తెలంగాణలో మంకీపాక్స్‌ కలకలం రేగింది. కువైట్‌ నుంచి కామారెడ్డికి తిరిగొచ్చిన ఓ వ్యక్తికి మంకీపాక్స్‌ లక్షణాలు కనిపించడంతో అతడిని హైదరాబాద్‌లోని ఫీవర్‌ హాస్పిటల్‌లో ఐసోలేషన్‌లో ఉంచారు. దీంతో తెలంగాణలో మంకీపాక్స్‌ వ్యాపించే అవకాశముందని ప్రజల్లో ఆందోళన నెలకొంది. ఈ నేపథ్యంలో వైద్య,ఆరోగ్య శాఖ డైరెక్టర్‌ శ్రీనివాసరావు మంకీపాక్స్‌ వైరస్‌ వ్యాప్తిపై క్లారిటీ ఇచ్చారు. మంకీపాక్స్‌ ప్రమాదకరం కాదని, ప్రజలు ఆందోళన చెందొద్దని సూచించారు.కువైట్‌ నుంచి తిరిగొచ్చిన ఓ వ్యక్తికి మంకీపాక్స్‌ లక్షణాలు రావడంతో అతడిని హైదరాబాద్‌లోని ఫీవర్‌ హాస్పిటల్‌కి తరలించి ఐసోలేషన్‌లో ఉంచినట్లు తెలిపారు. కామారెడ్డి జిల్లా కేంద్రానికి చెందిన వ్యక్తి ఆరో తేదీన కువైట్‌ నుంచి వచ్చాడని, ఆ సమయంలో అతడిని ఎలాంటి లక్షణాలు లేవన్నారు. 20వ తేదీన జ్వరం, 23వ తేదీ నాటికి రాషెస్‌ వచ్చాయని తెలిపారు. దీనిపై స్థానిక వైద్యాధికారుల నుంచి సమాచారం వచ్చిన వెంటనే బాధితుడిని హుటాహుటిన హైదరాబాద్‌కు తరలించామన్నారు. సోమవారం బాధితుడి నుంచి శాంపిల్స్‌ సేకరించి పుణెలోని నేషనల్‌ ఇన్‌స్టిట్యూట్‌ ఆఫ్‌ వైరాలజీ ల్యాబ్‌కు పంపిస్తామని తెలిపారు. రిపోర్టు వచ్చేవరకు అతడిని ఫీవర్‌ హాస్పిటల్‌లోనే ఉంచి చికిత్స అందిస్తామన్నారు. అతడితో నేరుగా కాంటాక్ట్‌ అయిన ఆరుగురిని గుర్తించామని, వారికి మంకీపాక్స్‌ లక్షణాలు లేవని డీహెచ్‌ శ్రీనివాసరావు తెలిపారు. అయినప్పటికీ ముందు జాగ్రత్త చర్యగా వారిని కూడా ఐసోలేట్‌ చేశామన్నారు.మరోవైపు మంకీపాక్స్‌ కేసుల కోసం ఫీవర్‌ ఆస్పత్రిలో 30 బెడ్లతో ప్రత్యేక వార్డు ఏర్పాటు చేసినట్లు ఫీవర్‌ హాస్పిటల్‌ సూపరింటెండెంట్‌ శంకర్‌ తెలిపారు. మంకీపాక్స్‌ టెస్టులు చేసేందుకు గాంధీ ఆస్పత్రిలో ల్యాబ్‌ ఇంకా అందుబాటులోకి రాలేదన్నారు. మంకీ పాక్స్కు ప్రత్యేకంగా చికిత్స అంటూ లేదని.. పొంగు వ్యాధిలాగే మూడు వారాల్లో దానంతట అదే తగ్గిపోతుందని తెలిపారు. వ్యాధి సోకిన వ్యక్తికి లక్షణాలను బట్టి చికిత్స అందిస్తామన్నారు. మంకీపాక్స్‌ లక్షణాలు ఉన్నట్లు ఎవరికైనా అనుమానాలుంటే 9030227324 నంబర్‌కు ఫోన్‌ చేయాలని సూచించారు.
