కంది రైతులు అప్రమత్తంగా ఉండాలి..

పురుగుల నివారణతో అధిక దిగుబడులు సాధించాలి – మండల వ్యవసాయ అధికారి

విశాలాంధ్ర – నార్పల:- మండలంలో ఖరీఫ్‌ 2026 సీజన్‌లో 962 హెక్టార్లలో కంది పంట సాగు చేసినట్లు మండల వ్యవసాయ అధికారి తెలిపారు. మంగళవారం సిద్ధరాచర్ల గ్రామంలో నిర్వహించిన ‘పొలం పిలుస్తోంది్ణ కార్యక్రమంలో భాగంగా కంది పంటను పరిశీలించారు. ప్రస్తుతం పంట పూత, పిందె, కాయ ఏర్పడే దశల్లో ఉందని, రైతులు ప్రత్యేక శ్రద్ధ వహించాలని సూచించారు.కంది పంటకు మారుక మచ్చల పురుగు, శనగపచ్చ పురుగు, కాయతొలిచే ఈగ, పిండి నల్లి వల్ల నష్టం జరిగే అవకాశం ఉందన్నారు. వీటి నివారణకు రైతులు తీసుకోవాల్సిన ముఖ్యమైన చర్యలను వివరించారు.మారుక మచ్చల పురుగు నివారణకు వేప గింజల కషాయం లేదా వేపనూనె పిచికారీ చేయాలి. శనగపచ్చ పురుగు నివారణకు ఎకరాకు 20 ‘Y’ ఆకారపు పక్షి స్థావరాలు, నాలుగు లింగాకర్షక బుట్టలు ఏర్పాటు చేసుకోవాలి. కాయతొలిచే ఈగ, పిండి నల్లి ఉధృతిని గమనించి వ్యవసాయ శాఖ సూచించిన సస్యరక్షణ మందులను వినియోగించాలి.పిండి నల్లి నివారణకు పురుగు ఆశించిన కొమ్మలను తొలగించి నాశనం చేయాలి. పొలంలో కలుపు మొక్కలు లేకుండా శుభ్రంగా ఉంచుకోవాలని సూచించారు. వర్షాభావ పరిస్థితుల్లో 19:19:19 ఎరువును లీటరు నీటికి 5 గ్రాముల చొప్పున పిచికారీ చేయాలి. పూత, పిందె రాలకుండా ప్లానోఫిక్స్, కాయ ఏర్పడే దశలో బెట్ట పరిస్థితులను అధిగమించేందుకు పొటాషియం నైట్రేట్‌ను సూచించిన మోతాదులో వినియోగించాలి. నీటి వసతి ఉన్న రైతులు పూత దశలో ఒక రక్షక తడి ఇవ్వాలని తెలిపారు.పురుగుమందులు పిచికారీ చేసేటప్పుడు తగిన రక్షణ పరికరాలు ధరించాలని, మందుల లేబుల్‌పై సూచించిన మోతాదులను పాటించాలని మండల వ్యవసాయ అధికారి రైతులకు సూచించారు. సకాలంలో సస్యరక్షణ చర్యలు చేపట్టి కంది పంటలో అధిక దిగుబడులు సాధించాలని కోరారు.