ఫిబ్రవరి 3 నాటికి గరిష్ఠ స్థాయికి…
ఐఐటీ కాన్పూర్‌ అధ్యయనం
హైదరాబాద్‌ : కోవిడ్‌-19 మహమ్మారి కొత్త వేరియంట్‌ ఒమిక్రాన్‌ ద్వారా ప్రేరేపించబడే మూడవ తరంగం ఫిబ్రవరి 3 నాటికి దేశంలో గరిష్ఠ స్థాయికి చేరుకోవచ్చని ఐఐటీ కాన్పూర్‌ పరిశోధకులు అంచనా వేశారు. ‘ప్రపంచవ్యాప్తంగా ఉన్న ధోరణిని అనుసరించి, భారతదేశంలో మూడవ తరంగం డిసెంబర్‌ మధ్యలో ప్రారంభమై ఫిబ్రవరి ప్రారంభంలో గరిష్ఠ స్థాయికి చేరుకుంటుందని ఈ ప్రాజెక్టు రిపోర్ట్‌ అంచనా వేసింది’ అని ఆన్‌లైన్‌ ప్రీప్రింట్‌ సర్వర్‌ మెడ్‌ర్కివ్‌ ప్రచురించిన నివేదిక పేర్కొంది. ఈ బృందం భారతదేశంలో మూడవ తరంగాన్ని అంచనా వేయడానికి గాస్సియన్‌ మిశ్రమ నమూనా అనే గణాంక సాధనాన్ని ఉపయోగించింది. భారత్‌లో మూడవ తరంగాన్ని అంచనా వేయడానికి భారతదేశంలోని మొదటి, రెండవ తరంగాల డేటాను వివిధ దేశాలలో ఒమిక్రాన్‌ ద్వారా ప్రేరేపించబడిన కేసుల ప్రస్తుత పెరుగుదలను పరిశోధకులు ఉపయోగించారు. వారు మాట్లాడుతూ ‘మా ప్రాథమిక పరిశీలన తేదీ నుండి 735 రోజుల తర్వాత కేసులు గరిష్ఠ స్థాయికి చేరుకుంటాయని సూచిస్తున్నాయి. అంటే జనవరి 30, 2020, భారతదేశం తన మొదటి అధికారిక కోవిడ్‌-19 కేసును నివేదించింది. అందువల్ల కేసులు డిసెంబర్‌ 15, 2021 నాటికి పెరగడం ప్రారంభిస్తాయి. మూడవ తరంగం గరిష్ఠ స్థాయి గురువారం, ఫిబ్రవరి 3, 2022న సంభవిస్తుంది’ అని తెలిపింది. ఈ పరిశోధనా బృందంలో ఐఐటీ కాన్పూర్‌లోని గణితం, గణాంక శాస్త్ర విభాగానికి చెందిన సబర పర్షద్‌ రాజేష్‌భాయ్‌, సుభ్రా శంకర్‌ ధర్‌, శలభ్‌ ఉన్నారు. కోవిడ్‌-19 మొదటి, రెండవ తరంగాల తర్వాత ‘మూడవ తరంగం కూడా వస్తుంది. అవును అయితే, ఎప్పుడు’ అనేది ప్రధాన ప్రశ్న అని పరిశోధకులు తెలిపారు. ఈ పజిల్‌ను విప్పేందుకు బృందం గాస్సియన్‌ పంపిణీల మిశ్రమాన్ని అమర్చడం ఆధారంగా గణాంక పద్ధతి ద్వారా విశ్లేషించింది. ‘ఇతర అన్ని దేశాలలో 10 లక్షల రోజువారీ కేసులను ప్రణాళిక చేసిన తర్వాత భారతదేశంతో గ్రాఫ్‌లను సరిపోల్చింది. ఉత్తమ పోలిక కలిగి ఉన్న టాప్‌ 10 దేశాలను ఎంపిక చేసుకుంది. అవి అమెరికా, బ్రిటన్‌, జర్మనీ, ఫ్రాన్స్‌, దక్షిణాఫ్రికా, రష్యా, ఇజ్రాయెల్‌, స్పెయిన్‌, జాంబియా, జింబాబ్వే. జాంబియా, జింబాబ్వే చాలా దగ్గరగా సరిపోయే దేశాలు. వీటి రోజువారీ కేసులు భారతదేశానికి సమానమైన నమూనాలను అనుసరిస్తుంది’ అని పరిశోధకులు వివరించారు.
ఒమిక్రాన్‌తో థర్డ్‌ వేవ్‌…
