర్కార్‌ యజమానులు మానులే మరి!
